Yi beneꞌn Rut tan molcheꞌn wiꞌ cebada
2
1 At tzun jun xonl yi kꞌajtzun Elimelec yi chmilbeꞌn Noemí yi na biꞌaj Booz.a Iꞌ jun yaj yi at wiꞌnin kꞌej. Nin chin ric nin iꞌ. 2 At tzun jun kꞌej nin tal Rut tetz yi tlib:
—Naꞌ, takꞌuꞌ amaꞌl swetz tan imbeneꞌn tan xoꞌn wiꞌak cojbil. Ko peꞌ at jun aj jeꞌsanl cosech yil takꞌ amaꞌl swetz tan inxomeꞌn nin wutz coc tan molcheꞌn yi eꞌchk wiꞌ cebada yi na cyaj cyen wi cojbil.
—Quiloꞌk bin wal, stzun yi tlib bantz tetz.
3 Beneꞌn tzun Rut tan xoꞌn wiꞌak cojbil. Nintzun akꞌlij amaꞌltz tetz tan molcheꞌn yi eꞌchk wiꞌ cebada yi cyaj cyen wi cojbil cyakꞌun yi eꞌ aj jeꞌsanl cosech. Noj quen cuꞌn tzuntz yi choꞌn tponeꞌn le cojbil Booz, jun xonl kꞌajtzun Elimelec.
4 I tzun bantz choꞌn tzun tzajeꞌn Booz le tnum Belén tan quilweꞌn yi eꞌ tetz mos. Yi toponeꞌn scyeꞌj nintzun taltz scyetz:
—Koj tzaj Kataj banl tzitibaj.
—Nchaꞌtz teruꞌ taꞌ, koj tzaj Kataj banl tibajuꞌ, cheꞌch yi eꞌ mos bantz tetz Booz.
5 Beneꞌn tzun jakol Booz tetz yi caporal:
—¿Naꞌ tzun scyetz iꞌ yi jun xnaꞌneꞌj yi na tzan tan molcheꞌn yi eꞌchk wiꞌ cebada?
6 —Iꞌtz jun xnaꞌn aj Moab. Choꞌn xomij iꞌ teꞌj Noemí yi cyuleꞌn tzoneꞌj. 7 Nin ja jak iꞌ amaꞌl swetz tan xomeꞌn tzaj wutz chicoc yi eꞌ mos tan molcheꞌn eꞌchk wiꞌ cebada. Ja baj cuꞌn yi jalajix kꞌej taꞌn tan ẍchamleꞌn. Anaꞌ chan cunin ja ujeꞌ jun tal rat, stzun yi caporal bantz tetz Booz.
8 Nintzun ben tlol Booztz tetz Rut:
—Aẍ jun cꞌoloj witzꞌun, qui na waj yil cẍben tan ẍchamleꞌn cebada swutz junt amaꞌl. Ma na ncyeꞌn tuꞌstz tzoneꞌj scyeꞌj eꞌ inmos. 9 Xomen nintuꞌtz wutz chicoc. Na ja wal scyetz yi ja wakꞌ amaꞌl tzatz. Kol saj saktziꞌ tzaweꞌj at aꞌ le cuꞌlbil, baꞌn tzajoy cuꞌn. Nin baꞌn cẍucꞌaꞌ te yi cyetz chicꞌaꞌ, stzun Booz bantz tetz Rut.
10 Cweꞌn tzun mejlok Rut nin aj cuꞌn wutz plaj wuxtxꞌotxꞌ tan ẍchajleꞌn yi cꞌulutxumil iꞌ.
—¿Mbi tzuntz na taltzajuꞌ yi xtxolbilaꞌtz swetz? Chum balaj nin iluꞌ sweꞌj taꞌ, wech in tuꞌ awer nak ẍchixoꞌluꞌ, chij Rut bantz tetz.
11 Beneꞌn tzun tlol Booz tetz Rut:
—Ja wiꞌt wit cyakil yi abalajil yi maban te awulib jetz yi quimeꞌn yi awuchmil. Nchaꞌtz ja wit yi ja chicyaj cyen awilol yi eꞌ ataj. Nchaꞌtz ja wit yi ja chicyaj cyen awilol yi atnumil tan awuleꞌn skaxoꞌl, wech na nchaꞌtz oꞌ ketz, oꞌ awer nak taneꞌn tzawutz. 12 Lok koj tzaj Kataj Ryos yi banl tzawibaj tan yi banl awalmaꞌ. Ntin cuꞌn Kataj yi kaRyosil yi oꞌ xonl Israel, yi jun kale majakwit ẍchꞌeybil aꞌtz, tzꞌakꞌon banl iꞌ tzawibaj tan cyakil cuꞌn yi eꞌchk takleꞌn yi ja bnix awaꞌn, stzun Booz bantz.
13 —Chumbalaj nin iluꞌ sweꞌj. Yi yoluꞌ na xcyeꞌ tan inmayseꞌn. Na pe nin skꞌil njilonuꞌ swetz. Wech na siquier ink jun mosuꞌ, stzun Rut bantz.
14 I tzun yi toponeꞌn oril tan waꞌaꞌn, sajeꞌn tzun ẍchakol Booz yi Rut. Nintzun taltz tetz:
—Or awetz witzꞌun, banaj jun awaꞌ. Je jun piẍ pameꞌj, bajseꞌn. Baꞌn tzamuꞌ cuꞌn tul yi muꞌẍ binagreꞌj.
Nintzun cꞌoleꞌ cuꞌn Rut-tz ẍchixoꞌl yi eꞌ mos. Ma Booz nin ben tkꞌol iꞌ jun txob cebada yi woyiꞌnt tetz. Wan cunin Rut jalen yi nojeꞌn yi cꞌuꞌl, poro ilenin sowrin yi waꞌ. 15 Te yi beneꞌnt iꞌ tan ẍchamleꞌn cebada nintzun cawun Booz scyetz yi eꞌ mos. I tzun taltz:
—Akꞌwok amaꞌl tetz tan toqueꞌn tan molcheꞌn xoꞌlak eꞌchk bocꞌojt yi molijt, nin quil tzimak wok wutz iꞌ. 16 Nchaꞌtz baꞌn lcyaj cyen jujun bakaj cebada itaꞌn wuxtxꞌotxꞌ xoꞌlak yi jujun bocꞌojaꞌtz yi ja wiꞌt cꞌalxij, tan toqueꞌn iꞌ tan molcheꞌn. Quil tzimakwok wutz, stzun Booz.
17 Baj cuꞌn tzun kꞌejtz tan Rut tan ẍchamleꞌn eꞌchk wiꞌ cebada wutz yi cojbil Booz jalen cuꞌn yi toqueꞌn akaleꞌn. Nintzun octz tan bujleꞌn yi cebada yi molxij taꞌn. Molxij loꞌ eꞌch cob arow wutz cebada taꞌn. 18 Yi tajeꞌn tzaj nin aj tzaj tcyꞌal iꞌ yi wutz cebada yi molxij taꞌn. Ninin ben iꞌ tan ẍchajleꞌn tetz yi tlib. Yi wiꞌt ẍchajol nintzun je tzaj tcyꞌal iꞌ yi sowril yi waꞌ, nin ben tkꞌoltz tetz yi tlib.
19 —¿Naꞌ ncẍaꞌkeꞌt jaluꞌ? ¿Naꞌ nmolxeꞌt yi jun cꞌoloj cebada awaꞌneꞌj? Koj tzaj Kataj banl tibaj yi junaꞌtz yi mmoꞌc tan awuchꞌeyeꞌn, stzun yi tlib bantz tetz.
—Yi taw yi amaꞌl kale nxnaꞌkeꞌt tan molcheꞌn cebada, iꞌtz tetz taꞌ Booz, stzun Rut tetz Noemí.
20 Nintzun tal Noemí tetz:
—Koj tzaj Kataj banl tibaj taꞌ Booz, na chumbalaj nin iꞌ mban skeꞌj, chi banak Ryos scyeꞌj kꞌajtzun almaꞌ. Xonl kꞌajtzun wuchmil yi taꞌ Boozaꞌtz, nin iꞌ jun yi tajweꞌn tan toqueꞌn tan kacolpeꞌn tkꞌab yi sotzal cꞌuꞌlal, stzun Noemí bantz.
21 —Nchaꞌtz ja tal iꞌ swetz: “Baꞌn cxom nin wutz chicoc yi eꞌ inmos tan molcheꞌn yi wiꞌ cebada jalen cuꞌn yil bajeꞌn yi cosech.”
22 —Baꞌn aẍ jun cꞌoloj wal, qui cẍbisun, baꞌn cẍben. Cyaꞌl cẍaꞌj nint wi junt cojbil, bantz cyaꞌl cẍyajontz, stzun Noemí bantz.
23 Yaꞌtz nintzun ban Rut-tz. Choꞌn tzun taꞌteꞌn iꞌ-tz tan molcheꞌn yi wutz cebadajaꞌtz ẍchixoꞌl yi eꞌ mos Booz, jalen cuꞌn yi bajeꞌn yi cosech tetz cebada tu triw. Ej nin choꞌn najeweꞌn Rut-tz te yi tlib.