JUECES
Yi xtxꞌamxeꞌn Adonisedec cyakꞌun yi eꞌ xonl Judá tu yi eꞌ xonl Simeón
1
1 I tzun bantz yi nsken wiꞌt quim Josué, nintzun chijak yi eꞌ xonl Israel tetz Kataj, yi naꞌ scyetz jun kꞌuꞌj ẍchixoꞌl yi baꞌn ben tan oyintziꞌ scyeꞌj yi eꞌ cananeo. 2 Itzun tal Katajtz: “Baꞌn chiben yi eꞌ xonl Judá bajx tan oyintziꞌ, nin yi amaꞌl chicontraꞌtz cyetz sbneꞌ,” stzun iꞌ bantz. 3 Ej, nintzun eꞌ ben yi eꞌ xonl Judá tan yol scyetz yi eꞌ xonl Simeón. Ej nin eꞌ octz tan chimoxeꞌn tan chichꞌeyeꞌn tan oyintziꞌ, bantz chicambal yi amaꞌl yi nsken wiꞌt suk Kataj scyetz. Ja chisuk yi iteꞌn nin ichꞌeyeꞌnaꞌtz ẍchibneꞌ cyetz, yil chiben yi eꞌ aj Simeón tan oyintziꞌ tan chicambal yi amaꞌl yi jatxijt scyetz. Eꞌ cujij yi eꞌ xonl Simeón yi ajtzaꞌklaꞌtz, nin eꞌ xomnintz scyeꞌj. 4-5 Tan yi xtxolbilaꞌtz, eꞌ xcyeꞌ yi eꞌ xonl Judá tan cambajeꞌn yi chiꞌamaꞌl yi eꞌ cananeo, tuml yi chiꞌamaꞌl yi eꞌ ferezeo, na yi amaꞌlaꞌtz nsken wiꞌt suk Ryos scyetz. Ej nin le amaꞌl yi na biꞌaj Bezec eꞌ xcyeꞌ yi eꞌ xonl Judá tuml yi eꞌ xonl Simeón scyeꞌj lajuj mil chicontr. Choꞌn tzun xomij jun yaj ẍchixoꞌl yi jun cꞌoloj chicontraꞌtz yi na biꞌaj Adonisedec. 6 Poro qui nin txꞌamxijtz cyaꞌn, na nin el ojkuj ẍchiwutz. Nintzun eꞌ xomnintz wutz coc tan stzꞌamleꞌn. Ma yi xtxꞌamxeꞌntz cyaꞌn, nintzun el chicꞌuplul yi cabil mamil wiꞌ kꞌab, tuml yi cabil mamil wiꞌ tkan yi Adonisedecaꞌtz. 7 Talol tzun Adonisedec “Yi in wetz elnak incꞌuplul yi mamil wiꞌ chikꞌab ox cꞌal tu lajuj wiꞌtz rey. Nchaꞌtz elnak incꞌuplul yi mamil wiꞌ chikan. Ej nin ntin ja wakꞌ amaꞌl scyetz tan cyoqueꞌn tan sicyꞌleꞌn inwaꞌbeꞌn tzakꞌ inmes tetz chiwaꞌ. Poro yi jaluꞌ, ja takꞌ Ryos incaws na iteꞌn nin nchintulejaꞌtz chi ncheꞌ wulej yi eꞌ reyaꞌtz,” stzun Adonisedec bantz.Beneꞌn tzun ticyꞌleꞌntz le tnum Jerusalén kale quimeꞌt.
Yi chicambal yi eꞌ xonl Judá yi tnum Hebrón tu Jerusalén
8 Itzun bantz nintzun eꞌ ben yi eꞌ xonl Judá tan oyintziꞌ Jerusalén. Tircunin tzun yi eꞌ wunak yi najlcheꞌ-tz eꞌ quim cyakꞌun tan spar. Kalenaꞌs tzun oc chitꞌinol kꞌaꞌkl yi tnum. 9 Ma yi wiꞌt bajeꞌn yi xtxolbilaꞌtz, nintzun eꞌ bentz tan oyintziꞌ scyeꞌj yi eꞌ cananeo yi najlcheꞌ wiꞌwtz, nin lakak juꞌwutz tu yi amaꞌl cwent Néguev. 10 Nchaꞌtz eꞌ oc tan oyintziꞌ scyuchꞌ yi eꞌ cananeo yi najlcheꞌ le tnum Hebrón yi tenẍchan na biꞌaj Quiriat-arba, nin eꞌ xcyeꞌ scyeꞌj. Nchaꞌtz eꞌ xcyeꞌ scyeꞌj yi eꞌ xonl Sesai tu eꞌ xonl Ahimán, scyuchꞌ yi eꞌ xonl Talmai.
Yi tkꞌol Caleb yi meꞌl tan toqueꞌn tetz txkel Otoniel
11 Itzun bantz nintzun eꞌ ben Otoniel tan oyintziꞌ le tnum yi na biꞌaj Debir, nin yi biꞌ yi jun tnumaꞌtz tenẍchan iꞌtz Quiriat-sefer. 12 At tzun jun yol yi suk Caleb: “Alchok scyetz yil xcyeꞌ tan cambajeꞌn yi tnum Debir, list wutaneꞌn tan takꞌleꞌn yi inmeꞌl yi na biꞌaj Acsa, tan toqueꞌn tetz txkel yi junaꞌtz,” stzun iꞌ bantz. 13 Ej, Otoniel tzun xcyeꞌ-tz tan cambajeꞌn yi tnum. Yi Otoniel yaꞌstzun cyꞌajl Cenaz, nin yi Cenaz yaꞌstzun titzꞌun Caleb. Nin quib yi suknak Caleb, yaꞌtz nintzun tulejtz. Nintzun cyokꞌbej quib Acsa tu Otoniel, na nin xcyeꞌ iꞌ tan cambajeꞌn yi tnum. 14 Nin te yi nsken wiꞌt cyokꞌbej quib, nintzun oc Otoniel tan tocseꞌn cꞌuꞌl Acsa tan jakol junt piẍ txꞌotxꞌ tetz yi taj. Beneꞌn tzun iꞌ swutz yi taj tan jakleꞌn yi txꞌotxꞌaꞌtz tetz. Yi cweꞌn tzaj tzun Acsa tibaj yi buruꞌ, nintzun bentz swutz yi taj. Beneꞌn tzun jakol yi taj tetz:
—Aẍ jun cꞌoloj inmeꞌl, ¿mbiꞌtz na icyꞌ tacꞌuꞌl?
15 —Taꞌ, na kloꞌ waj tzinjak jun pawor teruꞌ, chij. Ja wiꞌt takꞌuꞌ katxꞌotxꞌ le amaꞌl tzꞌinunin tuꞌ, cwent Néguev. Ma jaluꞌ na kloꞌ waj yil takꞌuꞌ muꞌẍt kaꞌamaꞌl kale na itzꞌeꞌt aꞌ, stzun iꞌ.
Tkꞌol tzun Caleb yi eꞌchk amaꞌl scyetz, kale na itzꞌeꞌt eꞌchk aꞌ yi choꞌn at wiꞌwtz, nin nchaꞌtz yi at ẍkꞌajlaj.
Yi eꞌchk amaꞌl yi chicambaj yi eꞌ xonl Judá scyuchꞌ yi eꞌ xonl Benjamín
16 Ej itzun yi eꞌ xonl Hobab, yi quenita, yi jiꞌ Moisés nintzun eꞌ el tzajtz scyuchꞌ yi eꞌ xonl Judá, le yi tnum yi na biꞌaj Las Palmeras. Choꞌn tzun eꞌ beneꞌntz le amaꞌl yi tzꞌinunin tuꞌ cwent Judá, yi choꞌn at cweꞌn tziꞌn yi amaꞌl yi na biꞌaj Arad. Ej nin choꞌn tzun cyaꞌteꞌntz ẍchixoꞌl yi eꞌ wunakaꞌtz yi najlcheꞌ-tz. 17 Ej itzun bantz, nintzun eꞌ ben yi eꞌ xonl Judá scyuchꞌ yi eꞌ xonl Simeón tan oyintziꞌ, na nsken wiꞌt oc chiyol teꞌj. Eꞌ bentz tan chisotzajeꞌn cuꞌn yi eꞌ aj Canaán yi najlcheꞌ le amaꞌl yi na biꞌaj Sefat. Nin tircuꞌn teleꞌn cuꞌn yi jun tnumaꞌtz swutz. Chaꞌstzun te toqueꞌn quen yi biꞌ cyaꞌn tetz Horma. 18 Poro qui nin eꞌ xcyeꞌ tan cambajeꞌn yi eꞌchk amaꞌl yi na chibiꞌaj: Gaza, Ascalón nin Ecrón. Nchaꞌtz qui nin eꞌ xcyeꞌ tan cambajeꞌn yi eꞌchk tal tnum yi ateꞌ-tz nakaꞌj. 19 Ilenin ja xom Kataj Ryos scyeꞌj yi eꞌ xonl Judá nin ja chixcyeꞌ tan cambajeꞌn yi eꞌchk amaꞌl jeꞌn tziꞌn wiꞌwtz. Poro qui nin eꞌ xcyeꞌ tan chilajeꞌn len yi eꞌ wunak yi ateꞌ cweꞌn tziꞌn lakak eꞌchk ẍkꞌajlaj, na yi eꞌ wunakaꞌtz at chicareꞌt tetz oyintziꞌ, yi chꞌichꞌ cuꞌn, yi kinij tan chej. Chaꞌstzun te qui nin eꞌ xcyeꞌ cyen yi eꞌ xonl Judá scyeꞌj. 20 Ej ninstzun akꞌlij yi amaꞌl yi na biꞌaj Hebrón tetz Caleb, quib yi suknak Moisés tetz. Xcyeꞌ tzun iꞌ tan chilajeꞌn len yi eꞌ chixonl yi ox cyꞌajl Anac yi najlcheꞌ-tz. 21 Ma yi eꞌ xonl Benjamín qui nin eꞌ xcyeꞌ cyetz tan chilajeꞌn len yi eꞌ jebuseo yi najlcheꞌ-tz Jerusalén. Chaꞌstzun te jaluꞌ, iẍnin najlcheꞌt yi eꞌ jebuseo ẍchixoꞌl yi eꞌ xonl kꞌajtzun Benjamín le tnum Jerusalén.
Yi chicambal yi eꞌ xonl Ẍep yi tnum Betel
22-23 Itzun bantz, nintzun oc chitxumuꞌn yi cob kꞌuꞌj xonl Ẍep tan oyintziꞌ, bantz chicambal yi tnum Betel. Yi biꞌ yi jun tnumaꞌtz tenẍchan iꞌtz Luz. Nintzun ben chichakol cobox xkꞌukwil le yi tnumaꞌtz. Nin xom Kataj Ryos tan quichꞌeyeꞌn. 24 Nintzun ben quilol yi eꞌ xkꞌukwilaꞌtz jun yaj yi teleꞌn tzaj le tnum. Itzun cyaltz tetz: “Yi kol ẍchajuꞌ puntil sketz yi ẍeꞌn tan kocomponeꞌn le tnum, quil loꞌonuꞌ kꞌan”. 25 Nintzun bajxij yi jun yajaꞌtz ẍchiwutz. Nin ẍchaj yi beꞌ-tz scyetz. Ma yi cyocomponeꞌn cyakil yi eꞌ xonl Ẍepaꞌtz nintzun cuꞌ chibiyol tan spar cyakil yi eꞌ wunak yi najlcheꞌ-tz. Poro qui cuꞌ chibiyol yi jun tal yaj tuml yi najal, yi chajon yi beꞌ scyetz yi eꞌ xkꞌukwil. 26 Ma yi bajijeꞌn tircuꞌn yi xtxolbilaꞌtz, nintzun ben yi yaj tan najaneꞌn ẍchixoꞌl yi eꞌ hitita. Nintzun cuꞌ xeꞌtzbil junt acꞌaj tnum taꞌn. Nin oc tkꞌol biꞌ yi jun tnumaꞌtz tetz Luz. Nin iteꞌn nin biꞌ yi jun tnumaꞌtz jaluꞌ.
Yi eꞌ wunak yi qui nin eꞌ xcyeꞌ yi eꞌ xonl Manasés, scyuchꞌ yi eꞌ xonl Efraín tan chilajeꞌn len
27 Qui nin tzun eꞌ xcyeꞌ yi eꞌ xonl kꞌajtzun Manasés tan chilajeꞌn len yi eꞌ wunak yi najlcheꞌ lakak eꞌchk amaꞌl yi na chibiꞌaj: Bet-seán, Taanac, Dor, Ibleam nin Meguido. Nchaꞌtz, qui nin eꞌ xcyeꞌ-tz scyeꞌjak eꞌchk tal neꞌẍ tnum yi ateꞌ nintz nakaꞌj. Chaꞌstzun te qui nin eꞌ el yi eꞌ cananeo-aꞌtz ẍchixoꞌl. 28 Ma yi chipucꞌuneꞌn yi eꞌ xonl Israel, nintzun eꞌ xcyeꞌ tan cyocseꞌn yi eꞌ cananeo jakꞌ chicaꞌwl, ninin eꞌ oc tan chibuchleꞌn tan eꞌchk quiw akꞌun. Poro qui nin eꞌ xcyeꞌ tan chilajeꞌn len yi eꞌ cananeo-aꞌtz ẍchixoꞌl.
29 Nchaꞌtz eꞌ ban yi eꞌ xonl kꞌajtzun Efraín, qui nin eꞌ xcyeꞌ tan chilajeꞌn len yi eꞌ cananeo le amaꞌl yi na biꞌaj Gezer. Chaꞌstzun te, eꞌ cyajeꞌn cyen yi eꞌ cananeo tan najeweꞌn ẍchixoꞌl.
Yi eꞌchk amaꞌl yi baj chicambal yi eꞌ mas kꞌuꞌj xonl Israel
30 Iteꞌn nin tzun xtxolbilaꞌtz bajijtz scyeꞌj yi eꞌ xonl kꞌajtzun Zabulón, qui nin eꞌ xcyeꞌ tan chilajeꞌn len yi eꞌ cananeo yi najlcheꞌ lakak eꞌchk amaꞌl cwent Quitrón, nin cwent Naabal. Chaꞌstzun te ilenin eꞌ aꞌtij ẍchixoꞌl. Poro akꞌlij eꞌchk quiw akꞌun scyetz.
31-32 Nchaꞌtz eꞌ ban yi eꞌ xonl kꞌajtzun Azer, qui nin eꞌ xcyeꞌ-tz tan chilajeꞌn len yi eꞌ cananeo swutzak eꞌchk amaꞌl yi na chibiꞌaj: Aco, Sidón, Ahlab, Aczib, Helba, Afec nin Rehob. Nin tampaj yi qui nin eꞌ xcyeꞌ tan chilajeꞌn len chaꞌstzun te eꞌ cyajeꞌn cyentz tan najeweꞌn ẍchixoꞌl.
33 Ej nin chaꞌtz nin bajijtz scyeꞌj yi eꞌ xonl kꞌajtzun Neftalí. Qui nin eꞌ xcyeꞌ-tz tan chilajeꞌn len yi eꞌ cananeo lakak eꞌchk amaꞌl cwent Bet-semes nin cwent Bet-anat. Cyoqueꞌn tzun yi eꞌ xonl Neftalí, tan chibuchleꞌn tan eꞌchk quiw akꞌun, poro qui nin eꞌ el ojkuj yi eꞌ cananeo, ma na taꞌsteꞌnin eꞌ cyajeꞌn cyentz tan chinajeweꞌn ẍchixoꞌl.
34 Ma yi eꞌ amorreo, eꞌ xcyeꞌ tan chipitleꞌn yi eꞌ xonl Dan jalen wiꞌwtz. Nin qui nin cyakꞌ amaꞌl scyetz tan chicweꞌn muleꞌn le cuꞌnak tzaj tulak eꞌchk ẍkꞌajlaj. 35 Nin tan yi xtxolbilaꞌtz nin eꞌ aꞌtij yi eꞌ amorreo lakak eꞌchk amaꞌl yi na chibiꞌaj: Heres, Ajalón nin Saalbim. Poro yi teleꞌn tiemp, nin eꞌ quiwix yi eꞌ xonl kꞌajtzun Ẍep, nin yi chiquiwixeꞌn nin eꞌ oc tan chibuchleꞌn yi eꞌ amorreo, tan eꞌchk quiw akꞌun.
36 Ma yi mojomil chiꞌamaꞌl yi eꞌ edomita choꞌn tzun na icyꞌ cuꞌntz kale na xeꞌteꞌt yi jeꞌnak yi na jepon Acrabim jalen te yi tnum yi na biꞌaj Sela, nin xom nin tuꞌstz lejeꞌnak tziꞌn.