Yi bitz yi chibitzij Débora tu Barac
5
1 I tzun ban te yi jun kꞌejaꞌtz, nintzun eꞌ bitzin Débora tu Barac, yi cyꞌajl Abinoam, itzun cyaltz:2 “Tircuꞌn oꞌ kakꞌeꞌ len kakꞌajsbil swutz Kataj Ryos,
na ateꞌ yaj tzoneꞌj Israel yi list quitaneꞌn tan oyintziꞌ,
na jalucunin nchicujij yi tponeꞌn mantar scyeꞌj tan chibeneꞌn tan oyintziꞌ.
3 Eꞌuꞌ jun cꞌoloj wiꞌtz rey, quibit tzajuꞌ inyol.
Eꞌuꞌ jun cꞌoloj wiꞌtz ajcaw, quibit tzajuꞌ inyol.
Na ẍchimbitzink nin tetz Kataj.
Ẍchimbitzink nin tetz yi kaRyosil yi oꞌ aj Israel.
4 ”Iluꞌ Wajcaw, yi teleꞌn tzajuꞌ xoꞌl wutz cwent Seir,
yi teleꞌn tzajuꞌ swutzak eꞌchk amaꞌlaꞌtz cwent Edom,
ja jincan yi tcyaꞌj nin ja chucan yi txꞌotxꞌ tan yi kꞌancyok.
Nin ja saj kojxuj jun chin aꞌbal tanuꞌ.
5 Ja chilucneꞌ cyakil yi eꞌchk wutz.
Ja lucneꞌ yi wutz Sinaí tan xoꞌw,
yi ticyꞌeꞌn tzajuꞌ squibaj.
6 Te yi tiemp yi at tzaj Samgar, yi cyꞌajl Anat,
nin te yi tiemp jaluꞌ yi at Jael,
qui nin nxcon yi nim beꞌ cyaꞌn yi eꞌ aj pyaj.
Ma na ja xcon eꞌchk kꞌab beꞌ yi chin tzaꞌl nin
tan cyewal quib ẍchikꞌab alkꞌom.
7 Nchaꞌtz tircuꞌn yi eꞌchk tal neꞌẍ tnum
yi ateꞌ kacwent yi oꞌ Israel,
chin tzꞌinunin tunin eꞌ ban tan xoꞌw,
na cyaꞌl jun nak el tan akꞌun tan paj yi xobeꞌn.
Yaꞌstzun yi tiemp yi jaleꞌn inwalor.
Nin ja nimseꞌ incꞌuꞌl, yi in wetz, in Débora,
jun scyeri eꞌ xnaꞌn yi at chikꞌej skaxoꞌl yi oꞌ xonl Israel.
8 ”Ej nin te yi cyoqueꞌn yi eꞌ katanum
tan chilokꞌeꞌn eꞌchk chiryosil yi banijt,
ilenin ja bajij eꞌchk il skaxoꞌl.
Ej nin te yi jun tiempaꞌtz,
qui nin jal jun makbil flech skaxoꞌl,
qui nin jal jun spar skaxoꞌl,
qui nin jal jun maꞌcl tetz oyintziꞌ skaxoꞌl,
skaxoꞌl caꞌwunak mil kaxoneꞌn.
9 ”Nin swakꞌeꞌ chikꞌej yi eꞌ wiꞌtz kasanlar yi oꞌ aj Israel.
Na quinin nchicabej chicꞌuꞌl tan chibeneꞌn tan oyintziꞌ.
¡Kacyakil cuꞌn bin kakꞌeꞌ len kakꞌajsbil tetz Kataj Ryos!
10 ”Nchaꞌtz eꞌuꞌ, yi na xcon buruꞌ cyanuꞌ tetz chixoꞌmbiluꞌ,
yi eꞌuꞌ yi na chicꞌoleꞌuꞌ tibaj balaj xbuꞌk,
cyakꞌeꞌuꞌ kꞌej Kataj Ryos.
Nchaꞌtz eꞌuꞌ cyeruꞌ, yi quikan cuntuꞌ na chixonuꞌ lakak beꞌ,
cyakꞌeꞌuꞌ kꞌej Kataj Ryos.
11 Nin yi eꞌuꞌ yi na chimol cuꞌn quibuꞌ kale ateꞌt eꞌchk julil aꞌ,
kale na chucꞌaꞌeꞌt cyawunuꞌ,
baꞌn chitxoluꞌ yi ẍeꞌn cuꞌn ntxꞌacon Kataj Ryos.
Baꞌn chibitzinuꞌ.
Nimit chiwiꞌuꞌ tan talcheꞌn yi ẍeꞌn ntxꞌacon Kataj Ryos.
Nimit chiwiꞌuꞌ tan xtxoleꞌn yi ẍeꞌn nchitxꞌacon
yi eꞌ katanum yi najlcheꞌ lakak aldey.
12 ”Nchaꞌtz in, yi in Débora baꞌn tzꞌel inwatl nin baꞌn chimbitzin.
Ej nin nchaꞌtz iluꞌ teruꞌ Barac, yi cyꞌajl Abinoam, nimit cꞌuꞌluꞌ
nin tcyꞌajweꞌ ninuꞌ yi eꞌ pres yi ja chicuꞌ tkꞌabuꞌ.
13 ”Ma yi eꞌ ketz kasanlar yi oꞌ aj Israel,
lajkeꞌl chicweꞌn poneꞌn tan oyintziꞌ
scyeꞌj yi eꞌ yi chin cham nin eꞌ.
Na ja cyocsaj quib cꞌulutxum jak incaꞌwl.
Nin ja chiben yi eꞌ sanlaraꞌtz cwent Kataj tan oyintziꞌ.
14 Nchaꞌtz ja chixom yi eꞌ xonl kꞌajtzun Efraín skeꞌj.
Choꞌn nchisaj le chi amaꞌlbeꞌn yi eꞌ xonl Amelec.
Nchaꞌtz ja chixom nin yi eꞌ sanlar cwent Benjamín wutz chicoc.
Nchaꞌtz eꞌ cyajcawil yi eꞌ aj Maquir, eꞌ ultz tan kuchꞌeyeꞌn.
Nin yi eꞌ cyajcawil yi eꞌ aj Zabulón, scyuchꞌ chigobernador, eꞌ ultz.
15 Nchaꞌtz yi eꞌ wiꞌtz ajcaw cwent Isacar,
eꞌ ultz tan chixomeꞌn nin skeꞌj.
Nin eꞌ octz tan ẍchꞌeyeꞌn Barac.
Chin lajkeꞌl nin eꞌ beneꞌn xomok wutz coc iꞌ,
jalen yi chicweꞌn poneꞌn te yi jocoꞌj.
”Poro yi eꞌ sanlar cwent yi eꞌ xonl Rubén,
qui nin chuꞌl tan kuchꞌeyeꞌn.
16 ¿Mbi tzuntz nchicyaj cyen txoꞌlak chipeꞌmil cyawun?
¿I peꞌ tan quibiteꞌn tuꞌ yi eꞌ pstor cneꞌr,
te yi na chitzan tan chimolcheꞌn cyawun?
Quiꞌ, iꞌtz tan paj yi at jatxoꞌn ib ẍchixoꞌl.
Iꞌtz tan paj yi ja cabej chicꞌuꞌl tan kuchꞌeyeꞌn.
17 ”Nchaꞌtz eꞌ ban yi eꞌ xonl Galaad.
Ja chicyajeꞌn cyen xeꞌak chimantial jalaj cyꞌen yi aꞌ Jordán.
Nchaꞌtz yi eꞌ xonl Dan, ja chicyaj cyen tulak chibarc.
Nchaꞌtz yi eꞌ xonl Aser ja chicyaj cyen tzi mar tuꞌ.
Qui nin cyaj cyen quilol chiꞌamaꞌl.
18 Ma chisanlar yi eꞌ xonl Zabulón tu Neftalí,
ja chicꞌox quib cyeraꞌtz tkꞌab quimichil wiꞌak eꞌchk juꞌwtz,
tan oyintziꞌ scyeꞌj eꞌ kacontr.
19 ”Cweꞌn tzun chimolol quib yi eꞌ rey cwent Canaán le tnum Tanaac.
Ja chuꞌl tan oyintziꞌ skeꞌj tzi yi tal aꞌ yi at nakajil Meguido.
Ja chuꞌl tan oyintziꞌ skeꞌj, poro qui nin chicambaj yi kasakal tu eꞌchk kameꞌbiꞌl.
20 Nchaꞌtz eꞌchk txꞌumla yi at tcyaꞌj, ja choꞌc tan contriꞌn te Sísara.
21 Na yi jun tal neꞌẍ aꞌ Quisón, yi at nintz sajleꞌn,
ja jeꞌ pul yi telemuleꞌn jun chin tzanlaꞌ.
Nin ja xcyeꞌ tan ticyꞌleꞌn nin tircuꞌn eꞌ kacontraꞌtz skawutz cunin.
¡Na yi iluꞌ teruꞌ Taꞌ, ja ocuꞌ tan yakꞌpeꞌn cuꞌn chikul yi eꞌ kacontraꞌtz,
yi chin cham nin eꞌ taneꞌn!
22 ”Wiꞌnin wocꞌneweꞌn quikan yi eꞌ chej.
Chin lajkeꞌl nin ja chisaj tan oyintziꞌ skeꞌj.
¡Chin xoꞌwbil nin eꞌ ban tan ojkeꞌl!
23 Ma yi ángel, yi kꞌajbil Kataj Ryos ja tal:
‘¡Sajken jun chin wutzileꞌn caws tibaj yi tnum Meroz,
scyuchꞌ yi eꞌ wunak yi najlcheꞌ-tz!’
Na qui nin choꞌc tan ẍchꞌeyeꞌn Kataj,
chi nchiban yi eꞌ yi bintzi nin at chiwalor.
24 ”¡Ma na takꞌ tzaj Kataj banl tibaj yi xnaꞌn Jael,
yi txkel Heber yi quenita!
¡Nink takꞌ tzaj Kataj wiꞌnin banl iꞌ,
nim teꞌnk cuꞌn sbneꞌ yi tetz banl,
ẍchiwutz yi eꞌ xnaꞌn yi najlcheꞌ xe ak chimantial!
25 Na yi kacontraꞌtz Sísara, nin ben jakol aꞌ tetz.
Poro yi Jael qui nin ben tkꞌol aꞌ,
ma na lech mben tkꞌol iꞌ tetz.
¡Nin ben tkꞌol Jael jun jilwutz lech yi nacnuj,
yi chumbalaj nin, tul jun lak yi chin yubeꞌn nin!
26 Ej, nintzun ben Jael tan ticyꞌleꞌn tzaj jun tzeꞌ,
yi chin juyuch nin wiꞌ,
nin je tcyꞌal tan yi max,
nin tan yi sbal,
nin jeꞌ tcyꞌal jun martiy yi chin al nin,
nin ben pajlultz le wiꞌ Sísara,
nin cyenin ticyꞌeꞌn poneꞌn le jalajt.
27 Wiꞌnin tolil tib Sísara wuxtxꞌotxꞌ swutz Jael.
Wiꞌnin tzun tolil tibtz tan quimichil.
Taꞌsteꞌt nin quimeꞌt wuxtxꞌotxꞌ swutz tkan Jael.
28 ”Ma yi xtxuꞌ Sísara, wiꞌnin bisuneꞌn
tan paj yi cyaꞌl na opon.
Cyakil nin rat na el tzaj tan xkꞌukiꞌn le wentanuꞌ. Nintzun na taltz:
‘¿Mbi tzuntz yi qui nin na ul chan yi wal tul yi tetz careꞌt tetz oyintziꞌ?
¿Qui bi loꞌ yi qui nin na ul chan?’
29 Itzun na tal cuꞌn iꞌ scyuchꞌ yi eꞌ tetz mos: 30 ‘Yi jalcuꞌneꞌj, na loꞌ chitzan tan jatxleꞌn cuꞌn ẍchiwutz,
yi eꞌchk takleꞌn yi ja chicambaj tul oyintziꞌ.
Jun nka cob xun esclaw ja akꞌlij tetz jujun sanlar.
Ma tetz Sísara tetz loꞌ iꞌ sbneꞌ eꞌchk balaj xbuꞌk,
yi chin yubel cunin tan cweꞌn skul iꞌ,
na jun cuꞌn, iꞌ ntxꞌacon te yi oyintziꞌ,’ cheꞌch tzun na ban cuꞌntz.
31 ”Kataj, nicyꞌnin tuꞌk tulejuꞌ cyakil yi eꞌ contruꞌ.
Ma na takꞌ tzajuꞌ chikꞌej yi eꞌ yi na chipekꞌ teꞌjuꞌ.
Nink jal chikꞌej chi taneꞌn yi pakꞌpuchal yi kꞌej yi na txekun tcyaꞌj,” cheꞌch tzun Débora tu Barac bantz le chibitz.
Itzun yi bajeꞌn wiꞌ yi xtxolbileꞌj, nintzun jal jun chin tzatzin paztz lakak amaꞌl cwent Israel tetz caꞌwunakt yob.