Yi chijiloneꞌn Moisés tu Aarón tetz yi faraón
5
1 Itzun yi teleꞌn tiemp nintzun eꞌ opon Moisés tu Aarón tan yol tetz faraón. Itzun cyaltz:—Cyakil yi yol yi skaleꞌ teruꞌ, iꞌtz yol yi ketz kaRyosil yi oꞌ xonl Israel. Je yol iꞌeꞌj: “Akꞌaj amaꞌl scyetz yi eꞌ intanum tan chibeneꞌn le amaꞌl tzꞌinunin tuꞌ tan ticyꞌseꞌn jun balaj kꞌej tan takꞌleꞌn wetz inkꞌej,” stzun iꞌ.
2 Yi tbital faraón yi yoleꞌj nintzun taltz:
—¿Naꞌ tzun scyetz yi jun itetz iRyosilaꞌtz yi na taj yil cawun sweꞌj tan wakꞌol amaꞌl tzitetz tan iteleꞌn liwr? Qui wajskeꞌn wutz nin quil wakꞌ amaꞌl tzitetz tan iteleꞌn liwr.
3 —Poro taꞌ, yi ketz kaRyosil yi oꞌ hebrey ja ẍchaj tib skawutz. Chaꞌstzun te na kaj kaben le amaꞌl yi tzꞌinunin tuꞌ tan takꞌleꞌn katxꞌixwatz tetz iꞌ, bantz qui kaquimeꞌn tan yaꞌbil nka tan chꞌichꞌ. Nin yi tkanil yi kabeꞌ iꞌtz ox kꞌej, cheꞌch tzun bantz.
4 —¿Nxac na cxtzan wok tan telseꞌn chitiemp yi eꞌ wunak te cyakꞌun? ¡Baꞌn tcuꞌn yi nink cxben itetz tan akꞌun! stzun yi rey scyetz Moisés tu Aarón. 5 Nchaꞌtz tal iꞌ scyetz:
—Ma jaluꞌ wiꞌnin xonl Israel najlcheꞌ tzoneꞌj. Ej nin tan ipaj quiꞌt na chakꞌuj, stzun yi rey bantz.
6 Ej iteꞌn nintzun te kꞌejaꞌtz yi teleꞌn jun ort takꞌun faraón scyetz yi eꞌ martomaꞌ tibaj yi akꞌun kale na chakꞌujeꞌt yi eꞌ xonl Israel.
7 —Yi jaluꞌ, nin sbneꞌ opon tunintz, quiꞌt tzitakꞌ wok xaktz scyetz yi eꞌ xonl Israel yi na chitzan tan banleꞌn xan, chi yi na ban nin. Ma na tajweꞌn tan chibeneꞌn cyetz tan molcheꞌn chixaktz. 8 Poro tajweꞌn tan bnixeꞌn iteꞌn nin tajlal xanaꞌtz chi yi na bnix nin cyaꞌn. Tajweꞌn tzꞌakuꞌl len chitarey na chin cyꞌaj nin eꞌ. Chaꞌstzun te na chitzan tan talcheꞌn: “¡Quin kakꞌeꞌ katxꞌixwatz tetz kaRyosil!” 9 Chaꞌstzun te akꞌwok mas cyakꞌun yi chin quiw nin, nin quiꞌt tzitakꞌ wok amaꞌl scyetz tan cyujeweꞌn, bantz quil chitxum yi eꞌchk laꞌjilaꞌtz yi na tzan talcheꞌn scyetz, stzun yi rey bantz.
10 Itzun yi quibital yi eꞌ martomaꞌ cyakil yi xtxolbilaꞌseꞌj, nintzun eꞌ baj eltz tan talcheꞌn scyetz cyakil wunak. Itzun cyaltz:
—Ma jaluꞌ cyakil yi xtxolbileꞌj iꞌtz ort tetz yi rey. Quiꞌt tzꞌakꞌlij tkan triw tzitetz yi na xcon itaꞌn tan banleꞌn xan. 11 Ma na tajweꞌn cxben wok tan ẍchamleꞌn yi tkan triw yi na xcon itaꞌn. Poro quil cutzaj yi tajlal itarey tan tuꞌ yi cxbenwok tan molcheꞌn yi tkan triw, cheꞌch yi eꞌ martomaꞌ bantz scyetz.
12 Yi quibital yi eꞌ xonl Israel yi xtxolbileꞌj nintzun eꞌ baj el xittz Egipto tan joyleꞌn eꞌchk xeꞌ triw tuꞌ tetz xel yi mero tkan triw yi na xcon cyaꞌn sajleꞌn tunintz tan banleꞌn xan. 13-14 Cyakil nintzun kꞌej eꞌ oc yi eꞌ ajcaw tetz faraón tan jakleꞌn iteꞌn nin tajlal xanaꞌtz chi yi na bnix nin cyaꞌn te yi na akꞌlij tzaj tkan triw scyetz. Nchaꞌtz ja chibiylij yi eꞌ xonl Israel yi eꞌ martomaꞌ nintzun cyaltz scyetz:
—¿Mbi tzuntz quiꞌt na xcyeꞌ wok te itarey? na yi ewt nin jaluꞌ qui nin nxcyeꞌ wok te yi tajlal xan nxcyeꞌ wok teꞌj sajleꞌn tunintz, cheꞌch tzun bantz.
15 Yi quibital nin yi quilol yi eꞌ xonl Israel yi eꞌ martomaꞌ nintzun eꞌ baj ben tan xochoꞌn tetz faraón. Yi cyoponeꞌn nintzun cyaltz:
—Taꞌ ¿mbi tzuntz yi chin qꞌuixcꞌuj nin na koꞌ tulejuꞌ yi oꞌ yi oꞌ xconsbeꞌtzuꞌ? 16 Na quiꞌt na akꞌlij xaktz sketz, poro na nin kabuchlijtz tan banleꞌn iteꞌn nin tajlal xanaꞌtz chi yi sajleꞌn yi na akꞌlij tzaj yi tkan triw sketz. Ej nin nkꞌeꞌtz tinaꞌtz, ma na na kabiylijtz cyakꞌun yi eꞌ teruꞌ ẍchakumuꞌ. ¡Poro taꞌ, eꞌ teꞌn yi tanumuꞌ yi mero ajpaj!
17 Sajeꞌn tzun tlol faraón scyetz. Itzun taltz:
—Ma jaluꞌ yi ax wok itetz quiꞌc nin junt na itxum wok, ma na ntin cyꞌajil, chin cyꞌaj nin ax wok. Chaꞌstzun te na cxtzan wok tan talcheꞌn: “Quin le amaꞌl tzꞌinunin tuꞌ tan toyeꞌn katxꞌixwatz tetz Kataj,” cẍchij wok na ban. 18 ¡Or tzibeneꞌn wok tan akꞌun mpe quiꞌkt tzꞌakꞌlij tkan triw tzitetz! Poro tajweꞌn tan bnixeꞌn iteꞌn nin tajlal xanaꞌtz chi yi na bnix nin itaꞌn, stzun faraón bantz scyetz.
19 Itzun yi quibital yi eꞌ bajxom tetz Israel yi xtxolbilaꞌseꞌj, ja el chitxum tetz yi mas tcunin qꞌuixcꞌuj ẍchibneꞌ jakꞌ chicaꞌwl yi eꞌ aj Egipto. 20 Ej itzun yi cyeleꞌn tzaj tan yol tetz faraón, nintzun eꞌ noj cyen Moisés tu Aarón ẍchiwutz cobox chitanum. Nintzun ben cyaloltz scyetz Moisés:
21 —Ryos tzꞌakꞌon icaws tan cyakil yi eꞌchk takleꞌn yi na cxtzan wok tan banleꞌn skeꞌj. Na ipaj wok yi na chiꞌch chicꞌuꞌl faraón scyuchꞌ yi eꞌ tetz ẍchakum skeꞌj. Ax wok teꞌn nin na cxtzan tan takꞌleꞌn cyen yi spar chikꞌab tan kabiyleꞌn cuꞌn, cheꞌch tzun bantz tetz Moisés tu Aarón.
Yi toqueꞌn Moisés tan nachleꞌn Kataj
22 Yi tbital Moisés yi xtxolbileꞌj nintzun bentz tan nachleꞌn Kataj. Itzun taltz tul yi oración:
—Taꞌ, ¿mbi tzuntz na tzanuꞌ tan takꞌleꞌn bis tetz yi intanum? na chin qꞌuixcꞌuj nin ateꞌ cuꞌnt. ¿Nxac nchinsaj ẍchakoluꞌ tzoneꞌj? 23 Na jetz yi wunleꞌn tan yol tetz yi faraón tan biꞌuꞌ, nin tan cyelseꞌn kloꞌ yi tanumuꞌ liwr, mas tcunin qꞌuixcꞌuj na tzan takꞌleꞌn sketz, nin txeꞌn nin cheꞌloꞌk liwrtz tanuꞌ, stzun Moisés tetz Kataj le oración.