RUT
Yi taꞌteꞌn Elimelec tuml yi najal Moab
1
1 I tzun bantz te yi tiemp yi na chicawun tzaj yi eꞌ aj pujul xtisyaꞌ, cweꞌn tzun jun chin weꞌj beneꞌn tziꞌn Judá. At tzun jun yaj yi aj Beléna iꞌ, cwent Judá. Nintzun aj tan najeweꞌn ẍchixoꞌl yi eꞌ aj Moab tuml yi txkel tu yi cob cyꞌajl. 2 Yi biꞌ yi jun yajaꞌtz iꞌtz Elimelec.b Ma yi txkel, Noemí biꞌ.c Ma yi cob cyꞌajl na chibiꞌaj Mahlónd tu Quelión.e Eꞌ aj Efrata nka Belén.Choꞌn tzun cyoponeꞌntz ẍchixoꞌl yi eꞌ aj Moab tan najeweꞌn. 3 Yi xoneꞌn tiemp nintzun quim tetz Elimelec. Jalt yi Noemí yi txkel cyaj cyen scyuchꞌ yi cob tal. 4 Choꞌn tzun jaleꞌn quixkel yi cob yajaꞌtz ẍchixoꞌl yi eꞌ aj Moab. Orfaf biꞌ jun, nin Rutg biꞌ yi junt. Lajuj tzun yob eꞌ aꞌtij Noemí scyuchꞌ le amaꞌlaꞌtz.
Yi chipakxeꞌnt Noemí tu Rut Belén
5 I tzun bantz, nintzun eꞌ quim cyetz Mahlón tu Quelión. Nintzun cyaj cyen tetz Noemí ẍchuc, na nsken quim yi chmil. 6 Tbital tzun Noemí jun stziblal scyetz yi aj Moab yi nsken el kꞌajab Ryos scyeꞌj yi eꞌ tanum yi xonl Israel, na quiꞌct weꞌj at ẍchixoꞌl. 7 Nintzun xtxum Noemí tan tajeꞌnt tzaj Judá. Cyeleꞌn tzaj tzuntz kale najlcheꞌt. Nin eꞌ xom tzaj yi cob tlib teꞌj. 8 Te yi na chixon tbeꞌ nintzun taltz scyetz:
—Ma jaluꞌ, baꞌn cxaꞌj wok scyeꞌj itaj itxuꞌ. Lok takꞌ Kataj yi banl tzitibaj chi miban wok tan banleꞌn baꞌn scyetz yi eꞌ kꞌajtzun wal. 9 Nin lok takꞌ iꞌ amaꞌl tzitetz tan toqueꞌn junt ichmil, bantz jaleꞌn junt balaj inajbil, stzun Noemí.
Te yi ntaxk chijatx quib nintzun ben Noemí tan stzꞌubleꞌn xak chitziꞌ, poro oꞌkl nin eꞌ bantz. 10 Nintzun cyaltz:
—Quiꞌ naꞌ, nkajeꞌn ketz teꞌjuꞌ le tanumuꞌ.
11 Poro nin oc Noemí chꞌinchꞌuj scyeꞌj:
—Wal, quitajeꞌnk. ¿Mbi xac tzitetz yil cxomwok nin sweꞌj? Yi wetz quiꞌt chijal wal tan itumeweꞌn scyeꞌj. 12 Ma na quitajeꞌnk itetz xe caꞌl itaj. Na yi in wetz quiꞌt tzꞌoc junt wuchmil, na ja chintijin. ¿Mptzun nink tzꞌoc junt wuchmil, ptzun ninink kawitbej kib axen, nin ptzun ninink tzꞌoc lacꞌp jun tal niꞌ sweꞌj, chijal wal, 13 tzunk ichꞌiweꞌ wok jalen yil chichꞌuy tan itumeweꞌn scyeꞌj? Quiꞌt nin tzunk tzꞌoc ichmil woktz tan chichꞌiweꞌn. Quiꞌ wal, quiꞌc rmeril, na yi Kataj ja takꞌ sotz cꞌuꞌlal swetz. Nin mas tcuꞌn sotzok incꞌuꞌl tziteꞌj yi kol wilnin ax itetz yi na sotz icꞌuꞌl sweꞌj, stzun Noemí scyetz.
14 Mas tcunin tzun cyokꞌeꞌntz swutz iꞌ. Wiꞌtzbilt len xtxumul Orfa tan tajeꞌn tetz scyeꞌj yi eꞌ taj. Nintzun ben iꞌ-tz tan stzꞌubleꞌn xak stziꞌ yi tlib, nin chijatxol quib. Ma tetz Rut nintzun cyaj cyentz teꞌj Noemí. 15 Beneꞌn tzun tlol Noemí tetz:
—Xmaynin abalc Orfa, ja aj le tetz tanum. Ja aj tan chilokꞌeꞌn yi tetz ryosil. Xominin teꞌj.
16 Poro nintzun ben tlol Rut tetz iꞌ:
—Naꞌ, qui na waj yil chin lajninuꞌ. Na qui na waj wil cyenuꞌ. Chinxomok nin kalel tzꞌajnintuꞌ. Nin naꞌ ltzꞌaꞌt cuntuꞌ, yaꞌtz nin lnaꞌteꞌt wetz. Yi teruꞌ tanumuꞌ iteꞌn nin weri intanumaꞌtz tzꞌantz. Yi Ryosiluꞌ yaꞌtz nin weri inRyosil tzꞌantz. 17 Kalel quimeꞌtuꞌ, yaꞌtz nin lchinquimeꞌt wetz. Kalel mukxeꞌtuꞌ, choꞌn nin lchinmukxij wetz. Nin kol tzinjatxlen wib teꞌjuꞌ, takꞌ tzaj Kataj incaws. Ntin cuꞌn quimichil kajatxon cuꞌn tuchꞌuꞌ, stzun Rut tetz Noemí.
18 Yi tilol Noemí yi xtxumuꞌn Rut quiꞌt oc iꞌ chꞌinchꞌuj teꞌj.
19 I tzun yi quicyꞌeꞌntz, choꞌn tzun cyoponeꞌntz le tal tnum Belén. Yi cyocomponeꞌn Belén nintzun xeꞌtij yoltz ẍchixoꞌl cyakil wunak, nin je cyaltz:
—Yi xnaꞌneꞌj ¿nkꞌeꞌtz peꞌ iꞌ Noemí? cheꞌch.
20 Nintzun ben stzaꞌwel Noemí scyetz:
—Quiꞌt cyaluꞌ Noemí swetz. Ma na cyaleꞌuꞌ Marah swetz. Na Kataj, yi na xcyeꞌ te cyakil, ja takꞌ wiꞌnin sotzaj cꞌuꞌlal swetz. 21 Yi keleꞌn tzoneꞌj at cyakil yi tajweꞌn sketz. Ma jaluꞌ quiꞌt nin atin cuꞌnt. Poro yaꞌstzun tajbil Kataj sweꞌj, na iꞌ yi jun yi na xcyeꞌ te cyakil nin na ja takꞌ wiꞌnin sotzaj cꞌuꞌlal swetz, stzun Noemí bantz.
22 Yaꞌstzun bantz yi pakxeꞌn tzaj Noemí tu Rut le amaꞌl cwent Moab. Yi Rut iꞌ jun aj Moab. I tzun yi cyoponeꞌn Belén, na xeꞌt cun tzun yi jeꞌseꞌn cosech tetz cebada.