Eꞌchk wiꞌtzbil yol yi talnak Luwiy
23
1 Yi eꞌchk yoleꞌj, iꞌtz yi eꞌchk wiꞌtzbil yol yi talnak Luwiy:“I inaꞌtz in Luwiy, yi cyꞌajl Isaí.
I inaꞌtz yi yaj yi ja takꞌ Ryos kꞌej.
I inaꞌtz yi rey yi ja jeꞌ xtxaꞌol yi Ryosil kꞌajtzun kamam Jacow.
I inaꞌtz yi jun aj bitz cwent Israel yi chin okꞌbil nin na bitzin.
Nin je na waleꞌj:
2 Yi espíritu tetz Kataj na xcon intziꞌ taꞌn.
Na na xcon intziꞌ tan talcheꞌn yi tetz tajbil.
3 Yi ketz kaRyosil ja wiꞌt jilon,
yi qꞌuicyꞌlom ketz ja tal swetz:
‘Alchok yi tzꞌaknak cuꞌn yi na oc tan pujleꞌn xtisyaꞌ,
nin yi na cyek ẍchiꞌ yi in, yi na chicawun,
4 choꞌn tzuntz taneꞌn chibalajil chi na je ul kꞌej.
Choꞌn cuꞌn quitaneꞌn chi yi tkan kꞌej, yi na je ul
tul jun kꞌej yi quiꞌc sbakꞌ at.
Na na xcyeꞌ tan txaꞌxaxeꞌn yi chꞌim taꞌn, yi sken wiꞌt acꞌ tan aꞌbal,’ stzun Ryos.
5 Yaꞌstzun mimban wetz tan cawuꞌn.
Chaꞌstzun te stkꞌeꞌ chibanl yi eꞌ inxonl.
Na ja suk Ryos yi tetz yol nin ja bixeꞌ taꞌn tetz ben kꞌej ben sak,
nin yaꞌs tzun sbneꞌ.
Na iꞌ na akꞌon amaꞌl swetz tan intxꞌaconeꞌn.
Nin list iꞌ tan banleꞌn taneꞌn cyakil yi wajbil.
6 Ma cyakil yi eꞌ mal nak,
chelepon joꞌliꞌn chi na el joꞌliꞌn yi txꞌiꞌx
tkꞌakꞌ, yi cyaꞌl jun na tzꞌamon.
7 Xconk eꞌchk maꞌcl cyaꞌn tan joꞌleꞌn tkꞌakꞌ,
tan cyeleꞌn cuꞌn swutz.”
Chibiꞌ yi eꞌ balaj sanlar Luwiy
8 Je chibiꞌ yi eꞌ sanlar yi ateꞌ jak caꞌwl Luwiy yi chin cham nin eꞌ: Joseb-basebet, yi cyꞌajl Hacmoni. Iꞌ yi bajxom squibaj yi cobt sanlar yi chin cham nin eꞌ. Na ja xcyeꞌ iꞌ tan chibiyleꞌn cuꞌn waxak cient sanlar tul jun ntziꞌ kꞌej tan yi tetz lans. 9 Yi caꞌp sanlar yi chin cham nin iꞌtz Eleazar, yi cyꞌajl Dodo yi ahohita. Aꞌtij iꞌ te Luwiy te yi cyaꞌteꞌn le amaꞌl Pasdamim. Poro yi cyoqueꞌn yi eꞌ filistey tan oyintziꞌ kloꞌ scyeꞌj, nintzun el ojk yi eꞌ xonl Israelaꞌtz tan xoꞌw. 10 Poro yi Eleazaraꞌtz qui nin el ojk nin oc tan oyintziꞌ nin tan chibiyleꞌn cuꞌn yi eꞌ filisteyaꞌtz jalen yi cꞌubcꞌaxeꞌn yi kꞌab tan yi kꞌeꞌxeꞌn te yi tetz spar. Te yi jun kꞌejaꞌtz eꞌ txꞌacon scyeꞌj yi eꞌ filistey tan porer Kataj. Itzun yi quilol yi eꞌ mas sanlar yi mbi ban Eleazar nintzun eꞌ xom nin wutz chicoc yi eꞌ aj filisteyaꞌtz tan majleꞌn len yi eꞌchk takleꞌn yi nsken cyetzaj tul yi oyintziꞌaꞌtz.
11 Yi toxeꞌn sanlar yi chin cham nin, iꞌtz Sama, yi cyꞌajl Age yi aj Ara. Na yi cweꞌn chichamol quib yi eꞌ filistey le amaꞌl Lehi, kale atit jalaj amaꞌl yi awij jun jilwutz txicun swutz, nintzun eꞌ el ojk yi eꞌ sanlar cwent Israel ẍchiwutz. 12 Poro yi Sama-aꞌtz qui nin el ojk ma na ja xcyeꞌ cuꞌn nicyꞌal yi jalaj txꞌotxꞌaꞌtz tan colcheꞌn yi ujul ẍchikꞌab yi eꞌ filistey. Nin xcyeꞌ iꞌ tan chibiyleꞌn cuꞌn. Te yi jun kꞌejaꞌtz ẍchaj Ryos yi tetz porer.
13 Ej nin at tzun jun tir te yi tiemp tetz cosech, yi at ox wiꞌtz sanlar cwent Luwiy yi chin cham nin eꞌ, yi eꞌ cu tzaj tan cyoponeꞌn kale atit Luwiy le picy yi na biꞌaj Adulam. Ej nin te yi jun tiempaꞌtz choꞌn at chicampament yi eꞌ sanlar filistey le jocoꞌj yi na biꞌaj Refaim. 14 Ma tetz Luwiy choꞌ at le picy yi na biꞌaj Adulam. Nin te yi tiempaꞌtz at jun kꞌuꞌj sanlar filistey, yi ateꞌ tan qꞌuicyꞌlomiꞌn le tnum Belén. 15 Sajeꞌn tzun jun chin saktziꞌ te Luwiy nintzun taltz: “¡Atuꞌlk jun tan takꞌleꞌn muꞌẍ wucꞌaꞌ te yi aꞌ yi na jetzaj tul julil aꞌ yi at swutz cuꞌn yi sawanil Belén!”
16 Itzun yi ox wiꞌtz sanlaraꞌtz yi chin cham nin eꞌ, nintzun eꞌ quicyꞌeꞌntz tul chicampament yi eꞌ filistey tan cyoponeꞌn kale atit yi julil aꞌaꞌtz yi at swutz yi sawanil Belén. Nintzun jetzaj muꞌẍ aꞌ nin ben quicyꞌaltz tetz Luwiy. Poro qui nin ucꞌaꞌ Luwiy teꞌj, ma na nin el kojol yi aꞌaꞌtz wuxtxꞌotxꞌ tetz jun oy tetz Ryos. 17 Itzun taltz: “Kataj, quiꞌc rmeril tan jeꞌn incꞌajal yi aꞌ-eꞌj, na niꞌcuꞌn chi ik yi chiẍchꞌel yi ox insanlareꞌj, yi ja cyakꞌ quib tkꞌab quimichil tan ticyꞌleꞌn tzaj.” Qui nin tzun jeꞌ tcꞌajal yi aꞌ-aꞌs. Yaꞌstzun eꞌ ban yi ox sanlaraꞌtz yi chin cham nin eꞌ.
18 Ma yi Abisai, yi titzꞌun Joab, nin yi tal wutzileꞌn naꞌ Sarvia, iꞌ yi wiꞌtz bajxom scyeꞌj yi junaklaj sanlaraꞌtz, yi chin cham nin eꞌ. At jun tir yi nin xcyeꞌ iꞌ tan chibiyleꞌn ox cient contr tan yi tetz lans. Tan yi xtxolbilaꞌs wiꞌnin tzun kꞌej jal ẍchiwutz yi junklaj sanlaraꞌtz yi chin cham nin eꞌ. 19 Jal mas kꞌej ẍchiwutz cyakil yi eꞌ mas. Chaꞌstzun te cyajeꞌn cyen iꞌ tetz chibajxom. Poro qui nin jepon kꞌej iꞌ chi ban chikꞌej yi ox wiꞌtz sanlaraꞌtz.
20 Ma Benaía, yi cyꞌajl Joiada, yi aj Cabseel, iꞌ jun yaj yi chin cham nin, yi wiꞌnin takleꞌn mbnix taꞌn. Xcyeꞌ iꞌ tan chiquimseꞌn cuꞌn cob cyꞌajl Ariel, yi aj Moab. Ej nin at jun kꞌej yi na tzan cuꞌn jun chin cꞌub aꞌbal yi choꞌn cweꞌn iꞌ tul jun chin jul tan biyleꞌn cuꞌn jun león. 21 Nchaꞌtz xcyeꞌ iꞌ tan biyleꞌn cuꞌn jun aj Egipto, yi nim wutz tkan, yi cyꞌaꞌn jun chin lans taꞌn tan oyintziꞌ. Ma tetz Benaía i tuꞌ tetz xtxꞌamij xcon tan oyintziꞌ. Poro xcyeꞌ iꞌ tan majleꞌn len yi jun lansaꞌtz tkꞌab yi yajaꞌtz. Nin iteꞌn nin tetz lansaꞌtz xcon tan Benaía tan biyleꞌn cuꞌn. 22 Tan yi jun xtxolbilaꞌseꞌj akꞌlij mas kꞌej iꞌ ẍchiwutz yi junaklaj sanlaraꞌtz yi chin cham nin eꞌ, 23 poro qui nin jepon teꞌj yi kꞌej yi akꞌlij scyetz yi oxt wiꞌtz sanlar yi chin cham nin eꞌ. Tan tuꞌ yi ẍchamil iꞌ yi nẍchaj, nintzun oc iꞌ-tz tetz chibajxom yi eꞌ sanlar qꞌuicyꞌlom tetz Luwiy.
24 Je chibiꞌ yi eꞌ sanlaraꞌtz yi chin cham nin eꞌ: Asael, titzꞌun Joab; Elhanán cyꞌajl Dodo yi aj Belén; 25 Sama yi aj Harod; Elica, yi nchaꞌtz aj Harod; 26 Hekes, yi aj Paltit; Ira cyꞌajl Iques, yi aj Tecoa; 27 Abiezer, yi aj Anatot; Mebunai, yi aj Husa; 28 Salmón, yi ahohita; Maharai, yi aj Netofa; 29 Heleb yi cyꞌajl Baana, yi aj Netofa; Itai cyꞌajl Ribai yi aj Gabaa, cwent yi amaꞌl tetz Benjamín; 30 Benaía yi aj Piratón; Hidai, yi choꞌn najlij tziꞌ yi tal aꞌ yi na biꞌaj Gaas; 31 Abi-albón, yi aj Arba; Azmavet, yi aj Barhurim; 32 Eliaba, yi aj Saalbón; Jonatán, jun scyeri eꞌ xonl Jasén; 33 Sama, yi aj Arar; Ahíam cyꞌajl Sarar, yi nchaꞌtz iꞌ aj Arar; 34 Elifelet, yi cyꞌajl Ahasbai, jun xonl Maaca; Eliam, cyꞌajl Ahitofel, yi aj Gilo; 35 Hezrai, yi aj Carmel; Paarai, yi aj Arb; 36 Igal, cyꞌajl Natán yi aj Soba; Bani, yi aj Gad; 37 Selec, yi aj Amón; Naharai, yi aj Berot, yi ekum makbil flech tetz Joab, yi tal naꞌ Sarvia; 38 Ira, yi aj Jatir; Gareb yi nchaꞌtz iꞌ aj Jatir; 39 tu Urías yi hitita. Yi tajlal cyakil yi eꞌ yajaꞌtz iꞌtz junaklaj tu juk chixoneꞌn.