Yi bitz yi bnixeꞌn tan Luwiy tan tyoẍineꞌn tetz Ryos
(Sal 18)
22
1 Yi jun bitzeꞌj yaꞌstzun xcon tan Luwiy tan takꞌleꞌn yi kꞌajsbil tetz Kataj, nin tan tyoẍineꞌn tetz yi claxeꞌn iꞌ tkꞌab Saúl nin ẍchikꞌab yi eꞌ mas contr.2 Je yol iꞌeꞌj:
“Kataj Ryos, iluꞌ colol wetz,
na nicyꞌcuꞌn iluꞌ chi jun amaꞌl wutz cꞌub kale na incol wib ẍchikꞌab incontr.
Choꞌn kꞌuklij incꞌuꞌl teꞌjuꞌ,
na iluꞌ colpinl wetz.
3 Na iluꞌ yi wutz kotxꞌ kale na incolwit wib ẍchikꞌab eꞌ incontr.
Nin choꞌn cuꞌn taneꞌnuꞌ chi jun makbil flech.
Na tan tuꞌ yi teruꞌ poreruꞌ, ja chinclax.
Niꞌcuꞌn iluꞌ chi jun wutz cꞌub yi nim wutz tkan, kale na incolwit wib.
Na iluꞌ colol wetz tkꞌab eꞌchk biyoꞌn.
4 Na wakꞌ inkꞌajsbil teruꞌ Taꞌ, na at wiꞌnin kꞌejuꞌ.
Nin yi na injak ẍchꞌeybil wetz teruꞌ, na ocuꞌ tan incolcheꞌn ẍchikꞌab yi eꞌ incontr.
5 Na sotz incꞌuꞌl tan quimichil yi atin cuꞌn.
Na chi ik yi pakꞌbil mar nsaj swibaj.
Nin ja chinxob tan yi ẍchamil yi tojkbil aꞌ.
Na nsken chintxꞌamxij takꞌun.
6 Quimichtlen tuꞌ atineꞌt.
Txant nin nopon ẍchixoꞌl almaꞌ.
7 Mmeꞌl tzun intziꞌ tan jakleꞌn ẍchꞌeybil wetz teruꞌ Taꞌ.
Nin ja opon yi toꞌkl walmaꞌ kale atiteꞌtuꞌ.
Nin ja tbituꞌ intziꞌ inkul.
8 Sajeꞌn tzun jun chin wutzileꞌn coblajnob.
Nin cyakil yi wuxtxꞌotxꞌ nyucan taꞌn.
Yucan cyakil wi munt tan yi ẍchiꞌchbeꞌn cꞌuꞌl Kataj.
9 Ej nin el tzaj sib le juꞌ taneꞌn.
Nin el tzaj kꞌakꞌ tu xtxakꞌakꞌ le stziꞌ,
yi nxcyeꞌ tan stzꞌeꞌseꞌn cyakil eꞌchk takleꞌn.
10 Cweꞌn tzun ritꞌol yi wutz tcyaꞌj, nintzun saj Kataj le cuꞌnak tzaj.
At jun cꞌoloj sbakꞌ, yi chin kꞌek nin jakꞌ tkan.
11 Choꞌn tzun jeꞌn tzaj iꞌ tibaj jun querub.
Nintzun saj xicyꞌintz yi jun querubaꞌtz.
Sajeꞌn tzun juẍp tul cyekꞌekꞌ.
12 Xcon yi tzꞌoꞌtz taꞌn,
nin xcon yi sbakꞌaꞌtz taꞌn yi at aꞌ tul,
chi ik jun mantial tetz oyintziꞌ.
13 Ej nin te yi tetz pakꞌpuchal,
el tzaj cꞌub aꞌbal tu xtxakꞌakꞌ yi wiꞌnin lamcaneꞌn.
14 Jiloneꞌn tzun Katajtz, yi wiꞌtz Ryos, chi na ban kꞌancyok yi wiꞌnin na jincan.
Na iꞌ yi wiꞌtz Ajcaw tetz yi tcyaꞌj tu yi wuxtxꞌotxꞌ.
15 Nintzun saj cꞌoxol eꞌchk flech, yi xlitzꞌ cuꞌn.
Eꞌ el tunin xit yi tetz contr beneꞌn tziꞌn.
Tircuꞌn tzun eꞌ contraꞌtz, eꞌ loꞌon taꞌn.
16 Ej nin lajluchax yi txꞌotxꞌ yi at xe mar.
Nchaꞌtz ja lajluchax yi mbi at jakꞌ txꞌotxꞌ.
Yaꞌstzun bantz yi toqueꞌn Kataj tan cawseꞌn yi eꞌ contr.
Xew tuꞌ iꞌ xconk taꞌn tan chicawseꞌn.
17 Cweꞌn tzaj tzun kꞌab Ryos tan injeꞌn tzaj tul yi mar yi chin xeꞌ nin.
18 Ja chinclax taꞌn tkꞌab yi wiꞌtz incontr, yi wiꞌnin ẍchamil,
nin ja chinclax taꞌn ẍchikꞌab yi eꞌ yi wiꞌnin na chiꞌch chicꞌuꞌl sweꞌj.
Wech na at cuꞌn mas cyetz chichamil tzinwutz wetz.
19 Ja choꞌc tan impileꞌn te yi atin tul sotz cꞌuꞌlal.
Poro yi Wajcaw ja oc tan incolcheꞌn.
20 Ja neꞌl liwr taꞌn.
Nin ja chin clax taꞌn,
tan tuꞌ yi na pekꞌ iꞌ sweꞌj.
21 Yaꞌstzun ban iꞌ sweꞌj.
Xomcyen tuꞌ te yi imbalajil.
Xomcyen tuꞌ te yi skojal walmaꞌ.
22 Na ilenin ja chinxom te yi tetz tajbil.
Quiꞌc jun tir yi jak impaj yi caꞌwl iꞌ.
Quiꞌc jun tir yi jak neꞌl xlaj yi tetz beꞌ.
23 At cyakil yi caꞌwl iꞌ le inwiꞌ.
Nin ilenin ja chinxom teꞌj.
24 Ja injoy puntil tan inxomeꞌn te yi tetz tajbil.
Ej nin ilenin ja inmak wib tan banleꞌn eꞌchk takleꞌn cachiꞌ.
25 Yaꞌstzun yi oy yi ja takꞌ iꞌ swetz.
Xomcyen tuꞌ te yi imbalajil.
Xomcyen tuꞌ te yi ẍeꞌn wutaneꞌn swutz iꞌ.
26 Wajcaw, na el cunuꞌ te yi yoluꞌ,
scyetz yi eꞌ yi na cheꞌl cuꞌn te chiyol swutzuꞌ.
Chumbalaj nin na banuꞌ, scyetz yi eꞌ yi baꞌn na chiban.
27 At banl talmaꞌuꞌ squibaj yi eꞌ yi qui na chijuch quil.
Ma scyetz yi eꞌ yab, quiꞌc muꞌẍ tal banluꞌ scyeꞌj.
28 Iluꞌ colol cyetz yi eꞌ cꞌulutxum.
Ma yi eꞌ yi na cyocsaj quib nim tu cyajtzaꞌkl, na el chikꞌej tanuꞌ.
29 Kataj iluꞌ txekunl tetz imbeꞌ.
Na na oc yi tzꞌoꞌtz tanuꞌ tetz tkan skil tzinwutz.
30 Tan tuꞌ yi atuꞌ tan wuchꞌeyeꞌn, chinxcyek te jun cꞌoloj incontr.
Tan tuꞌ yi atuꞌ tan wuchꞌeyeꞌn, baꞌn nicyꞌ tibaj chitapij tan chibiyleꞌn.
31 Chin tzꞌaknak cuꞌn cyakil yi na ban Kataj Ryos.
Baꞌn kꞌukek kacꞌuꞌl te yi sukiꞌnt taꞌn sketz.
Na na oc iꞌ tan kacolcheꞌn yi oꞌ yi choꞌn kꞌuklij kacꞌuꞌl teꞌj iꞌ.
32 Quiꞌc junt Ryos at.
Ntin cuꞌn Kataj Jehová.
Na quiꞌc junt wutz cꞌub at,
tan kacolol kib tibaj, chi taneꞌn kaRyosil.
33 Tan iꞌ na jal inchamil.
Nin tan iꞌ na noꞌc tetz tzꞌaknak cuꞌn.
34 Tan iꞌ na chintzꞌitpun chi na ban masat,
yi na el ojkuj xoꞌlak eꞌchk wutz yi nim wutz tkan.
35 Iꞌ chusul wetz tan oyintziꞌ.
Nin iꞌ na akꞌon ẍchamil inkꞌab,
tan kinleꞌn tzaj eꞌchk cꞌoxbil flech, yi brons cuꞌn.
36 Wajcaw, iluꞌ colol wetz.
Tan tuꞌ banluꞌ sjalok wiꞌnin inxonl.a
37 Iluꞌ nucꞌul tetz imbeꞌ, tan qui injeꞌn jiẍp.
38 Tan iluꞌ ja chinxcyeꞌ tan chitzꞌamleꞌn yi eꞌ incontr,
yi chiloꞌoneꞌn cyen waꞌn, kalenaꞌs tzun nchimpakxij.
39 Puchꞌij cunin nchisaj waꞌn.
Nin ja chicyaj jakꞌ wukan.
40 Iluꞌ mmakꞌon inwalor tan oyintziꞌ.
Tan iluꞌ nchimejeꞌ yi eꞌ incontr tzinwutz.
41 Tan iluꞌ ncheꞌleꞌt ojk incontr tzinwutz.
Ja chinxcyeꞌ tan chisotzajeꞌn yi eꞌ yi ja chiꞌch chicꞌuꞌl sweꞌj.
42 Ja chiẍchꞌin tan jakleꞌn ẍchꞌeybil cyetz,
poro cyaꞌl jun mmoꞌc tan chicolcheꞌn.
Ja chiẍchꞌin tetz Kataj,
poro qui mmoꞌc iꞌ tan quichꞌeyeꞌn.
43 Joqꞌuij cuꞌn ncheꞌ wulej,
nin ja chiben tan cyekꞌekꞌ.
Ja cheꞌl inmasol chi na ban tzꞌis.
44 Iluꞌ nchincolon ẍchikꞌab yi eꞌ intanum,
yi ja choꞌc tan contriꞌn sweꞌj.
Tan iluꞌ ja noꞌc tetz wiꞌtz bajxom squibaj eꞌchk nación.
Na ja choꞌc wiꞌnin wunak yi qui wajskeꞌn chiwutz, jak incaꞌwl.
45 Jalcuꞌn ja chiban taneꞌn yi wetz incaꞌwl.
Eꞌ awer nak, poro ja cyocsaj quib juy tzinwutz.
46 Ja chicotxcax yi eꞌ awer nakaꞌtz.
Wiꞌnin chilucneweꞌn tan xoꞌw,
yi cyeleꞌn tzaj le chitnumil tan yi chijatxol quib tinkꞌab.
47 Yi Kataj, yi ketz kaRyosil, itzꞌ nin teraꞌtz.
Kakꞌeꞌ bin kꞌej iꞌ, na iꞌ qꞌuicyꞌlom ketz nin iꞌ colol ketz.
48 Ja ticyꞌsaj cꞌuꞌl scyeꞌj eꞌ incontr.
Tan iꞌ ja choꞌc yi eꞌchk tnumaꞌtz jakꞌ incaꞌwl.
49 Na tan tuꞌ iꞌ ja chinclax ẍchikꞌab incontr.
Nin tan iꞌ njaleꞌt inkꞌej ẍchiwutz.
Ej nin tan tuꞌ iꞌ ja neꞌl liwr ẍchikꞌab yi eꞌ biyol nakaꞌtz.
50 Taꞌ, tan cyakil yi mbanuꞌ sweꞌj, tzintxoleꞌ yi balajiluꞌ scyetz cyakil jilwutz wunak.
Nin swakꞌeꞌ inkꞌajsbil teruꞌ Taꞌ.
51 Tan iluꞌ na txꞌaconeꞌt yi rey yi jeꞌnak xtxaꞌoluꞌ.
Na ilenin xomij yi xtxaxl talmaꞌuꞌ swiꞌbaj,
nin xomok scyeꞌj eꞌ inxonl sbneꞌ opon tunintz,”
stzun Luwiy bantz tul yi tetz bitz.