Yi cyajeꞌn yi eꞌ xonl Rubén tu yi jun kꞌuꞌj xonl Manasés
22
1 Itzun bantz, yi wiꞌt jatxleꞌn yi amaꞌl scyetz yi eꞌ xonl Israel. Nintzun ẍchak Josué yi eꞌ xonl Rubén, tu yi eꞌ xonl Gad, tu yi jun kꞌuꞌj xonl Manasés yi cob elnakeꞌ, yi nsken bixeꞌ tan chinajeweꞌn le amaꞌl jalaj cyꞌen yi aꞌ Jordán. 2 Itzun taltz scyetz: “Ma jaluꞌ, yi axwok itetz, ja bin iban taneꞌn yi alijt cyen takꞌun Moisés yi ẍchakum Ryos. Nchaꞌtz ja cxoꞌcwok jakꞌ wetz incaꞌwl. 3 Ej, nin quinin nkeꞌl te icꞌuꞌl yi oꞌ ixonl, na atixeꞌt nin tan kuchꞌeyeꞌn. Nin tan tuꞌ yi yaꞌtz itaneꞌnwok na cxtzanwok tan banleꞌn taneꞌn yi caꞌwl Kataj Ryos. 4 Ma jaluꞌ, ja el cuꞌn Kataj te yi yol yi suknak. Ej, nin na katzatzin, na ja kacambaj yi ketz kaꞌamaꞌl. Tyoẍtuꞌ tzitetz tan kuchꞌeyeꞌn. Ma jaluꞌ, baꞌn bin cxaꞌjtwok le itetz i amaꞌl, yi at jalaj icyꞌen aꞌ Jordán, yi takꞌnak Moisés, yi ẍchakum Ryos tzitetz.a 5 Ntin na waj yil tzinnaꞌwsaj tzitetz, yi quil tzꞌel te icꞌuꞌl yi caꞌwl yi talnak Moisés sketz. Je yi caꞌwleꞌj: ‘Tajweꞌn tzilokꞌwok yi Kataj yi kaRyosil. Xomenwok te yi tetz tajbil. Banwok taneꞌn yi tetz caꞌwl, nin tajweꞌn xconwok tetz iꞌ tetz cuꞌn italmaꞌ, nin tetz cuꞌn ichamil,’ ” stzun Josué ban scyetz.6 Yi wiꞌt tlol Josué yi xtxolbileꞌj scyetz, nintzun takꞌ iꞌ banl squibaj. Ej nin eꞌ jatx quibtz. Nintzun eꞌ ajtz le cyetz chiꞌamaꞌl.
7 Na yi eꞌ xonl Manasés, cob eꞌ el. At jun kꞌuꞌj yi choꞌn tkꞌol Moisés yi cyetz chiluwar le amaꞌl cwent Basán. Ma yi junt kꞌuꞌj, choꞌn tkꞌol Josué chiꞌamaꞌl jalajicyꞌ tzaj yi aꞌ Jordán. Yi ntaxk chaꞌj, nintzun tal Josué scyetz yi bajx kꞌuꞌj yi at chiꞌamaꞌl jalaj cyꞌen yi aꞌ Jordán: 8 “Ma jaluꞌ, baꞌn cxaꞌj le itetz i amaꞌl. Baꞌn tzicyꞌajwok nin eꞌchk awun tu eꞌchk oro, tu sakal, tu brons, tu eꞌchk balaj chꞌichꞌ, tu balaj beꞌchok yi ja icambaj scyeꞌj eꞌ kacontr. Nin baꞌn tzitakꞌwok muꞌẍ scyetz eꞌ ixonl yi ateꞌ cyen,” stzun Josué bantz scyetz.
9 Yaꞌstzun bantz yi chijatxol quib yi eꞌ xonl Rubén, Gad tu yi jun kꞌuꞌj xonl Manasés, scyuchꞌ yi eꞌ mas chixonl yi ateꞌ le amaꞌl Siló cwent Canaán. Choꞌn cyajeꞌn Galaad, na yaꞌstzun cyetz chiꞌamaꞌl chi yi talnak Ryos tetz Moisés.
10 Itzun bantz, yi cyoponeꞌn yi eꞌ xonl Rubén, Gad tu Manasés stziꞌ aꞌ Jordán cwent Canaán, nintzun eꞌ oc tan banleꞌn jun kꞌajbil. 11 Toponeꞌn tzun stziblal ẍchiwiꞌ yi eꞌ mas xonl Israel, yi nsken bnix jun patbil txꞌixwatz cyakꞌun yi eꞌ xonl Rubén tu yi eꞌ xonl Gad tu yi jun kꞌuꞌj xonl Manasés tzi yi aꞌ Jordán cwent Canaán. 12 Yi quibital yi eꞌ xonl Israel yi xtxolbilaꞌtz, nintzun eꞌ mol quibtz le amaꞌl Siló, nintzun kloꞌ eꞌ bentz tan oyintziꞌ scyeꞌj. 13 Poro bajx tzun eꞌ beneꞌn cobox yajtz cyaꞌn, tan yol scyetz yi eꞌaꞌtz yi ateꞌ le amaꞌl Galaad yi at jalaj cyꞌen Jordán. 14 Beneꞌn tzun Finees yi cyꞌajl Eleazar yi paleꞌ, scyuchꞌ lajuj wiꞌ banl wiꞌ yi eꞌ xonl Israel. Jujun tzun wiꞌtz ajcaw bentz te yi jujun kꞌuꞌj eꞌ. 15 Yi cyoponeꞌn scyeꞌj yi eꞌ xonl Rubén, Gad, tu yi junt kꞌuꞌj xonl Manasés yi ateꞌ le amaꞌl Galaad, nintzun cyaltz:
16 —Eꞌuꞌ katanum yi eꞌuꞌ xonl Israel. Ja kuꞌl tan yol scyeruꞌ tan chibiꞌ yi eꞌ mas tanum Ryos. ¿Mbi tzun i ilaꞌtz yi xtxolbileꞌj yi na chitzanuꞌ tan banleꞌn? ¿Nkꞌeꞌtz peꞌ telseꞌn kꞌej yi kaRyosil na chibanuꞌ? ¿Nxac mmeꞌl chijatxol quibuꞌ te mero kaRyosil? ¿Mbi xac na chitzanuꞌ tan banleꞌn junt patbil chitxꞌixwatzuꞌ? Na tan yi xtxolbileꞌj na chitzanuꞌ tan telseꞌn kꞌej Ryos. 17 Quiꞌc pe chiwutzuꞌ teꞌj yi nimix cunin kil kajuch swutz Ryos. Nin tan yi eꞌchk kilaꞌtz nimix cunin kaxonl chiquim tan paj.b 18 Poro yi eꞌ cyeruꞌ na chitzanuꞌ tan pajleꞌn junt tir yi caꞌwl Ryos. Ej nin yi ko ja wiꞌt el chixajsal quibuꞌ te Ryos, tzꞌul kacaws kacyakil cuꞌn. 19 Ma jaluꞌ, yi ko wiꞌnin ilcꞌol tul yi amaꞌl kale nchoponeꞌtuꞌ, or bin chaꞌjkuꞌ tan najeweꞌn skaxoꞌl, kale atit yi caꞌl Ryos yi mantial tuꞌ. Mas balaj yil chaꞌjuꞌ, nin yil cyetzajuꞌ muꞌẍ cyeruꞌ te yi amaꞌl kale najlchoꞌt ketz. Na qui na kaj yil chipajuꞌ caꞌwl Ryos tan yi junt patbil chitxꞌixwatzuꞌ. Na ko yaꞌtz chibanuꞌ, sjalok ketz kil swutz Ryos, nin sjalok oyintziꞌ skaxoꞌl. Chaꞌstzun te qui na kaj yil chibanuꞌ junt patbil chitxꞌixwatzuꞌ, na at nin jun skaxoꞌl. 20 Ulk txꞌakx ẍchicꞌuꞌluꞌ yi ẍeꞌn cuꞌn banak Acán yi cyꞌajl Zera, yi juchul til swutz Ryos. Ja juch iꞌ til yi sajeꞌn tewal yi eꞌchk takleꞌn yi quiꞌc rmeril tan tetzal. Poro nkꞌeꞌtz ẍchuc Acán quim tan paj yi til. Ma na ja chiquim jun cꞌoloj,c cheꞌch tzun yi eꞌ chakumaꞌtz bantz.
21 Yi quibital yi eꞌ xonl Rubén, Gad tu yi jun kꞌuꞌj xonl Manasés yi yolaꞌseꞌj, nintzun cyaltz scyetz yi eꞌ wiꞌ banl wiꞌaꞌtz:
22 —Eꞌuꞌ kawiꞌ banl wiꞌ, sak swutz yi wiꞌtz Ryos, yi mas cham swutz alchok ryosil, yi qui na katzan tan banleꞌn junt patbil katxꞌixwatz tan telseꞌn kꞌej iꞌ, nka tan teleꞌn kajatxol kib teꞌj. Nchaꞌtz nkꞌeꞌtz tan kajatxol kib scyuchꞌuꞌ. Na yi yaꞌtzk, ja kloꞌ wiꞌt keꞌl cuꞌn swutz taꞌn. 23 Ej, nin jajk bnix kaꞌn tan pateꞌn katxꞌixwatz, nka tan koyil eꞌchk oy tetz Ryos, nka tan joyleꞌn kabalajil swutz iꞌ, Ryos tzꞌakꞌon kacaws. 24 Poro yi mero bintzi iꞌtz, yi ja bnix yi jun kꞌajbilaꞌtz kaꞌn tan naꞌwseꞌn scyetz yi eꞌ kanitxaꞌ tzantzaj. Na ko tzun lcyal yi eꞌ chinitxajiluꞌ scyetz yi eꞌ ketz kanitxaꞌ: “Yi axwok itetz, quiꞌc itocleꞌn te yi ketz Kataj yi kaRyosil yi oꞌ xonl Israel. 25 Na cyajnak cyen tkꞌol Ryos yi tzanlaꞌ Jordán tetz jatxbil kaxoꞌl tzituchꞌwok. Chaꞌstzun te quiꞌc itocleꞌn te Kataj.
”Ej, nin ko yaꞌtz chiban yi chinitxaꞌuꞌ scyeꞌj yi eꞌ ketz, tzꞌelepon tzun Kataj te chicꞌuꞌl yi eꞌ ketz kanitxaꞌ. 26 Chaꞌstzun te ja katxum tan banleꞌn yi jun kꞌajbilaꞌtz. Poro nkꞌeꞌtz tan pateꞌn jun katxꞌixwatz tibaj, nka tan toyeꞌn eꞌchk oy tetz Ryos. 27 Ma na ja bnix kaꞌn tetz tuꞌ jun techl skaxoꞌl scyuchꞌuꞌ, nin ẍchixoꞌl yi kaxonl tzantzaj. Ej, nin ja bnix kaꞌn tan qui cyalol yi chixonluꞌ tzantzaj, yi quiꞌc cyocleꞌn yi eꞌ ketz kaxonl te Kataj Ryos. Nchaꞌtz ja bnix kaꞌn tan ẍchajleꞌn yi nchaꞌtz oꞌ, baꞌn kopon ẍchixoꞌluꞌ tan takꞌleꞌn katxꞌixwatz tetz Ryos tan jaleꞌn cuybil kapaj. Ej, nin tan kabansal kib tuchꞌ iꞌ. 28 Ej, nin nchaꞌtz, ja bnix yi jun kꞌajbilaꞌtz kakꞌun, na ko tzun tzꞌaꞌlchij yi quiꞌc kocleꞌn ketz scyuchꞌ eꞌ kaxonl te Kataj, baꞌn tzun kaltz scyetz: ‘Chixmayninuꞌ yi jun kꞌajbileꞌj, yi bnixnak cyen cyakꞌun yi eꞌ kamam kateꞌ. Yaꞌstzun teblal yi jun patbil katxꞌixwatz yi at swutz Ryos kale atit yi tetz caꞌl. Nin nkꞌeꞌtz tetz patbil katxꞌixwatz yi bnixnak cyen cyakꞌun, ma na iꞌtz tan xconeꞌn tetz jun techl skaxoꞌl scyuchꞌuꞌ yi junit kaRyosil.’ 29 Ryos tzꞌakꞌon kacaws kol kapaj yi caꞌwl iꞌ, na qui na kaj yil kaban junt patbil katxꞌixwatz apart swutz yi jun yi at kale atit yi caꞌl iꞌ,” cheꞌch tzun yi eꞌ xonl Rubén tu Gad bantz.
30 Itzun yi quibital yi eꞌ bajxom scyetz yi eꞌ xonl Israel tu Finees yi paleꞌ, tu yi chibajxom yi jujun kꞌuꞌj xonl Israel yi mbi cuꞌn cyal yi xonl Rubén, Gad tu Manasés, nintzun eꞌ tzatzin teꞌj. 31 Itzun tal yi paleꞌ Finees yi cyꞌajl Eleazar:
—Ma jaluꞌ, na el katxum tetz yi baꞌn atit, nin xomij wiꞌ Ryos skeꞌj. Na qui na chitzanuꞌ tan telseꞌn kꞌej iꞌ. Ja bin kaclax tkꞌab yi kacaws yi ja kloꞌ takꞌ Ryos, yi jak chipajuꞌ caꞌwl iꞌ.
32 Yi wiꞌt bajeꞌn yi xtxolbileꞌj, nintzun eꞌ jatx quibtz. Nin eꞌ aj tzaj cyetz Finees scyuchꞌ yi eꞌ mas ajcaw le chiꞌamaꞌl kale ateꞌt yi eꞌ mas chixonl. Yi cyoponeꞌn, nintzun eꞌ oc tan xtxoleꞌn scyetz yi mbi cuꞌn cyal yi eꞌ xonl Rubén, Gad tu Manasés. 33 Yi quibital yi eꞌ mas, nintzun eꞌ tzatzintz teꞌj, nin eꞌ octz tan takꞌleꞌn chikꞌajsbil tetz Ryos. Nin jetzaꞌtz quiꞌt eꞌ oc tan oyintziꞌ, nin tan majleꞌn yi chiꞌamaꞌl yi eꞌ xonl Rubén, Gad tu Manasés.
34 Ma yi eꞌ xonl Rubén, Gad tu Manasés, nintzun oc yi biꞌ yi jun kꞌajbilaꞌtz cyaꞌn tetz Ed. Yi na elepont iꞌtz: “Jun techl tetz ketz yi Jehová iꞌ Kataj yi kaRyosil.”