21
1 Itzun bantz te yi tiemp yi na cawun tzaj Luwiy, cuꞌ jun chin wutzileꞌn weꞌj, yi ox cuꞌn yob ban. Toqueꞌn tzun Luwiy tan jakleꞌn tkanil tetz Kataj Ryos, yi mbitzuntz yi weꞌj. Stzaꞌwel tzun Kataj tetz Luwiy: “Yi weꞌj iꞌtz tan paj yi biyolnakiꞌn yi mban kꞌajtzun Saúl tu yi eꞌ tetz xonl, na nin eꞌ oc tan chibiyleꞌn cuꞌn yi eꞌ aj Gabaón.”a 2 Beneꞌn tzun mantar Luwiy tan chichakleꞌn tzaj yi eꞌ aj Gabaónaꞌtz. (Yi eꞌ aj Gabaónaꞌtz, nkꞌeꞌtz eꞌ xonl kꞌajtzun Jacow, ma na eꞌ jun kꞌuꞌj amorreo, yi mbnix nak jun trat tan Josué scyuchꞌ tan qui chisotzajeꞌn.) Nintzun jak scyetz:
3 —¿Mbi tajweꞌn tan imbnol tan ichꞌeyeꞌn? ¿Nin ẍeꞌn tzimban tan ẍchojleꞌn yi il yi mbajij tziteꞌj, bantz tkꞌol Kataj, kaRyosil yi tetz banl junt tir skibaj yi oꞌ ketz, yi oꞌ tanum iꞌ?
4 —Nkꞌeꞌtz choꞌn meꞌl kawiꞌ te pwok nka or, tuchꞌ kꞌajtzun Saúl nin scyuchꞌ yi eꞌ tetz xonl, ej nin nchaꞌtz quiꞌc rmeril yi nink koꞌc tan quimseꞌn jun ẍchixoꞌluꞌ.
—Baꞌn bin tzitalwok swetz yi mbi iꞌ ilaꞌtz yi itetz itajbil tan imbnol.
5 Cyalol tzun yi eꞌ aj Gabaónaꞌtz tetz Luwiy:
—Yi tajbil Saúl iꞌtz tan kelseꞌn cuꞌn swutz, nin tan kalajeꞌn len tulak eꞌchk kaꞌamaꞌl yi at ẍchixoꞌluꞌ. 6 I bin yi ketz kajbil iꞌtz yi nink takꞌuꞌ juk yaj sketz scyeri yi eꞌ xonl kꞌajtzun Saúl bantz chijeꞌn kachꞌimbal swutz Kataj, tul yi amaꞌl Gabaa, kale nchuyeꞌt Saúl, yi jun yi jeꞌnak xtxaꞌol Ryos tan xconeꞌn tetz chireyiluꞌ yi eꞌuꞌ xonl kꞌajtzun Israel.
—Baꞌn bin ko yaꞌtz itajbil. Baꞌn cheꞌ wakꞌ yi juk yajaꞌtz tzitetz, stzun yi rey bantz scyetz.
7 Ej nin, tan tuꞌ yi trat yi banak Luwiy tu Jonatán swutz Ryos, yi chin xan nin, nintzun el kꞌajab Luwiy te Mefi-boset, yi mamaj Saúl. 8 Poro nin eꞌ txꞌamxij yi cob tal jun xnaꞌn yi na biꞌaj Rispa, yi meꞌl Aja, yi caꞌp txkel Saúl taneꞌn, yi na chibiꞌaj, Armoni tu Mefi-boset. Nchaꞌtz eꞌ txꞌamxij yi oꞌ tal jun xnaꞌn yi na biꞌaj Merab, yi bajx meꞌl kꞌajtzun Saúl yi njal tu yaj Adriel, yi cyꞌajl Barzilai, yi aj Mehola. 9 Nin eꞌ ben jatxol ẍchikꞌab yi eꞌ aj Gabaón. Ma yi eꞌ cyetz nin eꞌ bentz tan chichꞌimbajeꞌn swutz Kataj Ryos wi jun wutz.
10 Ma tetz Rispa, yi meꞌl Aja, nin oc tkꞌol yi beꞌch tetz yi na ẍchaj bis oꞌkl. Nintzun bentz kale atit chiwankil yi eꞌ almaꞌaꞌtz nin ben joklok tib jun wutz cꞌub. Choꞌn tzun cyajeꞌn cyentz yi xeꞌteꞌn yi cosech tetz cebada jalen yi xeꞌteꞌn yi tiempil aꞌbal. Nin qui nin takꞌ iꞌ amaꞌl scyetz eꞌ kuꞌs skꞌej, nin qui nin takꞌ iꞌ amaꞌl scyetz yi eꞌ smaron txuc lakꞌbal tan cyoponeꞌn nakajil chiwankil yi eꞌ almaꞌaꞌtz.
11 Itzun yi tbital Luwiy yi yaꞌstzun ban Rispa, yi caꞌp txkel kꞌajtzun Saúl taneꞌn, 12 nintzun cawun tan ticyꞌleꞌn tzaj chitzaꞌjil kꞌajtzun Saúl tu kꞌajtzun Jonatán, yi choꞌn at Jabes, cwent Galaad. Na yi eꞌ aj Jabesaꞌtz, yaꞌstzun yi eꞌ yi eꞌ benak le tnum Bet-sán kale eꞌ jeꞌt chꞌimbaꞌn chiwankil Saúl tu yi tetz cyꞌajl Jonatán wi yi tapij cyakꞌun eꞌ filistey. Choꞌn tzajeꞌn chimajol ẍchikꞌab yi eꞌ filisteyaꞌtz, na yaꞌstzun yi tiemp yi chichakoneꞌn yi eꞌ aj filistey te Saúl le amaꞌl Gilboa. 13 Nchaꞌtz cawun Luwiy tan mukleꞌn chitzaꞌjil kꞌajtzun Saúl tu Jonatán, nin chiwankil yi eꞌ yi eꞌ jeꞌn chꞌimbaꞌn. 14 Ma chitzaꞌjil kꞌajtzun Saúl tu Jonatán, choꞌn mukxeꞌn tul yi nichil Cis yi taj kꞌajtzun Saúl, yi choꞌn at le amaꞌl Sela, cwent Benjamín. Ja bajij quib yi ncawun yi rey Luwiy teꞌj. Kalenaꞌs tzun stzaꞌwel Ryos chiꞌoración tan takꞌleꞌn banl iꞌ squibaj yi tetz tanum.
Yi claxeꞌn Luwiy tkꞌab jun yaj yi nim wutz tkan
15 Itzun bantz, yi eꞌ filistey eꞌ octz tan oyintziꞌ scyeꞌj yi eꞌ xonl Israel. Cyeleꞌn tzaj tzun Luwiy, scyuchꞌ yi eꞌ tetz sanlar tan chicweꞌn poneꞌn tan oyintziꞌ scyeꞌj. Ma yi Luwiy nim tcuꞌn kꞌeꞌxij tul yi jun oyintziꞌaꞌtz. 16 At tzun jun filistey yi na biꞌaj Isbi-benob, jun scyeri eꞌ xonl yi eꞌ wunak yi nim wutz tkan, yi oc kloꞌ tan biyleꞌn cuꞌn Luwiy. Yi lans yi nxcon taꞌn, iꞌtz mas ox arow talil, nin cꞌalij xe cꞌuꞌl jun spar yi acꞌaj bnixeꞌn. 17 Beneꞌn tzun Abisai yi tal Sarvia tan ẍchꞌeyeꞌn Luwiy. Nin octz tan oyintziꞌ tuchꞌ yi yajaꞌtz jalen cuꞌn cweꞌn biyol. Tan tuꞌ yi xtxolbilaꞌs eꞌ oc yi eꞌ bajxom yi eꞌ sanlar tan talcheꞌn tetz Luwiy yi tajweꞌn tan sukil iꞌ jun yol yi yaꞌtz wiꞌtzbil tir yi xom iꞌ scyeꞌj tul jun oyintziꞌ, na choꞌn ajlij chicꞌuꞌl te jun chireyil yi itzꞌeꞌt.
Yi eꞌchk oyintziꞌ yi jalnak scyeꞌj yi eꞌ wunak yi nim wutz quikan
18 Itzun yi xomeꞌn tiemp nin bajij junt oyintziꞌ scyeꞌj eꞌ filistey le amaꞌl Gob. Te yi jun tiraꞌtz, Sibecai yi husatit xcyeꞌ tan quimseꞌn cuꞌn jun scyeri eꞌ xonl yi eꞌ wunak yi nim wutz quikan, yi na biꞌaj Saf.
19 Ej nin nchaꞌtz tul junt oyintziꞌ yi bajij scyeꞌj eꞌ filistey le amaꞌl Gob, xcyeꞌ Elhanán cyꞌajl Jair yi aj Belén, tan quimseꞌn cuꞌn jun yaj yi na biꞌaj Goliat, yi aj Gat. Yi lans yi xcon taꞌn nim toleweꞌn, chi toleweꞌn tkan jun scabteꞌ.
20 Ej nin nchaꞌtz bajij junt oyintziꞌ scyeꞌj yi eꞌ filistey le amaꞌl Gat. Nchaꞌtz at junt yaj yi nim wutz tkan, yi chin gan nin iꞌ tan oyintziꞌ. Coblaj cuꞌn wiꞌ kꞌab nin coblaj cuꞌn wiꞌ tkan, kakchak le jujun. 21 Nintzun octz tan xbajtzijeꞌn scyeꞌj yi eꞌ xonl Israel, poro xcyeꞌ Jonatán yi cyꞌajl Simea, yi stzicy Luwiy tan quimseꞌn cuꞌn. 22 Yi cyaj wunakaꞌtz, yi eꞌ cuꞌn nim wutz tkan, eꞌ cuꞌn xonl Refa, yi aj Gat. Poro tircuꞌn eꞌ quim len tan Luwiy scyuchꞌ yi eꞌ tetz sanlar.