Yi toqueꞌn Joab tan makleꞌn wutz Luwiy
19
1 Itzun bantz nintzun aꞌlchij tetz Joab yi wiꞌnin bisuneꞌn, nin wiꞌnin tokꞌeꞌn Luwiy tan paj yi cyꞌajl yi nsken quim. 2 Nchaꞌtz quibit cyakil yi eꞌ sanlar yi wiꞌnin bisuneꞌn chireyil tan paj yi tetz cyꞌajl yi nsken quim. Ja kloꞌ chitzatzin, na nsken chitxꞌacon te chicontr, poro tan paj yi quimeꞌn yi cyꞌajl rey, nin oc jun chin bis scyetz. 3 Chaꞌstzun te ewun cuꞌn cyocomponeꞌn tnum, nin wiꞌnin ẍchitxꞌixweꞌn chi ik yi eꞌ cyetz eꞌ el ojk ẍchiwutz chicontr. 4 Inti yi Luwiy, jopij wutz taꞌn tan jun xbuꞌk, nin wiꞌnin tokꞌeꞌn. Nin chin wiꞌ nin bantz tan yol. Itzun taltz “Ay, Ay, lastum incyꞌajl Absalom, lastum incyꞌajl Absalom.”5 Ma tetz Joab, nintzun ben tan yol tetz Luwiy, itzun taltz tetz:
—Ma jaluꞌ ja el chitxꞌix cyakil yi eꞌ sanlar tanuꞌ, yi eꞌ yi ja cyakꞌ quib tan colcheꞌnuꞌ, scyuchꞌ yi eꞌ cyꞌajluꞌ, eꞌ meꞌluꞌ, nin yi bajx txkeluꞌ scyuchꞌ yi eꞌ mas txkeluꞌ. 6 Tan yi xtxolbil yi na banuꞌ ja lajluchax yi mas na pekꞌuꞌ scyeꞌj yi eꞌ contruꞌ ẍchiwutz yi eꞌ yi bintzi nin na chipekꞌ teꞌjuꞌ. Clar cunin ja lajluchax tzinwutz yi quiꞌc kaxac yi oꞌ bajxomuꞌ scyuchꞌ yi eꞌ sanlaruꞌ. Na ja clarin skawutz yi baꞌn kloꞌ mban swutzuꞌ yi ik oꞌ ketz nkaquim swutz yi cyꞌajluꞌ. 7 Ma jaluꞌ tajweꞌn tan beneꞌnuꞌ tan yol ẍchiwutz yi eꞌ sanlaruꞌ tan chimayseꞌn nin tan tyoẍineꞌn scyetz, na ko quiꞌ, sak swutz Kataj yi ninin te jun akaleꞌneꞌj cyaꞌl jun xom wiꞌ teꞌjuꞌ. Ej nin ko yaꞌtz sbneꞌ, yaꞌstzun yi xtxolbil yi chin xoꞌwbil nin sbajok teꞌjuꞌ, swutz cyakil yi eꞌchk takleꞌn yi chin juntlen nin nnojquen swutzuꞌ sajleꞌn nin tunintz, te yi iluꞌ tzaj xicy.
8 Jeꞌn tzun txiclok yi rey nin choꞌn beneꞌn kale atit yi sawanil yi tnum nin coleꞌ cuꞌntz. Yi quibital yi eꞌ wunak yi nsken opon cꞌolchok yi rey kale atit yi sawanil yi tnum, nintzun eꞌ bentz swutz iꞌ.
Yi pakxeꞌn Luwiy Jerusalén
Ma yi eꞌ xonl Israel yi contr eꞌ ban te Luwiy nsken chipakxij lakak chiluwar. 9 Nin ẍchixoꞌl cyakil yi eꞌ aj Israel jal wakꞌ ib ẍchixoꞌl. Itzun na cyaltz: “Yi at tzaj karey, yi Luwiy, ja xcyeꞌ iꞌ tan kacolpeꞌn chikꞌab yi eꞌ contr, yi eꞌ filistey. Poro yi jaluꞌ tan paj Absalom ja el ojk yi kareyil tkatanum. 10 Ma yi Absalom, yi jun yi ja kabixbaj tetz kareyil, ja quim tul oyintziꞌ. ¿Mbitzun na kachꞌiw cuꞌntz? ¿Nxac qui na oc Luwiy tetz kareyil junt tir?” cheꞌch. 11 Ej nin yi jun yolaꞌtz ja opon twiꞌ Luwiy. Nintzun ben jun stziblal tan iꞌ chiwiꞌ yi eꞌ paleꞌ Sadoc tu Abiatar yi ateꞌ Jerusalén: “Chumbalaj yi nink chijilonuꞌ scyetz yi eꞌ wiꞌ banl wiꞌ cwent Judá tan talcheꞌn scyetz: ‘Mbitzuntz yi eꞌuꞌ cyeruꞌ yi eꞌuꞌ xonl Judá, qui na chitxumuꞌ tan woponeꞌn chan le palacio, na ja wit yi yaꞌs tzun chigan cyakil katanum. 12 Wech kitzꞌun kutzicy kib, na iteꞌn nin oꞌaꞌs. Nxac tzun qui na cyakꞌuꞌ amaꞌl scyetz cyakil yi eꞌ mas tan xtxumleꞌn tan wuponeꞌn chan, wech eꞌuꞌ kloꞌ mbajxij ẍchiwutz, poro jaluꞌ ja lajluchax yi eꞌuꞌ wiꞌtzbil te yi xtxumuꞌn.’ 13 Nchaꞌtz ban tziblal tetz Amasa: ‘Je yol Luwiyeꞌj: “Nkꞌeꞌtz ptzun junit oꞌ tzawuchꞌ na kaxonl kib.a Stkꞌeꞌ Ryos jun chin incaws yi ko quil neꞌl cuꞌn te inyol, yi aẍaꞌtz cẍocopon cyen tez wiꞌtz bajxom squibaj eꞌ insanlar tetz xel witzꞌun Joab.” ’ ”
14 Tan yi xtxolbilaꞌseꞌj ja xcyeꞌ Luwiy tan tocseꞌn chicꞌuꞌl yi eꞌ aj Judá, nin junit ban chitxumuꞌn tan talcheꞌn tetz Luwiy: “Baꞌn pakxijuꞌ scyuchꞌ cyakil yi eꞌ yi ateꞌ teꞌjuꞌ.” 15 Eꞌ pakxeꞌn tzun yi rey, nin eꞌ cuꞌultz stziꞌ aꞌ Jordán. Ma yi eꞌ aj Judá eꞌ cuꞌultz le tnum Gilgal tan chicꞌulcheꞌn nin tan chichꞌeyeꞌn tan quicyꞌeꞌn wi yi jun tzanlaꞌaꞌtz.
16 Nchaꞌtz Simei,b jun scyeri yi xonl Gera, jun cyꞌajl kꞌajtzun mam Benjamín, yi choꞌn najlij le aldey Bahurim, chin lajkeꞌl nin xomeꞌn tzaj ẍchixoꞌl yi eꞌ aj Judá yi chicweꞌn tzaj tan cꞌulcheꞌn yi rey. 17 Xomij jun mil yaj teꞌj, yi eꞌ cuꞌn xonl kꞌajtzun Benjamín. Nchaꞌtz xomij Siba, yi martomaꞌ Mefi-boset, yi cyꞌajl kꞌajtzun Saúl, scyuchꞌ yi oꞌlaj cyꞌajl iꞌ. Nchaꞌtz xomij junak chimos scyeꞌj. Bajx quiponeꞌn stziꞌ aꞌ, yi ntaxk cuꞌul yi rey. 18 Nintzun eꞌ icyꞌtz jalaj icyꞌen yi aꞌ tan quichꞌeyeꞌn yi najal yi rey tan quicyꞌeꞌn tzaj wi aꞌ, nin tan banleꞌn alchok mantaril yi rey.
Ma Simei, jun xonl kꞌajtzun mam Gera, cweꞌn tzun mejloktz swutz yi rey, yi ntaxk icyꞌ tzaj wi aꞌ. 19 Itzun taltz tetz:
—Max cꞌuꞌluꞌ swibaj taꞌ. Quiꞌt tzꞌul txꞌakx tcꞌuꞌluꞌ yi eꞌchk cachiꞌ yol yi nwal teruꞌ te yi jun kꞌej yi teleꞌn tzaj ojkuꞌ Jerusalén. Quil taw cunuꞌ chiꞌch cꞌuꞌl le talmaꞌuꞌ tan eꞌchk yol yi nwal teruꞌ. 20 Na inteꞌn na chinnachon te impaj yi minjuch swutzuꞌ. Ej nin in yi bajx ẍchixoꞌl cyakil yi eꞌ xonl Israelc yi nnuꞌl tan cꞌulcheꞌnuꞌ.
21 Ma yi Abisai, yi tal wutzileꞌn Sarvia, nin oc pitol tib xoꞌl yol, itzun taltz:
—¿Nkꞌeꞌtz peꞌ tajweꞌn tan quimeꞌn jun yajeꞌj? Na ja oc tan jisleꞌnuꞌ, na iluꞌ yi rey yi txaꞌij tan Kataj.
22 —Ma jaluꞌ axwok tal Sarvia, quiꞌc itetz tuchꞌ te yi xtxolbileꞌj. ¿Nxac na cxtzanwok tan contriꞌn sweꞌj? Na cyaꞌl jun xonl Israel squimok jaluꞌ, na ja el intxum tetz yi in wetz in chireyil cyakil eꞌ intanum.
23 Beneꞌn tzun tlol tetz Simei:
—Sak swutz Ryos yi jun cuꞌn quil cẍquim tan apaltil, stzun Luwiy bantz.
24 Nchaꞌtz Mefi-boset, yi mamaj kꞌajtzun Saúl nin cuꞌultz tan cꞌulcheꞌn yi rey. Na jetz yi teleꞌn tzaj ojk yi rey Jerusalén jalen yi pakxeꞌnt Jerusalén tu yi tetz kꞌej, qui nin oc il iꞌ tan banleꞌn baꞌn stibil tib, na qui nin xtxꞌaj yi tetz tkan, nin yi xmatziꞌ, qui nin oc il iꞌ tan banleꞌn baꞌn tetz. Nchaꞌtz yi beꞌch tetz chin tzꞌil nin taneꞌn. 25 Itzun yi sajeꞌn iꞌ Jerusalén tan cweꞌn poneꞌn tan cꞌulcheꞌn yi rey, beneꞌn tzun jakol Luwiy tetz:
—¿I bin jaluꞌ aẍ Mefi-boset, nxac qui nin cxomnin sweꞌj te yi weleꞌn ojk?
26 —Max cꞌuꞌluꞌ taꞌ, iluꞌ inreyil, poro iꞌtz tan paj weri inmos, na ja chincawun nin tetz: “Banaj list imburuꞌ bantz inxomeꞌn te kareyil,” chinch bantz tetz. Poro qui nin ban taneꞌn inyol, ntin ja oc iꞌ tan nsubleꞌn. Na sak swutzuꞌ yi at yanaꞌsil wukan, chaꞌstzun te quinin inxomnin teꞌj, chi i bantz. 27 Poro yi iꞌ tetz ja oc tan xtxumleꞌn eꞌchk yol tan jaleꞌn impaltil swutzuꞌ. Poro yi iluꞌ teruꞌ niꞌcuꞌn tajtzaꞌkluꞌ tu tajtzaꞌkl jun ángel cwent tetz Ryos. Baꞌn bin sbanuꞌ yi tajbiluꞌ sweꞌj. 28 Bintzi at len chipaj yi cyakil yi eꞌ inxonl cwent intaj swutzuꞌ, nin baꞌn kloꞌ yi jak kaquim len tanuꞌ. Poro yi iluꞌ teruꞌ ja takꞌuꞌ amaꞌl swetz tan inwaneꞌn te yi eꞌchk takleꞌn yi na wanuꞌ teꞌj. Chaꞌstzun te quiꞌc rmeril yi nink tzinjak junt banluꞌ swibaj.
29 —¡Nkꞌeraꞌtz tajweꞌn tan awalol junt yol yaj! Na ja wiꞌt chincawun tetz amartomaꞌ Siba tan cweꞌn ijatxol tziwutz cyakil yi amaꞌlbeꞌn yi kꞌajtzun ataꞌ tacyꞌeꞌx.
30 —Ntyoẍ teruꞌ taꞌ, ma na baꞌn tcuꞌn yi nink cyaj cyen cyakil tkꞌab Siba, na ntyoẍ tetz Kataj yi baꞌn cuꞌn mpakxijuꞌ xe palaciojuꞌ, chij Mefi-boset bantz.
31 Ma tetz Barzilai, yi aj Galaad, choꞌn cweꞌn muleꞌn le tnum Rogelim tan quichꞌeyeꞌn yi rey tan quicyꞌeꞌn tzaj wi aꞌ Jordán, nin tan chijatxol quib tuchꞌ. 32 Nsken biꞌẍin, na na xon iꞌ tul jun mutxꞌ tu jun yob. Ej nin te yi tiemp yi aꞌtij yi rey le tnum Mahanaim xcyeꞌ iꞌ tan takꞌleꞌn cyakil yi mbi tajweꞌn tetz yi rey, na yi iꞌ tetz chin ric nin. 33 Nintzun tal yi rey tetz Barzilai:
—Chumbalaj yi nink xomninuꞌ sweꞌj jalen Jerusalén, na list wutaneꞌn tan qꞌuicyꞌlenuꞌ.
34 —Baꞌn kloꞌ taꞌ, poro coboxteꞌn yob atin tan inxomeꞌn nin teꞌjuꞌ jalen Jerusalén, 35 na na chinxom tul jun mutxꞌ tu jun yob, nin quiꞌt na chinnachon te yi tijleꞌnil yi inwaꞌ, tuꞌk wucꞌaꞌ. Nin quiꞌt na chinxcyeꞌ tan talcheꞌn yi ko baꞌn atit yi cꞌoꞌcal jun takleꞌn nka quiꞌ. ¿Mbi xac noꞌc tetz jun latzꞌ teꞌjuꞌ taꞌ? 36 Yi wetz in mantar iꞌtz ntin tan quichꞌeyeꞌnuꞌ tan quicyꞌeꞌn poneꞌnuꞌ wi aꞌ Jordán. ¿Ko yaꞌtz, mbi tzuntz na tzanuꞌ tan sukeꞌn jun balaj oyaꞌtz swetz? 37 Poro quiꞌ poloꞌ teruꞌ sbanuꞌ jun pawor swetz tan tkꞌoluꞌ amaꞌl swetz tan impakxeꞌn le intanum bantz tzatzin cuꞌn chinquim, nin baꞌn tzun chinmukxij kale eꞌ mukxeꞌt eꞌ intaj intxuꞌ. Ma jaluꞌ je jun incyꞌajleꞌj yi na biꞌaj Quimam, baꞌn tzꞌoc iꞌ tetz ẍchakumuꞌ, nin baꞌn xomnin iꞌ teꞌjuꞌ. Baꞌn sban iꞌ yi mbiꞌtz tajbiluꞌ teꞌj iꞌ.
38 —Baꞌn bin, baꞌn xomtzaj Quimam yi cyꞌajluꞌ skeꞌj. Ej nin tzimbneꞌ quib yi tajbiluꞌ te iꞌ. Ej nin cyakil yil jakuꞌ swetz list wutaneꞌn tan wukꞌol teruꞌ, stzun Luwiy bantz.
39 Quicyꞌeꞌn tzaj tzun cyakil wunak wi aꞌ Jordán. Ma yi ntaxk icyꞌ yi rey wi aꞌ nintzun bentz tan kꞌaleꞌn Barzilai nin tan stzꞌubleꞌn xlajak stziꞌ. Cweꞌn tzun chijatxol quibtz. Pakxeꞌn tzun Barzilai le tetz tanum kale najleꞌt iꞌ. 40 Ma tetz yi rey, choꞌn tzun beneꞌntz Gilgal nin xomij Quimam teꞌj, scyuchꞌ cyakil yi eꞌ aj Judá. Nchaꞌtz jalaj te yi eꞌ aj Israel, eꞌ opontz. 41 Ma yi cyoponeꞌn Gilgal, nintzun eꞌ ben yi eꞌ xonl Israelaꞌtz tan yol tetz yi rey, itzun cyaltz:
—¿I bin jaluꞌ taꞌ, iluꞌ kareyil, mbitzuntz, yi ntin eꞌ kaxonl yi eꞌ aj Judá na cyaj chixon teꞌjuꞌ? Na ntin eꞌ ja chixcon tan quicyꞌleꞌnuꞌ tu yi teruꞌ najaluꞌ, yi quicyꞌeꞌn tzajuꞌ wi aꞌ Jordán scyuchꞌ cyakil yi eꞌ sanlaruꞌ.
42 Ma cyakil yi eꞌ aj Judá, nintzun ben chitzaꞌwel chiyol yi eꞌ xonl Israelaꞌtz:
—¿Nxac na chiꞌch chicꞌuꞌluꞌ skeꞌj? na yi oꞌ ketz kajwutz kib tu kareyil. ¿Choꞌn ptzun na kawan quen te yi kareyil? ¿At ptzun jun takleꞌn kawutz quen te iꞌ?
43 —Nim tcuꞌn ketz kaderech tan kalol yi iꞌ kareyil tziwutz itetz, na yi eꞌ kamam kateꞌ eꞌ bajxnak ẍchixoꞌl yi eꞌ cyꞌajl kꞌajtzun kamam Jacow. ¿Nxac tzun na cxtzanwok tan telseꞌn kakꞌej? Na yi oꞌ ketz, bajx cunin nkatxum tan pakxeꞌn tzaj yi kareyil, cheꞌch bantz.
Poro yi eꞌ aj Judá chin tlaꞌj nin eꞌ ban tan yol ẍchiwutz yi eꞌ aj Israel.