Yi jiloneꞌn Josué scyetz cyakil yi eꞌ xonl Israel
23
1 Itzun bantz, te yi nsken el nimix tiemp yi jaleꞌnix tzatzin paz ẍchixoꞌl yi eꞌ xonl Israel scyuchꞌ yi eꞌ chicontr, nin yi nsken tijin cꞌuꞌl Josué, 2 nintzun eꞌ ẍchak iꞌ cyakil yi eꞌ xonl Israel, scyuchꞌ yi eꞌ wiꞌ banl wiꞌ, scyuchꞌ yi eꞌ ajcaw, scyuchꞌ yi eꞌ pujul xtisyaꞌ, nin scyuchꞌ yi cyajcawil yi eꞌ sanlar. Ej, itzun yi chimolol quib nintzun taltz scyetz:“Yi in wetz, ja chintijin, nin txant tan inquimeꞌn. 3 Ja itilwok yi eꞌchk takleꞌn yi mban Kataj scyeꞌj yi eꞌ kacontr, na iꞌ mmoꞌc tan oyintziꞌ scyeꞌj, tan tkꞌol iꞌ yi chiꞌamaꞌl sketz. 4 Ej, nin in nchinjatxon cuꞌn cyakil yi eꞌchk amaꞌlaꞌtz tziwutz tetz i herens scyuchꞌ ixonl. Txꞌiluꞌn cuꞌn oc teꞌj yi woqueꞌn tan jatxleꞌn. Ej, nin nkꞌeꞌtz ntin ncuꞌ injatxol yi eꞌchk amaꞌlaꞌtz yi nsken ketzaj, ma na nchaꞌtz yi eꞌchk amaꞌl yi txeꞌn ketzaj. Cyakil yi eꞌchk amaꞌlaꞌtz, na jop yi amaꞌl yi na xeꞌt nin te yi aꞌ Jordán, jalen tzi mar Mediterráneo yi at toqueꞌn tziꞌn. 5 Ma jaluꞌ, Kataj Ryos tzꞌocopon tan chilajeꞌn len yi eꞌ yi najlcheꞌ swutzak yi eꞌchk amaꞌlaꞌtz. Nin tzitetzajeꞌwok yi chiꞌamaꞌl quib yi sukiꞌnt sketz tan kaRyosil yi cawl ketz. 6 Nqueꞌn binwok il tan banleꞌn taneꞌn yi tetz ley yi tzꞌibaꞌnt cyen tan Moisés. Xomenwok teꞌj quib yi na tal. Quil tzijatx len itib muꞌẍ tal teꞌj. 7 Quil cxomwok te cyajtzaꞌkl yi eꞌ awer nak yi eꞌ cyaj cyen tzixoꞌlwok. Quil tzitakꞌ kꞌej yi cyetz chiryosil. Nin quil cxoꞌcwok jakꞌ chicaꞌwl. Nin quil tzitalwok chibiꞌ. Quil tzisukwok jun iyol tan chibiꞌ eꞌchk chiryosilaꞌtz. 8 Ma na ilenin xomenwok te yi tajbil yi kaRyosil yi cawl ketz. Xomenwok teꞌj, chi isajleꞌnix tunintz. 9 Na ja itil, yi tan yi tetz porer ja cheꞌl lajul yi eꞌ taw yi eꞌchk lmak tnumaꞌtz, yi chin cham nin eꞌ. Nin sajleꞌn tunintz, cyaꞌl jun jak xcyeꞌ tziteꞌjwok. 10 Na tan alchok jun tzitetzwok xcyeꞌ yi junaꞌtz tan chilajeꞌn len jun mil icontr.a Na yi Kataj yi cawl ketz, iꞌ tzꞌocopon tan oyintziꞌ tetz ixel,b chi sukiꞌnt taꞌn.
11 ”Qꞌuicyꞌlej binwok itib te yab ajtzaꞌkl. Nin lokꞌwok yi Kataj Ryos yi ajcaw skeꞌj. 12 Na ko quil tziqꞌuicyꞌlej itib, nin kol cxomwok te cyajtzaꞌkl yi eꞌ awer nak yi ateꞌ tzixoꞌl, nin kol tzitokꞌbej itib scyuchꞌ eꞌ xnaꞌn yi awer nakaꞌtz, 13 jun cuꞌn yol quil cheꞌ lajlen Ryos yi eꞌ wunakaꞌtz tzixoꞌlwok. Ma na chixconk taꞌn tan iꞌ tan ixiteꞌn. Na chixconk chi jun leb, nka jun tramp taꞌn, tan icuꞌseꞌnwok. Nin chixconk taꞌn, tan ibuchleꞌn. Na niꞌcuꞌn ẍchibneꞌ tziteꞌj chi na ban jun txꞌiꞌx le kawutz. Yaꞌstzun sbajok tziteꞌj. Jalen cuꞌn yil cxsotzwok icyakil cuꞌn swutz yi balaj amaꞌleꞌj yi ja takꞌ Kataj Ryos tzitetz.
14 ”Ma yi in wetz txant tan wajeꞌn wetz ẍchixoꞌl almaꞌ. Poro te yi ntaxk naꞌj, tajweꞌn yil cxoꞌc il tan xtxumleꞌn cyakil yi xtxolbil yi ja bnix tan Ryos skeꞌj. Na ja el cuꞌn iꞌ teꞌj cyakil quib yi sukiꞌnt taꞌn sketz. Nin quiꞌc nin jun yol iꞌ yi quiꞌk mmeꞌl cuꞌn teꞌj. Siquier nink muꞌẍ yi quiꞌk mmeꞌl kꞌab iꞌ teꞌj. 15 Poro chi yi mmeꞌl cuꞌn Ryos te yi eꞌchk takleꞌn balaj yi sukiꞌnt taꞌn sketz, choꞌn nin sbneꞌ iꞌ-tz tan takꞌleꞌn kacaws chi yi talnak iꞌ. Stkꞌeꞌ iꞌ kacaws, jalen cuꞌn yi cyaꞌl jun lcyaj cyen swutz yi balaj amaꞌleꞌj yi ja wiꞌt takꞌ iꞌ tzitetz. 16 Na ko quil cxeꞌlwok cuꞌn te yi iyol yi isuknak tetz, nin kol cxbenwok tan chicꞌuꞌlajeꞌn eꞌchk ryos yi banij tuꞌ taneꞌn, nin kol cxmejeꞌ cuꞌnwok ẍchiwutz yi eꞌchk ryosaꞌtz, jun cuꞌn yol jepon lajp wiꞌ Kataj tziteꞌj, jun cuꞌn yol cxsotzokwok swutz yi jun balaj amaꞌleꞌj yi ja takꞌ iꞌ tzitetz.”