Yi chixcyeweꞌn Débora tu Barac teꞌj Sísara
4
1 I tzun bantz te yi nsken quim Aod, nintzun eꞌ oct yi eꞌ xonl Israel tan banleꞌn eꞌchk takleꞌn yi chin juntlen nin swutz Kataj Ryos. 2 Chaꞌstzun te cyoqueꞌn jakꞌ caꞌwl Jabín, jun scyeri eꞌ rey yi eꞌ cananeo, yi choꞌn cawunak le jun tnum yi na biꞌaj Hazor. Nin yi cyajcawil yi sanlar yi jun wiꞌtz reyaꞌtz na biꞌaj Sísara yi choꞌn najlij le tnum Haroset-goim. 3 Ej nin yi jun wiꞌtz ajcawaꞌtz yi Jabín, at beluj cient careꞌt iꞌ yi chꞌichꞌ cuꞌn yi na xcon tan oyintziꞌ, nin yi ateꞌ len cuꞌn chej sjuꞌak tan chikinleꞌn. Nsken tzun el junak yob tan yi reyaꞌtz tan chibuchleꞌn yi eꞌ xonl Israel. Jalen cuꞌn yi teleꞌn chitziꞌ yi eꞌ xonl Israel tan jakleꞌn ẍchꞌeybil cyetz tetz Kataj Ryos, kalenaꞌs tzun cyeleꞌntz liwr jakꞌ caꞌwl yi jun reyaꞌtz.4 Itzun te yi jun tiempaꞌtz, jal junt pujul xtisyaꞌ yi eꞌ xonl Israel yi xnaꞌn. Iꞌ jun elsanl stziꞌ Ryos, nin yi biꞌ iꞌ iꞌtz Débora, yi txkel Lapidot. 5 Ilenin ja coleꞌ Débora txeꞌ jun wiꞌ palma. Chaꞌs tzun te ja cyal wunak “Yi palma tetz Débora”. Choꞌn at yi jun wiꞌ palmajaꞌtz wiꞌwtz cwent yi amaꞌl tetz Efraín, nicyꞌal yi cob tnum Ramá tu Betel. Choꞌn tzun na chopon yi eꞌ aj Israel swutz Débora tan banleꞌn taneꞌn eꞌchk cyoyintziꞌ.
6 Ej itzun bantz, at tzun jun tir nin ben mantar Débora tan ẍchakleꞌn tzaj jun yaj yi na biꞌaj Barac, cyꞌajl Abinoam, yi choꞌn najlij Cedes, jun chitanum yi eꞌ xonl Neftalí. Itzun yi tuleꞌn nintzun taltz tetz:
—Yi Kataj yi kaRyosil yi oꞌ aj Israel, ja tal iꞌ yi xtxolbileꞌj yi tajweꞌn tan abnol: “Quiloꞌk wi yi wutz yi na biꞌaj Tabor, nin molweꞌ lajuj mil yaj yi eꞌ xonl Neftalí scyuchꞌ yi eꞌ xonl Zabulón wi yi amaꞌlaꞌtz. 7 Ma yi in wetz tzinjoyeꞌ puntil tan cyoponseꞌn Sísara, yi cyajcawil yi eꞌ sanlar yi rey Jabín stziꞌ yi tal neꞌẍ tzanlaꞌ yi na biꞌaj Cisón tan oyintziꞌ tziteꞌj. Ej nin tzꞌopon iꞌ scyuchꞌ yi eꞌ tetz careꞌt yi chꞌichꞌ cuꞌn, nin scyuchꞌ yi eꞌ tetz sanlar. Poro swakꞌeꞌ amaꞌl tzitetz tan ixcyeweꞌn scyeꞌj, stzun Kataj Ryos ban swetz,” chij Débora ban tetz Barac.
8 —Baꞌn chimben poro kol xom ninuꞌ sweꞌj, na ko quil benuꞌ sweꞌj, nchaꞌtz in quil chimben, stzun Barac bantz tetz Débora.
9 —Nchimben bin teꞌjuꞌ, chij Débora, poro nkꞌeꞌtz iluꞌ sjalok kꞌejuꞌ yil tzaj wiꞌ yi jun oyintziꞌaꞌtz, na yi Kataj Ryos sjatxonk yi Sísara tkꞌab jun xnaꞌn.
Beneꞌn nintzun eꞌ ban Déboraꞌtz tu Barac jalen yi tnum Cedes. 10 Choꞌn tzun ẍchakol Barac yi eꞌ xonl Zabulón scyuchꞌ yi eꞌ xonl Neftalí le jun tnumaꞌtz. Ej nintzun eꞌ molxij lajuj mil yajtz taꞌn, nin eꞌ octz jakꞌ caꞌwl iꞌ. Nchaꞌtz Débora xomij nintz te Barac.
11 Te yi na bajij yi eꞌch xtxolbilaꞌtz at tzun jun yaj yi na biꞌaj Heber, jun scyeri xonl yi eꞌ quenita yi nsken je nucꞌul yi tetz mantial nakaꞌjil yi tnum Cedes, jakꞌ jun wiꞌ bakch yi at le jocoꞌj Zananim. Yi Heberaꞌtz nsken el cyen jatxol tib scyeꞌj yi eꞌ mas quenita, nin yi chimam chiteꞌ banak iꞌtz Hobab, yi jiꞌ Moisés. a
12 Ej, itzun yi tbital Sísara yi choꞌn at Barac wiꞌwtz Tabor, 13 nintzun cawun iꞌ tan chibnol list quib beluj cient careꞌt yi chꞌichꞌ cuꞌn, scyuchꞌ yi eꞌ tetz sanlar, nin eꞌ eltzajtz Haroset-goim tan cyoponeꞌn kale atit yi tal neꞌẍ tzanlaꞌ yi na biꞌaj Cisón. 14 Talol tzun Débora tetz Barac:
—¡Or, lajkeꞌl, na ja opon oril tan tkꞌol Kataj Ryos amaꞌl teruꞌ tan xcyeweꞌnuꞌ teꞌj Sísara, na sbajxok iꞌ ẍchiwutzuꞌ!
Nintzun eꞌ saj Baractz scyuchꞌ yi eꞌ sanlar licuꞌnak tzaj. Xomcheꞌ yi lajuj mil sanlar teꞌj. 15 Ma yi xeꞌteꞌn atit yi jun oyintziꞌaꞌtz ẍchixoꞌl Sísara tu Barac, nintzun cuꞌ jun chin xoꞌw tan Kataj Ryos ẍchixoꞌl yi eꞌ sanlar cwent Sísara, nin ẍchixoꞌl yi eꞌ yi ateꞌ-eꞌn tulak eꞌchk careꞌt yi kinij tan chej. Nicyꞌt nin Sísara, yi cyajcawil yi eꞌ contraꞌtz, el ojkuj le tetz careꞌt tan coloꞌn ib. 16 Ma Barac scyuchꞌ yi eꞌ sanlar cwent Israel, eꞌ xomnin tan chitzꞌamleꞌn yi eꞌ careꞌt scyuchꞌ yi eꞌ sanlar yi eꞌ el ojkuj jalen Haroset-goim. Nin cyaꞌl nin jun scyeri eꞌ sanlaraꞌtz tetz Sísara eꞌ clax, ma na tircuꞌn eꞌ, eꞌ quim cyaꞌn.
17 Ma Jabín yi rey tetz Hazor, quiꞌc muꞌẍ tal cyoyintziꞌ at-tz scyuchꞌ yi eꞌ najal Heber yi quenita. Chaꞌstzun te choꞌn tzun tponeꞌn colol tib Sísara, le mantial Jael yi txkel Heberaꞌtz. 18 Nin el tzaj Jael tan cꞌulcheꞌn iꞌ, i tzun taltz tetz:
—Tzꞌok tzajuꞌ tzoneꞌj, iluꞌ jun cꞌoloj wajcaw. Tzꞌok tzajuꞌ, quil xobuꞌ.
Ej, nintzun oc Sísara, nintzun tewal Jael iꞌ-tz tzakꞌ jun xbuꞌk. 19 Beneꞌn tzun jakol Sísara muꞌẍ aꞌ tetz Jael na jaltnin tan quimeꞌn tan saktziꞌ. Nintzun ben Jaeltz tan jakleꞌn stziꞌ yi tzꞌuꞌm kale atit cuꞌn yi lech, nin ben tkꞌol muꞌẍtz tetz. Ma yi wiꞌt tucꞌaꞌeꞌn iꞌ nintzun cuꞌ lamol Jael junt tir yi tzꞌuꞌm. 20 Itzun ben tlol Sísara tetz Jael:
—Ncwen tuꞌs stziꞌ yi mantial, nin ko at jun tzꞌul tan jakleꞌn yi ko at jun wunak tzoneꞌj, baꞌn tzawal nin yi cyaꞌl at, stzun iꞌ bantz.
21 Ej nin tampaj yi nsken wiꞌt kꞌeꞌxij Sísara, jalcunin tzun beneꞌn bekꞌxujtz tan watl. Nintzun saj tcyꞌal Jael jun martiy tu jun tzeꞌ yi chin juyuch nin wiꞌ, yi na xcon taꞌn tan kinleꞌn juꞌ yi mantial. Numun cunin tzun tponeꞌntz kale atit Sísara, nintzun ben pajlul yi tzeꞌ le wiꞌ. Nquil cuntuꞌ tul yi txꞌotxꞌ. Yaꞌstzun bantz yi quimeꞌn Sísara. 22 Itzun yi toponeꞌn Baractz tan joyleꞌn Sísara, nintzun teleꞌn tzaj Jaeltz tan cꞌulcheꞌn iꞌ-tz, itzun taltz tetz:
—Or teruꞌ tan tilweꞌn yi jun yaj yi na tzanuꞌ tan joyleꞌn, stzun bantz.
Nintzun oc Baractz xe mantial Jael, nin ben tilol yi coylij Sísara wuxtxꞌotxꞌ, poro quimnakt, nin atit nin yi jun tzeꞌ yi ben pajluꞌn le wiꞌ.