Yi contriꞌn yi mban Seba tetz
20
1 At jun scyeri eꞌ xonl Benjamín, yi na biꞌaj Seba yi chin juntlen nin tajtzaꞌkl. Iꞌ cyꞌajl Bicri. Choꞌn tzun at iꞌ Gilgal te yi na tzan yi jun banoꞌn ibaꞌtz ẍchixoꞌl yi eꞌ xonl Judá scyuchꞌ cyakil yi eꞌ aj Israel. Nintzun xcon jun chun taꞌn tan chimolcheꞌn cyakil yi eꞌ xonl Efraín, itzun taltz scyetz: “Quiꞌc ketz tu Luwiy jaluꞌ. Na quiꞌct kawutz quen te jun kaherens teꞌjx, na quiꞌc balajil yi cyꞌajl Isaí-aꞌtz. Baꞌn tcuꞌn kapakxij len xeꞌak ketz kaꞌamaꞌl.”2 Cyakil tzun yi eꞌ xonl Israelaꞌtz quiꞌt eꞌ pekꞌ tu Luwiy, nin choꞌn chixomeꞌn te Seba, yi cyꞌajl Bicri. Ma yi eꞌ xonl Judá yi najlcheꞌ stzi aꞌ Jordán jalen te Jerusalén, qui nin cyaj cyen quilol yi chireyil.
3 Yi pakxeꞌn Luwiy le tetz palacio Jerusalén, nintzun cawun tan chilamxeꞌn yi lajuj caꞌp txkel iꞌ taneꞌn xe jun caꞌl. Yaꞌstzun yi eꞌaꞌs yi eꞌ cyaj cyen tan qꞌuicyꞌleꞌn yi palacio. Nin cyaj cyen qꞌuicyꞌlom yi jun caꞌlaꞌtz tan qui cyeleꞌn ojk. Oc Luwiy tan chicꞌaꞌcheꞌn nin tan chiqꞌuicyꞌleꞌn, poro qui nin witbej tib scyuchꞌ. Niꞌcuꞌn eꞌ ban chi jun xmaꞌlcaꞌn jalen yi nojeꞌn quen quimichil ẍchiwutz.
4 Itzun yi nsken mbnix yi eꞌchk takleꞌnaꞌtz, nintzun cawun Luwiy tetz Amasa:
—Ma jaluꞌ Amasa, chamweꞌ cuꞌn cyakil yi eꞌ yaj aj Judá, nin yil tzꞌel ox kꞌej na waj yil cxuꞌlwok tzoneꞌj tzinwutz.
5 Beneꞌn tzun Amasa tan chichamleꞌn, poro icyꞌ tib yi tajlal yi ox kꞌejaꞌtz yi ntal Luwiy tetz. 6 Talol tzun Luwiy tetz Abisai:
—Xcyek Seba tan kapoꞌtzeꞌn mas swutz yi mban Absalom. Chaꞌstzun te swakꞌeꞌ yi caꞌwl tzatz tan awoqueꞌn tetz bajxom ẍchiwutz yi eꞌ insanlar. Joyaj puntil tan stzꞌamleꞌn chan na qui cunin batz, stew tib tulak eꞌchk tnum yi at tapij solteꞌj, nin quiꞌt kaxcyeꞌ tan stzꞌamleꞌn.
7 Cyakil yi eꞌ sanlar eꞌ el le tnum Jerusalén, yi eꞌ yi ateꞌ jak caꞌwl Joab, scyuchꞌ yi eꞌ aj Creta, tu yi eꞌ aj Gat, yi eꞌ qꞌuicyꞌlom tetz yi rey, nin cyakil yi eꞌ sanlar yi at chiẍcꞌatnakil tan oyintziꞌ, nin eꞌ bentz tan stzꞌamleꞌn Seba. 8 Ej itzun yi cyoponeꞌn nakajil yi jun chin cꞌub yi at Gabaón, nintzun el tzaj Amasa tan chicꞌulcheꞌn. Ma tetz Joab, at cyen yi beꞌch tetz, tetz oyintziꞌ. Nin xe cꞌuꞌl iꞌ at jun cchiluꞌ tul yi cuꞌlbilil. Itzun yi ntaxk chicꞌul quib, nintzun el txꞌakx yi cchiluꞌaꞌtz wuxtxꞌotxꞌ. Jeꞌn tzun tzꞌamol Joab junt tir. 9 Te yi jeꞌn stzꞌamol Joab yi xmatziꞌ Amasa tan stzꞌubleꞌn jalaj xak stziꞌ nin kꞌajlan nin tetz:
—¿Baꞌn peꞌ awutz witzꞌun?
10 Qui nin el xtxum Amasa tetz yi mbi xac yi cchiluꞌ yi cyꞌaꞌn tan Joab. Ma tetz Joab, ja xcon yi cchiluꞌ taꞌn tan xuyleꞌn quen twankil nin sajeꞌn katzol yi wutz cꞌuꞌl, nin el tzaj wokp cyakil yi lasuꞌ jalen yi tponeꞌn wuxtxꞌotxꞌ. Jalcuꞌn quimeꞌn. Nkꞌeꞌtz tajweꞌn tan wiꞌtzeꞌn cuꞌn.
Ma Joab tu yi titzꞌun Abisai, nin eꞌ xom nin tan stzꞌamleꞌn Seba, yi cyꞌajl Bicri. 11 Cweꞌn tzun txiclok jun sanlar cwent Joab xlaj yi wankil Amasa yi choꞌn at nicyꞌal yi beꞌ nin taltz:
—¡Cyakil yi eꞌuꞌ yi na xon chiwiꞌuꞌ te Joab nin te Luwiy, baꞌn chixomninuꞌ te Joab!
12 Ma yi Amasa ẍchuc na tol tib tul yi ẍchꞌel nicyꞌal beꞌ tan paj quimichil. Ma yi tilol yi jun sanlaraꞌtz yi txiclij xlaj, yi cyakil yi eꞌ sanlar na chixcyeꞌ cuꞌn tan xmayeꞌn Amasa, nin octz tan telseꞌn yi wankil Amasa nicyꞌal beꞌ nin opontz taꞌn stziꞌ beꞌ nin jeꞌ tkꞌol jun xbuꞌk tibaj tan teweꞌn cuꞌn, na nin til iꞌ yi wiꞌnin na chixcyeꞌ cuꞌn sanlar tan xmayeꞌn yi wankil Amasa. 13 Yi mbnixeꞌn yi xtxolbilaꞌseꞌj cyakil tzun eꞌ sanlar eꞌ xom nintz te Joab tan stzꞌamleꞌn Seba.
14 Ma Seba choꞌn tzun ticyꞌeꞌn lakak jujun kꞌuꞌj yi eꞌ aj Israel jalen yi tponeꞌn jeꞌn tziꞌn le tnum Abel-bet-maaca. Ej nin cyakil yi eꞌ xonl Bicri eꞌ cham quib teꞌj le jun tnumaꞌtz. 15 Ma yi cyoponeꞌn cyakil yi eꞌ sanlar yi xomcheꞌ te Joab kale atit yi jun tnumaꞌtz, nin eꞌ octz tan wekleꞌn cꞌub tan chijeꞌn poneꞌn wutz tkan yi tapij. Nchaꞌtz eꞌ octz tan kopleꞌn xeꞌ yi tapij bantz sajeꞌn kloꞌ woꞌc. 16 Ẍchꞌineꞌn tzaj tzun jun xnaꞌn yi chin list nin, yi choꞌ at tib yi tapij:
—Quibit tzajuꞌ, chibneꞌuꞌ jun pawor swetz: Cyaleꞌuꞌ tetz Joab yi na waj chinjilon tetz.
17 Yi tponeꞌn Joab nakajil yi tapij, nintzun saj jakol yi xnaꞌn tetz:
—¿Itzun iluꞌaꞌtz taꞌ Joab?
—Inaꞌtz in Joab.
—Bneꞌuꞌ pawor tan tbiteꞌn cobox inyol taꞌ.
—List in tan tbiteꞌn ayol.
18 —Sajleꞌn nin tu nintz na aꞌlchij “Ko at jun takleꞌn yi qui na el atxum tetz ban cẍben le tnum Abel tan jakleꞌn awajtzaꞌkl”, nin yaꞌtz nin na cyulejtz, na chixcyeꞌ tan banleꞌn taneꞌn. 19 I bin jaluꞌ yi oꞌ ketz oꞌ xonl Israel, nin oꞌ cꞌulutxum jak caꞌwl kareyil. Ej nin at wiꞌnin kꞌej katnumil ẍchiwutz wunak. Nxac tzun na tzanuꞌ tan joyleꞌn puntil tan kaxiteꞌn cuꞌn, na yi katnumil, choꞌn at cwent Ryos.
20 —Quil tzatxum yi junaꞌtz, na nkꞌeraꞌtz wajbil tan xiteꞌn cuꞌn yi tnum. 21 Na nkꞌeraꞌtz puntilil na yi ketz kajbil iꞌtz tan stzꞌamleꞌn jun yaj yi na biꞌaj Seba, jun xonl Efraín. Na ja oc tan contriꞌn te yi rey Luwiy. Akꞌwok tzaj sketz, nin list atoꞌt tan cyajeꞌn cyen kilol yi atanum.
—Baꞌn bin taꞌ, list atoꞌt tan cꞌoxleꞌn nin yi wiꞌ teruꞌ.
22 Jalucunin beneꞌn yi xnaꞌn tan tocseꞌn chicꞌuꞌl cyakil wunak yi najlcheꞌ le jun tnumaꞌtz. Nin eꞌ octz tan tamleꞌn len yi wiꞌ Seba, nin ben chijoꞌliltz tetz Joab. Cawuneꞌn tzun Joab tan tocseꞌn yi chun, yi na ẍchaj yi ja taneꞌ yi oyintziꞌ nin yi tajweꞌn tan chipakxeꞌn cyakil yi eꞌ sanlar lakak chiꞌamaꞌl. Ma tetz Joab, ja pakxij jalen Jerusalén tan yol tetz Luwiy.
Yi chibiꞌ yi eꞌ bajxom tetz sanlar yi ateꞌ cwent Luwiy
23 Cyajeꞌn cyen tzun Joab tetz wiꞌtz bajxom scyetz cyakil eꞌ sanlar yi ateꞌ cwent Israel. Ma tetz Benaía, yi cyꞌajl Joiada, iꞌ cyajcawil yi eꞌ aj Creta scyuchꞌ yi eꞌ aj Gat. 24 Ma tetz Adoram, iꞌ ajcaw ban cyen te cyakil eꞌchk akꞌun yi tajweꞌn tan bnixeꞌn tul yi tnum. Ma tetz Josafat, yi cyꞌajl Ahilud, iꞌ tajtzꞌib yi rey ban. 25 Ma tetz Seva, iꞌ yi ajtzꞌib te cyakil yi eꞌchk xtxolbil yi mbajij. Ma tetz Sadoc tu Abiatar yaꞌstzun yi eꞌ wiꞌtz paleꞌ. 26 Ma tetz Ira, yi aj Jair, iꞌ yi paleꞌil yi rey Luwiy.