20
1 Ej, itzun bantz, nin jilont Kataj tetz Josué. Itzun taltz: 2 “Alaj scyetz cyakil yi eꞌ atanum tan bixeweꞌn cobox tnum, kalel colwit tib jun yaj kol xubsij tan biyleꞌn cuꞌn jun tuchꞌ, chi yi walnak tetz Moisés.a 3 Na ko nkꞌeraꞌtz tajbil jun yaj yil sbiy cuꞌn junt tuchꞌ, baꞌn tzun lbentz tan colol tib tul yi eꞌchk tnumaꞌtz tan qui quimeꞌn tan yi eꞌ xonl yi almaꞌ. 4 Yi ko at jun lben tan colol tib tul jun scyeri yi tnumaꞌtz, tajweꞌn yil tzꞌopon stzi puertil yi tnum tan jakleꞌn permis scyetz yi eꞌ wiꞌ banl wiꞌ. Tajweꞌn xtxol iꞌ scyetz yi ẍeꞌn cunin mban yi til. Kalenaꞌs tzun tzꞌakꞌlij amaꞌltz tetz tan najeweꞌn tul yi tnumaꞌtz. 5 Yi kol tzꞌopon jun mero xonl kꞌajtzun almaꞌ tan joyleꞌn yi jun yajaꞌtz yi nxubsij, quiꞌc cuj tan cyakꞌol yi eꞌ wiꞌ banl wiꞌ amaꞌl tetz tan toqueꞌn tan biyleꞌn. Na nkꞌeraꞌtz tajbil yi ncuꞌ biyol yi tuchꞌ. Nin nkꞌeꞌtz ik tan paj yi at ẍchiꞌchbeꞌn cꞌuꞌl teꞌj.6 ”Poro yi junaꞌtz yi mbiyon cuꞌn yi tuchꞌ, tajweꞌn tan cyajeꞌn cyen tnum jalen cuꞌn yil tzꞌoc maꞌleꞌn yi til. Nin kol lajluchax yi quiꞌc til, tajweꞌn tan cyajeꞌn cyen le tnumaꞌtz jalen cuꞌn lquim yi wiꞌtz paleꞌ yi na akꞌuj te yi tiempaꞌtz, yi bnixeꞌn yi il. Baꞌn tzun tzꞌajtzajtz le tetz amaꞌl,” stzun Kataj bantz.
7 Cyoqueꞌn tzun yi eꞌ xonl Israel tan sicyꞌleꞌn yi cobox tnumaꞌtz. Nin je biꞌ yi eꞌchk tnum yi jeꞌ chisicyꞌol: Yi tnum Cedes cwent Galilea, yi at wiꞌwtz Neftalí. Nchaꞌtz jeꞌ chisicyꞌol Siquem, wi juꞌwtz cwent Efraín. Nchaꞌtz je chisicyꞌol Quiriat-arba, yi nchaꞌtz Hebrón biꞌ, yi at wiꞌwtz Judá. 8 Nchaꞌtz jeꞌ chisicyꞌol yi tnum Beser, yi at chicwent yi eꞌ xonl Rubén, yi choꞌn at jalaj cyꞌen yi aꞌ Jordán, kale atit yi ẍkꞌajlaj yi at le amaꞌl tzꞌinunin tuꞌ. Nchaꞌtz jeꞌ chisicyꞌol yi tnum Ramot, yi at chicwent yi eꞌ xonl Gad. Nchaꞌtz yi tnum Golán, yi at cwent Basán, kale najlcheꞌt yi eꞌ xonl Manasés.
9 Yaꞌstzun yi eꞌchk tnum yi jeꞌ chisicyꞌol tan xconeꞌn cyakꞌun yi eꞌ xonl Israel, nin scyetz yi eꞌ yi nkꞌeꞌtz eꞌ xonl Israel yi najlcheꞌ ẍchixoꞌl. Choꞌn ẍchicoleꞌ quib yi eꞌ yi nkꞌeraꞌtz cyajbil yi ncuꞌ chibiyol jun cyuchꞌ, bantz qui chiquimeꞌn tan jun xonl yi almaꞌ. Ẍchicyajk tcꞌuꞌl yi jun tnumaꞌtz jalen yil tzꞌoc maꞌleꞌn yi quil.