Rut 3

Yi chibalajil Booz tu Rut

1 At tzun jun kꞌej nin tal Noemí tetz Rut:

—Aẍ jun cꞌoloj wal, baꞌn chinch wetz, yi nink noꞌk tan joyleꞌn puntil tan toqueꞌn jun awuchmil tan takꞌleꞌn yi tajweꞌn tzatz. 2 Ma jaluꞌ, at bin yi kaxonl Booz, kale axaꞌkeꞌt tan akꞌun ẍchixoꞌl yi eꞌ tetz mos. Nin te yi akꞌbaleꞌj mben iꞌ tan bujleꞌn cebada le er. 3 Banaj yi xtxolbileꞌj: Baꞌn cẍjichin nin, nin akꞌ quen jun balaj tzꞌacꞌbil tzaweꞌj. Nin wek cuꞌn awib te jun balaj beꞌch atz. Nin quiloꞌk le amaꞌl Booz. Quil tzawakꞌ amaꞌl tetz tan techal awutz yi ntaxk bnix tan waꞌaꞌn nin tan ucꞌaꞌeꞌn. 4 Il nin cunin naꞌl cweꞌt yi soc kalel witeꞌt. Kalenaꞌs tzun cẍbentz tan jolcheneꞌn yi xtxoꞌ nin baꞌn ẍcoyeꞌ cuꞌntz xlaj. Ej nin iꞌ tzꞌaꞌlon tzatz yi mbi mas tajweꞌn tan abnol, stzun Noemí bantz tetz Rut.

5 —Cuj, stzun Rut ban. —Tzimbneꞌ quib yi ntaluꞌ swetz.

6 I nin tzun tulej Rut-tz, quib yi tal yi tlib tetz. Nin tzun ben iꞌ-tz. 7 Wiꞌnin tzun stzatzineꞌn Booz yi waneꞌn nin yi tucꞌaꞌeꞌn. Nintzun cuꞌ nucꞌul soctz tan watl nakaꞌjil jun tenaj cebada yi nsken bujxij. Buchtlen tzun tocomponeꞌn Rut kale atiteꞌt. Ewun cuntuꞌ tocomponeꞌn iꞌ. Nin jeꞌ jolol yi xtxoꞌ Booz nin cuꞌ coyloktz xlaj. 8 Yi toponeꞌn nicyꞌakꞌbal jalt cuntunin teleꞌn watl Booz. Yi jeꞌn tolil tib ninin el yab teꞌj yi at jun xnaꞌn coylij xlaj. 9 Nintzun jaktz:

—¿Naꞌ tzun scyetz aẍ? chij iꞌ bantz.

—In Rut yi ẍchakumuꞌ, chij. —Iluꞌ mero xonl kꞌajtzun wuchmil. Chaꞌstzun te tajweꞌn yil tzꞌocuꞌ tan incolpeꞌn tkꞌab yi sotzaj cꞌuꞌlal. Ej nin tajweꞌn yil tzꞌumeꞌuꞌ sweꞌj, stzun Rut.

10 —Koj tzaj Kataj banl tzawibaj, chij Booz. —Na qui nin ncxom te yi chitxumuꞌn yi eꞌ mas xnaꞌn yi ntin yi eꞌ xicy na chipekꞌ teꞌj. Quiꞌc na ban tetz cyetz yi ko ric nka meꞌbaꞌ, ntin yi ko xicy. Ma yi aẍatz qui nin maban yi xtxolbilaꞌtz. Ma na ja ajoy yi in, yi ja chintelan. 11 Ma jaluꞌ, aẍ jun cꞌoloj Rut, quil cxob. Na ja wiꞌt lajluchax yi abalajil ẍchiwutz yi eꞌ wunak tzoneꞌj. Chaꞌstzun te tzimbneꞌ yi awajbil. 12 Ptzun bintzijk yi in axonl poro at junt yi mas ixonl itib tuchꞌ. 13 Poro te yi akꞌbaleꞌj baꞌn cẍwit tzoneꞌj. Ma eklen, yi ko na taj yi axonlaꞌtz tan acolpeꞌn, baꞌn atit. Ma yi ko quiꞌ, swutz cuꞌn Kataj yi nocpon wetz tan acolpeꞌn. Ma jaluꞌ witen bin, na txeꞌn ul skil, stzun Booz bantz.

14 Choꞌn tzun witeꞌn cyen Rut nakaꞌjil Booz te yi jun akꞌbalaꞌtz. Ma yi tuleꞌn skil, jalchan cunin tzun cꞌaseꞌntz. Chin tzꞌoꞌtzeꞌt nin yi tajeꞌnt tzaj iꞌ na nsken tal Booz yi cyaꞌl kloꞌ tzꞌiꞌlon wutz jun xnaꞌn le jun amaꞌlaꞌtz kale na bujlij yi cebada.

15 Poro te yi ntaxk aj tzaj, nintzun tal Booz tetz Rut:

—Cyꞌajlen yi xbuꞌk yi cyaꞌn awaꞌn. Nin litꞌ cuꞌn wuxtxꞌotxꞌ, stzun iꞌ.

Nintzun ben kojol Booz jun loꞌ quintal cebada tibaj. Ej nin jeꞌ tkꞌoltz wutz coc Rut. Kalenaꞌs tzun tajeꞌn Rut le tetz najbil.

16 I tzun bantz yi toponeꞌnt Rut, nintzun jak yi tlib tetz:

—¿Ẍeꞌn mban wal?

Nintzun xtxol Rut-tz tetz yi tlib yi mbi cuꞌn bajij. 17 Nchaꞌtz tal iꞌ:

—Iꞌ mmakꞌon tzaj cyakil yi cebadajeꞌj swetz. Na nin tal iꞌ swetz: “Ploj yi ko quiꞌc nin cyꞌaꞌn awaꞌn yil cẍopon te awulib.”

18 Nintzun tal Noemí-tz tetz Rut:

—Ma jaluꞌ wal, kachꞌiweꞌ yi mbi sbajok. Yi jun yajaꞌtz, quil tzꞌujeꞌ teꞌtz jaluꞌ jalen yil jal puntil taꞌn, tan pujleꞌn xoꞌl tircuꞌn.