Josué 21

Yi eꞌchk tnum yi akꞌlij scyetz yi eꞌ xonl Leví

1 Cyakil yi eꞌ ajcaw tetz yi jujun najal te yi xonl Leví, nin eꞌ mol quib tircuꞌn le amaꞌl Siló, yi at Canaán, tan yol tetz Eleazar yi paleꞌ, tu Josué, nin tan yol scyetz yi eꞌ ajcaw tetz yi jujun kꞌuꞌj xonl Israel. 2 Yi cyoponeꞌn, nintzun cyaltz: “Talnak Kataj tetz Moisés, yi tajweꞌn tan cyakꞌoluꞌ cobox tnum sketz tan kanajeweꞌn tul. Nin tajweꞌn tan cyakꞌoluꞌ kaꞌamaꞌl kalel chiwaneꞌt kawun.” 3 Cyakꞌol tzun yi eꞌ ajcawaꞌtz cobox tnum scyetz yi eꞌ xonl Leví tan chinajeweꞌn tul. Nchaꞌtz cyakꞌ eꞌchk amaꞌl scyetz kalel chiwaneꞌt eꞌ cyawun. Ja chiban taneꞌn quib yi talnak Kataj tentz.

4 Bajx eꞌ oc tan txꞌiluꞌn teꞌj tan jatxleꞌn chiluwar yi eꞌ kꞌuꞌj yi chixonl quib ẍchixoꞌl yi eꞌ xonl Leví. Nin yi toqueꞌn txꞌiluꞌn teꞌj, choꞌn tzun nojeꞌn cyen te yi jun kꞌuꞌj xonl Coat, yi eꞌ xonl Aarón yi paleꞌ. Oxlaj tnum chicambaj. Choꞌn at yi oxlaj tnumaꞌtz xoꞌlak chiꞌamaꞌl yi eꞌ xonl Judá tu yi eꞌ xonl Simeón, nin eꞌ xonl Benjamín. 5 Ma eꞌ mas xonl Coat, lajuj tnum eꞌ cambaj. Yi eꞌchk tnumaꞌtz choꞌn at tul chiꞌamaꞌl yi eꞌ xonl Efraín tu yi eꞌ xonl Dan, nin tul chiꞌamaꞌl jun kꞌuꞌj scyeri yi eꞌ xonl Manasés, yi cob elnakeꞌ. 6 Nchaꞌtz eꞌ ban yi eꞌ xonl Gersón yi bajx cyꞌajl Leví. Oxlaj tnum eꞌ cambaj. Yi eꞌchk tnumaꞌtz choꞌn at tulak chiꞌamaꞌl yi eꞌ xonl Isacar, tu Aser, tu Neftalí, nin yi jalajt kꞌuꞌj xonl Manasés, yi najlcheꞌ Basán. 7 Nchaꞌtz eꞌ ban yi jujun kꞌuꞌj aj Leví yi eꞌ xonl Merari. Coblaj tnum eꞌ cambaj. Yi eꞌchk tnumaꞌtz choꞌn at le chiꞌamaꞌl yi eꞌ xonl Rubén, tu Gad nin Zabulón.

8 Cyakꞌol tzun cyakil yi eꞌ xonl Israel yi eꞌchk tnumaꞌtz scyetz yi eꞌ xonl Leví tan chinajeweꞌn tul. Nchaꞌtz cyakꞌ chiꞌamaꞌl tetz pstorbil cyawun, quib yi talnak Kataj tetz Moisés. 9-10 Nin yi chibiꞌ yi eꞌchk tnum yi ncyakꞌ yi eꞌ xonl Judá scyuchꞌ yi eꞌ xonl Simeón scyetz yi eꞌ xonl Leví yi eꞌ xonl Coat, yi xonl Aarón, yi eꞌ camban yi bajx swertiꞌn, iꞌtz: 11 Bajx takꞌleꞌn yi tnum Quiriat-arba, nka Hebrón scyetz, yi at wiꞌwtz cwent Judá. Yaꞌstzun yi tnum kale eꞌ cawunakit yi eꞌ xonl Anac, yi jun yaj yi chin wutz tkan nin banak. Nchaꞌtz akꞌlij chiꞌamaꞌl tetz chipstorbil.

12 Poro yi mas amaꞌl tuml yi eꞌchk aldey yi at cwent Hebrón nsken akꞌlij tetz Caleb yi cyꞌajl Jefone. 13 Ej, nin yi tnum Hebrónaꞌtz, iꞌtz jun scyeri eꞌchk tnum kalel chicolwit quib yi eꞌ yi na quim junt cyuchꞌ cyaꞌn tan jun xubseꞌn yi na chiban.

Nchaꞌtz akꞌlij yi eꞌchk tnumeꞌj scyetz yi eꞌ mas xonl Aarón yi paleꞌ: 14 Libna, tu Jatir, tu Estemoa, 15 tu Holón, tu Debir, 16 tu Aín, tu Juta, nin Bet-semes. Solteꞌj yi beluj tnumaꞌtz, at len amaꞌl tetz pstorbil cyawun. 17 Ma yi eꞌ xonl Benjamín, cyakꞌ yi eꞌchk tnum Gabaón, tu Geba scyetz eꞌ xonl Levíjaꞌtz. 18 Nchaꞌtz cyakꞌ yi cobt tnum Anatot tu Almón scyetz. Yi cyaj tnumaꞌtz, at len eꞌchk amaꞌl tetz pstorbil solteꞌj. 19 Yaꞌstzun oxlaj tnumaꞌtz yi akꞌlij scyetz yi eꞌ xonl Aarón. Ej, nin te yi jujun tnum, at len cuꞌn pstorbil cyawun solteꞌj.

20 Ma yi eꞌ xonl Efraín, cyakꞌ coboxt tnum scyetz yi eꞌ mas xonl Leví yi eꞌ xonl Coat. 21 Akꞌlij yi tnum Siquem scyetz, yi choꞌn at wiꞌwtz Efraín. Ej, nin yi jun tnumaꞌtz Siquem, iꞌtz junt scyeri eꞌchk tnum kalel chicolwit quib yi eꞌ yi na quim jun cyuchꞌ cyaꞌn tan jun xubseꞌn yi na chiban. Nchaꞌtz akꞌlij yi tnum Gezer scyetz, 22 tu yi tnum Kibsaim, nin Bet-horón. Cyetzaj tzun yi cyaj tnumaꞌtz tuml yi eꞌchk pstorbil. 23 Ma yi eꞌ xonl Dan, cyakꞌ coboxt tnum scyetz. Iꞌtz yi eꞌchk tnum: Elteque tu Gibetón, Ajalón nin Gat-rimón. 24 Yaꞌstzun yi cyajt tnumaꞌtz tuml yi eꞌchk pstorbil yi akꞌlij scyetz cyakꞌun yi eꞌ xonl Dan. 25 Ma yi jun kꞌuꞌj scyeri yi eꞌ xonl Manasés yi cob elnakeꞌ, cyakꞌ cobt tnum tuml yi eꞌchk pstorbil scyetz yi eꞌ xonl Levíjaꞌtz. Iꞌtz yi tnum Taanac tu yi tnum Gat-rimón. 26 Yaꞌstzun lajuj tnumaꞌtz, tuml yi eꞌchk pstorbil yi akꞌlij scyetz yi eꞌ xonl Leví yi eꞌ xonl Coat.

27 Ma scyetz yi jujun kꞌuꞌj xonl Leví, yi eꞌ xonl Gersón, akꞌlij cob tnum scyetz, yi choꞌn at chicwent yi eꞌ xonl Manasés. Yi cob tnumaꞌtz iꞌtz: Beestera tu Golán, yi at cwent Basán. Yi tnum Golán iꞌtz jun scyeri eꞌchk tnum kalel chicolwit quib yi eꞌ yi na quim jun cyuchꞌ cyaꞌn tan jun xubseꞌn yi na chiban. Akꞌlij yi cob tnumaꞌtz scyetz tuml yi eꞌchk pstorbil. 28 Ma yi eꞌ xonl Isacar, cyakꞌ cyaj tnum scyetz. Iꞌtz yi tnum Cisón tu Daberat, 29 tu Jarmut, tu yi tnum En-ganim. Yaꞌstzun cyaj tnumaꞌtz tuml chipstorbil yi akꞌlij scyetz cyakꞌun yi eꞌ xonl Isacar. 30 Ma yi eꞌ xonl Aser, cyakꞌ cyaj tnum scyetz. Iꞌtz yi tnum Misael tu Abdón, 31 tu Helcat nin Rehob. Yaꞌstzun cyaj tnum, tuml yi eꞌchk pstorbil. 32 Ma yi eꞌ xonl Neftalí, cyakꞌ ox tnum tuml yi eꞌchk pstorbil scyetz. Iꞌtz yi tnum Cedes, yi at tzaj Galilea, jun scyeri eꞌchk tnum kalel chicolwit quib yi eꞌ yi na quim jun cyuchꞌ cyaꞌn tan jun xubseꞌn yi na chiban. Nchaꞌtz cyakꞌ Hamot-dor, tu yi tnum Cartán scyetz. 33 Yaꞌstzun yi oxlaj tnumaꞌtz yi akꞌlij scyetz yi eꞌ xonl Gersón, tuml yi eꞌchk amaꞌl tetz pstorbil.

34 Ma scyetz yi jujun kꞌuꞌj xonl Merari yi nchaꞌtz eꞌ xonl Leví, akꞌlij cyaj tnum scyetz tuml eꞌchk pstorbil cyakꞌun yi eꞌ xonl Zabulón. Yi eꞌchk tnumaꞌtz iꞌtz: Jocneam tu Carta, 35 tu Dimna, nin yi tnum Naalal. 36 Nchaꞌtz akꞌlij cyajt tnum tuml yi pstorbil yi at chicwent yi eꞌ xonl Rubén. Yi eꞌchk tnumaꞌtz iꞌtz: Beser tu Jahaza, 37 tu Cademot, nin yi tnum Mefaat. Yaꞌstzun yi cyaj tnum yi akꞌlij scyetz. 38 Nchaꞌtz akꞌlij cyajt tnum yi at chicwent yi eꞌ xonl Gad. Yi eꞌchk tnumaꞌtz iꞌtz: Ramot, yi at cwent Galaad, nin yi na xcon tetz colbil ib, tu yi tnum Mahanaim, 39 tu Hesbón, nin yi tnum Jazer. Yaꞌstzun yi cyajt tnumaꞌtz yi akꞌlij scyetz tuml yi eꞌchk pstorbil. 40 Coblaj tzun tnum akꞌlij scyetz yi eꞌ xonl Merari. Yaꞌstzun yi eꞌ xonl Leví yi wiꞌtzbil tlen teleꞌn yi cyetz chiꞌamaꞌl.

41 Yi tajlal tnum yi cyetzaj yi eꞌ xonl Leví ẍchixoꞌl cyakil yi mas xonl Israel iꞌtz caꞌwunak wajxak tnum. Cyakil yi eꞌchk tnumaꞌtz at len cuꞌn pstorbil cyawun solteꞌj. 42 Apartchk len atit yi jujun tnum. Nin at len amaꞌl tetz pstorbil teꞌj.

43 Yaꞌstzun bantz, yi tkꞌol Kataj Ryos cyakil yi eꞌchk amaꞌl scyetz yi eꞌ xonl Israel. Nin yi amaꞌlaꞌtz, yaꞌstzun yi sukiꞌnt taꞌn scyetz yi eꞌ chimam chiteꞌ. Cyetzaj yi eꞌchk amaꞌlaꞌtz, nin eꞌ najeꞌ swutz.

44 El cuꞌn tzun Kataj Ryos te yi yol yi sukiꞌnt taꞌn, nin jal tzatzin paz ẍchixoꞌl. Ma yi chicontr, quinin eꞌ nimsaj chicꞌuꞌl tan oyintziꞌ scyeꞌj, na Kataj Ryos oc tan quichꞌeyeꞌn tan chixcyeweꞌn scyeꞌj. 45 Quiꞌc nin jun yol yi alijt cyen tan Kataj Ryos yi quiꞌk el cuꞌn teꞌj. Ma na el cuꞌn teꞌj quib yi sukiꞌnt taꞌn scyetz yi eꞌ xonl Israel.