Yi tponen yi ángel yi kꞌajbil Kataj Ryos Boquim
2
1 Ej itzun bantz nintzun el yi ángel yi kꞌajbil Kataj Ryos le tnum Gilgal nin choꞌn tzun jeꞌn poneꞌntz le tnum Boquim. Itzun taltz scyetz yi eꞌ aj Israel: “I inaꞌtz yi ncxeꞌlsan tzaj wok Egipto, nin ja cxuꞌl incyꞌal tzoneꞌj le amaꞌleꞌj yi sukiꞌnt waꞌn scyetz yi eꞌ imam iteꞌ tentz. Ej nin nchaꞌtz walnak scyetz: Nelpon cuꞌn te inyol yi sukiꞌnt waꞌn tul yi katrat yi bnixnakt waꞌn tzituchꞌ, chinch ban scyetz. 2 Chaꞌstzun te qui tziban jun trat scyuchꞌ yi eꞌ wunak yi najlcheꞌ lakak eꞌchk amaꞌl kalel cxoponeꞌt, ma na tajweꞌn tan itoqueꞌn tan xiteꞌn cuꞌn yi eꞌchk patbil chitxꞌixwatz. Poro lastum, na qui nin ncxoꞌc cꞌulutxum jakꞌ incaꞌwl. ¡Na apart yi eꞌchk takleꞌn yi mbaj ibnol! 3 Chaꞌstzun te jaluꞌ, swaleꞌ nin tzitetz: Quil noꞌc tan chilajeꞌn len yi eꞌ wunak tziwutz. Na eꞌ teꞌn tuml chiryosil chocopon tetz jun tramp tan subleꞌn itajtzaꞌkl.”4 Ej itzun yi stzajeꞌn wiꞌ yol yi ángelaꞌtz, tircunin tzun yi eꞌ xonl Israel eꞌ okꞌ cuꞌntz, nin wiꞌnin chibisuneꞌn. 5 Nin tan yi jun xtxolbilaꞌtz yi bajij, nintzun oc biꞌ yi amaꞌlaꞌtz cyaꞌn tetz Boquim. Nin taꞌsteꞌn nin tzun eꞌ oqueꞌt-tz tan toyeꞌn chitxꞌixwatz tetz Kataj Jehová.
Yi quimeꞌn Josué (Jos 24:29-31)
6 Itzun bajijtz, yi cweꞌn chijatxol quib Josué scyuchꞌ yi eꞌ xonl Israel, ẍchijunal len cuꞌn tzun eꞌ ajtz swutzak chitxꞌotxꞌ yi nsken wiꞌt oc chibiꞌ teꞌj. 7 Te yi at tzaj Josué ẍchixoꞌl yi eꞌ xonl Israel, ja tzun chiban taneꞌn chimunl swutz Kataj Ryos. Nchaꞌtz te yi ateꞌ tzaj yi eꞌ wiꞌ banl wiꞌ, yi eꞌ xom te Josué tan cawuꞌn, yi quilnak yi mbi cunin ban Kataj Ryos tan quichꞌeyeꞌn, tircuꞌn yi eꞌ wunak tetz Israel, ja chiban taneꞌn chimunl swutz Kataj. 8 Nsken tzun wiꞌt tzꞌak jun cient tu lajuj yobtz tan Josué yi quimeꞌn. 9 Choꞌn tzun mukxeꞌn le tetz xtxꞌotxꞌ, le tnum yi na biꞌaj Timnat-sera, yi choꞌn at wiꞌwtzeꞌn, tibaj yi tnum Gaas, cwent yi amaꞌl tetz Efraín. 10 Yi xoneꞌn tiemp, quimeꞌn nintzun eꞌ ban yi eꞌ yi eꞌ aꞌtij te Josué nin yi quilnak yi mbi cunin ban Kataj Ryos tan quichꞌeyeꞌn. Itzun chipucꞌuneꞌn yi eꞌ chinitxaꞌ, cyaꞌl jun scyetz jak el xtxum tetz Kataj Ryos. Nin qui nin quibit yi eꞌchk chꞌeyaꞌn yi banak iꞌ scyeꞌj chimam chiteꞌ.
Yi teleꞌn Kataj Ryos te chicꞌuꞌl yi eꞌ aj Israel
11 Ej itzun bantz, yi teleꞌn tiemp, chin juntlen nin ban cyajtzaꞌkl yi eꞌ aj Israeltz swutz Kataj Ryos, na nin eꞌ oc tan cꞌuꞌlajeꞌn jun ryos yi quin tech nin jilwutz teblal at, yi na biꞌaj Baal. 12 Nintzun el Kataj Ryostz teꞌj chicꞌuꞌl, yi jun Ryos yi oc tan cyelseneꞌl tzaj chimam chiteꞌ jakꞌ chicaꞌwl eꞌ aj Egipto, nin yi wiꞌnin chꞌeyaꞌn banak scyeꞌj. Ma yi eꞌ cyetz nin eꞌ oc tan chicꞌuꞌlajeꞌn chiryosil yi eꞌ wunak yi najlcheꞌ ẍchixoꞌl. Ej nin tan yi xtxolbilaꞌtz ẍchiꞌcheꞌn cꞌuꞌl Kataj Ryos scyeꞌj. 13 Nin cyaj cyen quilol Kataj Ryos, na nin eꞌ oc tan cꞌuꞌlajeꞌn Baal, tu eꞌchk teblal junt ryos yi na biꞌaj Astarté. 14 Chaꞌstzun te ẍchiꞌcheꞌn cꞌuꞌl Kataj Ryostz scyeꞌj, nintzun takꞌ iꞌ amaꞌltz scyetz yi eꞌ alkꞌom tan cyoqueꞌn tan talkꞌeꞌn len cyakil yi eꞌchk chitakleꞌn. Nchaꞌtz takꞌ Kataj amaꞌl scyetz chicontr tan chitxꞌaconeꞌn scyeꞌj. 15 Cyakil nintzun tir yi na chiben tan oyintziꞌ scyeꞌj chicontr, quiꞌt tzun takꞌ Kataj Ryos amaꞌltz scyetz tan chitxꞌaconeꞌn, na nsken wiꞌt tal iꞌ scyetz yi mbi cunin sbajok scyeꞌj.
Poro te tircuꞌn yi eꞌchk xtxolbilaꞌtz, 16 ilenin ja takꞌ Kataj amaꞌl tan jaleꞌn jun ajcaw ẍchixoꞌl tan quichꞌeyeꞌn ẍchikꞌab yi eꞌ alkꞌom. 17 Poro qui nin eꞌ oc yi eꞌ xonl Israel cꞌulutxum jakꞌ chicaꞌwl yi eꞌ ajcawaꞌtz, na qui nin kꞌukeꞌ chicꞌuꞌl te Kataj Ryos. Ma na nin eꞌ oc tan chicꞌuꞌlajeꞌn eꞌchk ryos. Wech yi eꞌ chimam chiteꞌ, ilenin ja chiban taneꞌn yi caꞌwl Kataj Ryos. Ma tzun yi eꞌ cyetz, chin pajol caꞌwl nin eꞌ ban, na qui nin eꞌ xom te cyajtzaꞌkl yi eꞌ chimam chiteꞌ. 18 Cyakil tir yi ntakꞌ Kataj amaꞌl tan jaleꞌn jun pujul xtisyaꞌ ẍchixoꞌl, ilenin ja oc iꞌ tan quichꞌeyeꞌn yi eꞌ pujul xtisyaꞌaꞌtz tan chicolcheꞌn yi eꞌ tetz tanum ẍchikꞌab chicontr, na nin el kꞌajab Kataj scyeꞌj yi ntbit yi toꞌkl chicꞌuꞌl tan paj yi buchbeꞌn cyetz. 19 Ma yi na chiquim yi eꞌ pujul xtisyaꞌaꞌtz, nintzun na choꞌct junt tir tan banleꞌn eꞌchk takleꞌn ploj swutz Kataj. Nin nimteꞌn cuꞌn yi il yi na chijuch swutz yi il yi chijuchnak yi chitaj chitxuꞌ, na nin eꞌ oc tan banleꞌn chimunl nin tan chicꞌuꞌlajeꞌn eꞌchk ryos yi banijt cuntuꞌ. Qui nin na el cyen yi eꞌchk yab ajtzaꞌklaꞌtz te chicꞌuꞌl, na chin chꞌinchꞌuj nin tunin eꞌ tan banleꞌn yi cyajtzaꞌklaꞌtz yi chin juntlen nin swutz Kataj Ryos. 20 Chaꞌstzun te ẍchiꞌcheꞌn cꞌuꞌl Kataj scyeꞌj yi eꞌ xonl Israel, itzun taltz: “Yi eꞌ wunakeꞌj, na chitzan tan xiteꞌn yi trat yi bnixnak waꞌn scyuchꞌ chimam chiteꞌ, na qui na cyaj choꞌc cꞌulutxum jakꞌ incaꞌwl. 21 Ej nin tan paj yi yaꞌtz quitaneꞌn quil noꞌc tan chilajeꞌn len yi eꞌ wunak yi eꞌ cyaj cyentz, yi qui nin oc Josué tan chilajeꞌn len te ntaxk quim iꞌ,” stzun Ryos bantz. 22 Yi tajbil Kataj Ryos yi bnol yi xtxolbileꞌj iꞌtz, tan chipileꞌn ko ẍchixomok te tetz tajbil chi eꞌ banakeꞌ yi chimam chiteꞌ. 23 Chaꞌstzun te qui nin eꞌ el lajul Ryos yi eꞌ wunak yi najlcheꞌ-tz tulak yi eꞌchk tnumaꞌtz, yi qui nin cyakꞌ quib tetz Josué, ma na nin takꞌ iꞌ amaꞌl scyetz tan chinajeweꞌn cyen ẍchixoꞌl yi eꞌ xonl Israel.