Jueces 3

Yi eꞌ jilwutz wunak yi eꞌ najeꞌ cyen Canaán

1 Je tzun chibiꞌ yi eꞌchk tnumeꞌj yi takꞌ Kataj amaꞌl scyetz tan chicyajeꞌn cyen Canaán tan chipileꞌn yi eꞌ xonl Israel, yi eꞌ yi ntaxk chitzꞌij yi bajeꞌn yi eꞌchk oyintziꞌ tan cambajeꞌn yi amaꞌl cwent Canaán. 2 Nintzun takꞌ Kataj amaꞌltz scyetz yi eꞌ wunakaꞌtz tan chicyajeꞌn cyen, tan taꞌweꞌn oyintziꞌ cyakꞌun yi eꞌ xonl Israel, na quiꞌc cunin jun tir jajk chiben tan oyintziꞌ. 3 Eꞌ cyaj cyen tzun yi oꞌ cyajcawil yi eꞌ filistey, nin tircuꞌn yi eꞌ cananeo, scyuchꞌ yi eꞌ aj Sidón, scyuchꞌ yi eꞌ heveo yi choꞌn najlcheꞌ wiꞌwtz cwent Líbano, yi amaꞌlaꞌtz yi na xeꞌtij te wutz Baal-hermón jalen yi tzajpon wiꞌ jeꞌn tziꞌn te yi amaꞌl cwent Hamat. 4 Yaꞌstzun yi eꞌchk wunakaꞌtz yi takꞌ Kataj amaꞌl scyetz tan chicyajeꞌn cyen tan chipileꞌn yi eꞌ aj Israel, tan tilweꞌn ko chocopon tan banleꞌn taneꞌn eꞌchk caꞌwl yi talnak iꞌ scyetz chimam chiteꞌ tan Moisés. 5 Chinajeweꞌn tzun yi eꞌ xonl Israeltz ẍchixoꞌl yi eꞌ wunakeꞌj: Yi eꞌ aj Canaán, scyuchꞌ yi eꞌ hitita, scyuchꞌ yi eꞌ amonita, scyuchꞌ yi eꞌ ferezeo, scyuchꞌ yi eꞌ heveo, nin scyuchꞌ yi eꞌ jebuseo. 6 Ej, nin yi chinitxaꞌ yi eꞌ xonl Israel, at tzun eꞌ cyokꞌbej quibtz scyuchꞌ chinitxaꞌ yi eꞌ wunakaꞌtz. Nintzun eꞌ xomtz te cyajtzaꞌkl, nin eꞌ octz tan cꞌuꞌlajeꞌn chiryosil yi eꞌ awer nakaꞌtz.

Yi toqueꞌn Otoniel tan colpeꞌn Israel tkꞌab Cusan-risata

7 Ej itzun bantz, chin juntlen nin tzun quitaneꞌn yi eꞌ xonl Israel swutz Kataj Ryos, na quiꞌt na chitzan tan xtxumleꞌn iꞌ, na nin el te chicꞌuꞌl, nin eꞌ oc tan cꞌuꞌlajeꞌn wiꞌnin cyeblal yi eꞌchk ryos yi na chibiꞌaj Baal tu Astarté. 8 Chaꞌstzun te tkꞌol Kataj Ryos amaꞌl tetz Cusan-risataim, yi rey yi na cawun Mesopotamia, tan cawuneꞌn squibaj. Nintzun eꞌ oc tetz wajxak yob jakꞌ caꞌwl yi reyaꞌtz, 9 jalen cuꞌn yi teleꞌn chitziꞌ tan jakleꞌn ẍchꞌeybil cyetz tetz Kataj. Kalenaꞌs tzun tkꞌol iꞌ amaꞌltz tan jaleꞌn jun ẍchixoꞌl yi xcyeꞌ tan chicolpeneꞌl tzaj. Nin yi junaꞌtz yi oc tan chicolpeꞌn, Otoniel biꞌ. Iꞌ cyꞌajl Cenaz, yi titzꞌun Caleb. 10 Ej, nintzun ul yi espíritu tetz Ryos teꞌj Otoniel, nintzun oc iꞌ-tz tetz chibajxom yi eꞌ aj Israel, tan chibeneꞌn tan oyintziꞌ scyeꞌj yi eꞌ aj Mesopotamia tu yi chireyil yi Cusan-risataim. Nintzun eꞌ xcyeꞌ-tz scyeꞌj tan porer Kataj Ryos. 11 Yi bajijeꞌn yi xtxolbilaꞌtz quiꞌct tzun jun oyintziꞌ bajijtz tetz caꞌwunak yob.

Yi toqueꞌn Aod tan chicolpeꞌn yi eꞌ xonl Israel ẍchikꞌab yi eꞌ aj Moab

12 Itzun bantz te yi nsken quim Otoniel, nintzun eꞌ oc junt tir yi eꞌ xonl Israel tan banleꞌn eꞌchk takleꞌn yi chin juntlen nin swutz Ryos. Chaꞌstzun te tkꞌol iꞌ mas walor Eglón yi rey tetz Moab ẍchiwutz yi eꞌ tetz tanum. 13 Ej, nintzun oc chiyol Eglón rey tetz Moab scyuchꞌ yi eꞌ amonita, nin scyuchꞌ yi eꞌ xonl Amalec tan chibeneꞌn tan oyintziꞌ scyeꞌj yi eꞌ xonl Israel, nin te jun oyintziꞌaꞌtz ja chicambaj yi tnum yi na biꞌaj Las Palmeras. 14 Ja tzun choꞌc yi eꞌ xonl Israel jakꞌ caꞌwl Eglón tetz wajxaklaj yob, 15 jalen cuꞌn yi teleꞌn junt tir chitziꞌ tan jakleꞌn ẍchꞌeybil cyetz tetz Kataj Ryos. Chaꞌstzun te tkꞌol iꞌ junt tir amaꞌl tan jaleꞌn junt chibajxom tan chicolpeneꞌl tzaj ẍchikꞌab. Nin yi junaꞌtz yi oc tetz cyajcawil, iꞌtz jun yaj yi max iꞌ, yi na biꞌaj Aod, cyꞌajl Gera, xonl Benjamín.

At tzun jun tirtz, nintzun ben Aod tan takꞌleꞌn jun chicutxuj tetz yi rey Eglón. 16 Nsken tzun bnix jun spar tan Aod yi cabil len xlaj atit wiꞌ, nin at loꞌ meꞌ metr tkan, nintzun oc cꞌaloltz xe cꞌuꞌl, tul pakbilil beꞌch tetz le sbal. 17 Beneꞌn tzuntz tan takꞌleꞌn yi jun cutxujaꞌtz tetz yi rey Eglón, yi chin cꞌatzaj nin. 18 Ej itzun te yi nsken wiꞌt takꞌ Aod yi chicutxujaꞌtz tetz Eglón, nintzun eꞌ aj tzaj Aodtz scyuchꞌ yi eꞌ yi xomcheꞌ teꞌj. 19 Ma yi cyoponeꞌn kale ateꞌt yi eꞌchk teblal yi eꞌchk ryos yi ateꞌ nakaꞌjil Gilgal, nintzun pakxijt Aodtz te Eglón, itzun taltz tetz:

—At jun stziblal yi cyꞌaꞌn waꞌn tetz teruꞌ, iluꞌ jun cꞌoloj wajcawil, poro tajweꞌn kloꞌ yi kachuc cuntuꞌ, stzun Adod bantz.

Nintzun cawun nin yi rey scyetz yi eꞌ yi ateꞌ nintz, tan cyeleꞌn.

20 Ej itzun te yi chicyajeꞌn cyen chichuc tuchꞌ yi rey Eglón, yi choꞌn cꞌolchij xe yi caꞌl yi na xcon tetz yi tiemp tetz tzꞌaꞌ, nintzun ocopon ẍkansal tib Aodtz swutz, itzun ben tloltz tetz:

—Yi stziblal yi cyꞌaꞌn waꞌn tetz teruꞌ, Ryos mmaꞌlon tzaj, stzun Aod bantz.

Yi tbital Eglón yi xtxolbileꞌj, lajkeꞌl nintzun jeꞌn txicloktz. 21 Poro qui nin takꞌ Aod amaꞌl tan bnol jun takleꞌn, na lajkeꞌl nin beneꞌn yi kꞌab yi max tan jeꞌseꞌn tzaj yi spar yi choꞌn at xe cꞌuꞌl le sbal, nintzun ben xuyultz le cꞌuꞌl Eglón. 22 Nin tampaj yi cyakil cunin walor Aod xcon taꞌn tan xuyleꞌn quen, tircunin tzun yi spar tu yi kꞌabil baj nintz le cꞌuꞌl. Nin tampaj yi cꞌatzajil yi rey, quiꞌt lajluch ban yi spar, nin quiꞌt el tzaj junt tir tan Aod. 23 Nin tzun ben Aodtz tan lamcheꞌn cuꞌn yi puert, nin cuꞌ taltz taꞌn. Ej, choꞌn tzun teleꞌn tzaj iꞌ tul yi wentanuꞌ.

24 Nin te yi nsken wiꞌt aj Aod, nintzun eꞌ opon yi eꞌ ẍchakum yi rey, poro yi beneꞌn quilol yi lamij yi puert, nintzun chitxumtz yi nin loꞌ oc lamol tib yi rey xe caꞌl ẍchuc tan cꞌuꞌliꞌn. 25 Poro yi ticyꞌeꞌn nin chipaj tan ẍchꞌiweꞌn yi rey, nintzun eꞌ bisuntz, na quiꞌc nin iꞌ na el tzaj. Nintzun xcon yi laweꞌ-tz cyaꞌn tan jakleꞌn yi puert. Ma yi jakxeꞌn cyaꞌn nintzun beneꞌn quilol yi chireyil yi coylij wuxtxꞌotxꞌ.

26 Nin te yi na chibatz quib yi eꞌ ẍchakum yi reyaꞌtz tan xtxumleꞌn mbil chiban, nsken tzun wiꞌt opon tetz Aod joylaj. Nsken wiꞌt chicyaj cyen eꞌchk teblal taꞌn yi choꞌn ateꞌ Gilgal. Choꞌn tzun tponeꞌn tan colol tib le jun amaꞌl yi na biꞌaj Seirat. 27 Ma yi tponeꞌn le amaꞌl cwent Israel, nintzun cuꞌ chun taꞌn tibaj eꞌchk juꞌwtz yi at cwent yi amaꞌl Efraín, tan chichakleꞌn tircuꞌn yi eꞌ xonl Israel. Tircunin tzun eꞌ bentz licuꞌnak tziꞌn tan oyintziꞌ. Bajxij Aod ẍchiwutz. 28 Na nin tal Aod scyetz: “Chixomok tzajuꞌ sweꞌj, na ja wiꞌt takꞌ Kataj amaꞌl sketz tan katxꞌaconeꞌn scyeꞌj yi eꞌ aj Moab.” Nintzun eꞌ opontz te eꞌchk amaꞌl kale na chicyꞌeꞌt wunak wi yi aꞌ Jordán, nin qui nin cyakꞌ amaꞌl tetz jun aj Moab tan ticyꞌeꞌn poneꞌn le jalajt. 29 Nin te jun tiraꞌtz eꞌ quim loꞌ lajuj mil aj Moab cyaꞌn, nin tircuꞌn yi eꞌaꞌtz yi eꞌ quim, eꞌ len cuꞌn sanlar yi chin cham nin eꞌ. Cyaꞌl nin jun jak clax ẍchikꞌab. 30 Yaꞌtz cunin tzun bajijtz yi chixcyeweꞌn scyeꞌj yi eꞌ aj Moab.

Ma yi stzajeꞌn wiꞌ yi jun chin oyintziꞌaꞌtz, nin tzun jal cyen jun tzatzin paz le chitanum yi eꞌ xonl Israel tetz jun mutxꞌ yob.

Yi toqueꞌn tan chicolpeneꞌl tzaj yi eꞌ xonl Israel ẍchikꞌab yi eꞌ filistey

31 Ej, itzun bantz nin jal junt pujul xtisyaꞌ yi eꞌ xonl Israel, yi na biꞌaj Samgar, yi cyꞌajl Anat, yi xcyeꞌ tan chibiyleꞌn kak cient filistey, tan jun xuybil wacẍ. Nchaꞌtz iꞌ ocnak tan chicolpeꞌn yi eꞌ xonl Israel ẍchikꞌab chicontr.