12
1 Je chibiꞌ yi eꞌ paleꞌ, scyuchꞌ yi eꞌ xonl Leví yi eꞌ ul tzoneꞌj Jerusalén te Josué, tu Zorobabel yi cyꞌajl Salatiel. Yi eꞌ paleꞌaꞌtz iꞌtz Seraías, Jeremías, Esdras, 2 Amarías, Maluc, Hatús, 3 Secanías, Rehum, Meremot, 4 Iddo, Gineto, Abías, 5 Mijamín, Maadías, Bilga, 6 Semaías, Joiarib, Jedías, 7 Salú, Amoc, Hilcías, nin Jedaías. Yaꞌstzun yi cyajcawil yi eꞌ paleꞌ scyuchꞌ yi eꞌ mas chixonl yi eꞌ aꞌtij te yi tiemp tetz Josué.8 Ma yi eꞌ xonl Leví yi eꞌ ajbitz, iꞌtz: Josué, Binuy, Cadmiel, Serebías, Judá nin Matanías. Yi eꞌaꞌtz scyuchꞌ yi mas cyuchꞌ, eꞌ xcon tetz ajbitz yi na chimol quib tan banleꞌn taneꞌn chimunl. 9 Ej, nin nchaꞌtz eꞌ ul Bacbuquías tu Uni, scyuchꞌ yi eꞌ mas cyuchꞌ, yi eꞌ cuꞌn ajbitz. Choꞌn txiclcheꞌ ẍchiwutz yi eꞌ mas cyuchꞌaꞌtz tan takꞌleꞌn chikꞌajsbil.
Yi chixonl yi eꞌ paleꞌ
10 Itzun yi Josuéjaꞌtz iꞌ yi taj Joiacim. Ma Joiacim iꞌ taj Eliasib. Ma Eliasib yaꞌstzun taj Joiada. 11 Ma Joiada yaꞌstzun taj Jonatán. Ma Jonatán iꞌ taj Jadúa.
12 Ej, itzun te yi tiemp tetz Joiacimaꞌtz, at eꞌ paleꞌ yi eꞌ bajxom te jujun kꞌuꞌj najal yi chixonl quib. Je chibiꞌ yi eꞌ bajxomaꞌtz: Yi eꞌ tu Seraías iꞌtz Meraías. Ma yi eꞌ tu Jeremías iꞌtz, Hananías. 13 Ma yi eꞌ tu Esdras yi chibajxom iꞌtz: Mesulam. Ma yi eꞌ tu Amarías iꞌtz, Johanán. 14 Ej, nin yi chibajxom yi eꞌ tu Melicú iꞌtz Jonatán. Ma yi eꞌ tu Sebanías iꞌtz, Ẍep. 15 Ma yi eꞌ tu Harim iꞌtz, Adna. Nin yi eꞌ tu Meraiot iꞌtz Helcai. 16 Ma yi eꞌ tu Iddo iꞌtz, Zacarías, nin yi eꞌ tu Ginetón iꞌtz Mesulam. 17 Nin yi eꞌ tu Abías, iꞌtz Zicri. Ej, nin yi eꞌ tu Maniamín. Nin yi eꞌ tu Moadias iꞌtz, Piltai. 18 Ej, nin yi eꞌ Bilga iꞌtz, Samúa. Nin yi eꞌ tu Semaías iꞌtz, Jonatán. 19 Ma yi eꞌ tu Joiarib iꞌtz, Matenai. Ej ma yi eꞌ tu Jedaías iꞌtz, Uzi. 20 Ma yi eꞌ tu Salai iꞌtz, Calai. Nin yi eꞌ tu Amoc iꞌtz, Eber. 21 Ma yi eꞌ tu Hilcías, iꞌtz, Hasabías. Ej ma yi eꞌ tu Jedaías iꞌtz Natanael.
Yi eꞌ chibajxom yi xonl Leví
22 Ma jaluꞌ, je chibiꞌ yi eꞌ xonl Leví yi nchixcon jalen te yi tiemp tetz Darío yi chireyil yi eꞌ aj Persia: Joiada, Johanán tu Jadúa, yi eꞌaꞌtz eꞌ len cuꞌn bajxom nin cuꞌ len chibiꞌ scyuchꞌ yi eꞌ mas xonl Leví yi ateꞌ jakꞌ chicaꞌwl. Nchaꞌtz ja cuꞌ chibiꞌ yi eꞌ xonl Leví yi nchixcon tetz paleꞌ te yi jun tiempaꞌtz. 23 Nchaꞌtz ja cuꞌ chibiꞌ yi eꞌ bajxom te yi jujun kꞌuꞌj xonl Leví yi chixonl quib, tul yi liwr tetz crónica, ja cuꞌ chibiꞌ jalen te yi tiemp tetz Johanán, yi mamaj Eliasib.
24 Nin yi chibiꞌ yi eꞌ chibajxom yi eꞌaꞌtz iꞌtz: Hasabías, Serebías, Josué, Binuy tu Cadmiel. Na ilenin at cob kꞌuꞌj ajbitz le templo tan banleꞌn chiturno tan bitz, nin tan tyoẍiꞌn tetz Kataj chi yi caꞌwl yi talnak Luwiy yi ẍchakum Ryos.
25 Ma yi eꞌ qꞌuicyꞌlom sawan iꞌtz: Matanías, Bacbuquías, Obadías, Mesulam, Talmón tu Acub.
26 Cyakil yi eꞌaꞌtz ja chaꞌtij te yi tiemp tetz Joiacim, yi cyꞌajl Josué, yi mamaj Josadac. Ej, nin iteꞌn nin tiempaꞌtz yaꞌstzun yi at tzaj Nehemías tetz gobernador. Ma yi Esdras iꞌ paleꞌ nin iꞌ ajtzꞌib.
Yi ticyꞌeꞌn wutz kꞌej yi tapij
27 Itzun bantz yi ticyꞌeꞌn wutz kꞌej yi tapij yi bnix solteꞌj Jerusalén. Nintzun ben mantar tan chichakleꞌn cyakil yi eꞌ xonl Leví yi ateꞌ tulak eꞌchk amaꞌl, tan cyuleꞌn Jerusalén tan ticyꞌseꞌn wutz kꞌej yi tapijaꞌtz. Je na tal yi stziblal yi ben scyetzeꞌj: “Kamoleꞌ kib tan ticyꞌseꞌn wutz kꞌej yi tapij, nin tajweꞌn katzatzin. Kabitzink tan takꞌleꞌn kakꞌajsbil, nin baꞌn xcon eꞌchk maꞌcl kaꞌn chi taneꞌn eꞌchk platillo, arpa tu lira.”
28 Chimolol tzun quib yi eꞌ ajbitz, yi eꞌ xonl Leví yi ateꞌ lakak aldey, yi at solteꞌj Jerusalén, tu yi eꞌ yi najlcheꞌ le eꞌchk aldey cwent Netofa. 29 Tu yi eꞌ yi ateꞌ le eꞌchk amaꞌl cwent Gilgal, tu yi eꞌ yi ateꞌ wi ẍkꞌajlaj cwent Geba tu Azmavet. Na yi eꞌ aj bitzaꞌtz nsken chaꞌjt tulak eꞌchk amaꞌl solteꞌj Jerusalén.
30 Chixansal tzun quib yi eꞌ paleꞌ. Nchaꞌtz eꞌ ban yi eꞌ xonl Leví. Kalenaꞌs tzun cyoqueꞌntz tan chixanseꞌn yi eꞌ mas xonl Israel, nin tan xanseꞌn yi eꞌchk sawan tu cyakil yi tapij.
31 Nintzun incawunintz scyetz yi eꞌ ajcaw scyetz yi eꞌ aj Judá tan chijeꞌn tibaj yi tapij.
Nchaꞌtz eꞌ bixeꞌ cob kꞌuꞌj ajbitz waꞌn tan chixoneꞌn tibaj yi tapijaꞌtz. Choꞌn beneꞌn jun kꞌuꞌj le jalaj kasbal yi qꞌuil tetz yi sawan kale na eleꞌt eꞌchk tzꞌis. 32 Bajxcheꞌ jujun kꞌuꞌj aj bitzaꞌtz ẍchiwutzak yi eꞌ wunak yi cob cuntuꞌ eꞌ el. Xomcheꞌ nin Osaías scyuchꞌ jun kꞌuꞌj yi eꞌ aj Judá.
35 Nchaꞌtz xomcheꞌ cobox paleꞌ scyeꞌj yi na chitzan tan tocseꞌn eꞌchk chun. Nin iꞌtz Zacarías yi cyꞌajl Jonatán. Iꞌ xonl kꞌajtzun Semaías, Matanías, Micaías, Zacur tu Asaf. 36 Nchaꞌtz xomcheꞌ cobox xonl Zacarías. Iꞌtz: Semaías, Azarael, Milalai, Gilalai, Maai, Natanael, Judá tu Hanani. Yi eꞌaꞌtz, yaꞌstzun yi eꞌ yi na chitzan tan tocseꞌn eꞌchk maꞌcl yi alijt cyen takꞌun Luwiy yi rey yi ẍchakum Ryos. Nin yi kawutzileꞌn ajchusunl taꞌ Esdras, choꞌn bajxij iꞌ ẍchiwutz cyakil yi eꞌ paleꞌaꞌtz.
37 Choꞌn tzun quicyꞌeꞌntz tibaj yi sawan yi na biꞌaj La Fuente. Poro tan chixoneꞌn le jeꞌnak ja chixon tibaj yi tapij yi yotxiꞌn taneꞌn. Ej nin ja chicyꞌak tibaj yi caꞌl kꞌajtzun Luwiy yi rey, jalen yi cyoponeꞌn kale atit yi sawan yi na biꞌaj Tetz Aꞌ yi na xmayinin teleꞌn tziꞌn.
38 Ma yi caꞌp kꞌuꞌj ajbitz, choꞌn cyajeꞌn le kamax. Choꞌn tzun xomchin nin wetz wutz chicoc yi eꞌaꞌtz, scyuchꞌ yi eꞌ mas katanum. Choꞌn kaxeꞌteꞌn tzaj tan xoꞌn tibaj yi tapij kale atit yi Torre Tetz Chuj jalen kale atit yi tapij yi nim wutz. 39 Oꞌ icyꞌak tibaj yi sawan Tetz Efraín tu yi sawan yi na biꞌaj Jesana tu yi sawan yi na biꞌaj Tetz Cay. Nin oꞌ icyꞌak kale atit yi torre tetz Hananeel, tu yi torre Los Cien, jalen kale atit yi sawan Scyetz Cneruꞌ. Ma yi koponeꞌn kale atit yi sawan kale atit chicaꞌl yi eꞌ qꞌuicyꞌlom, choꞌn tzun oꞌ taneweꞌntz.
40 Kalenaꞌs tzun koponeꞌntz wutzkꞌanil yi caꞌl Kataj.
Yi koponeꞌn nintzun eꞌ nucꞌ quib yi cob kꞌuꞌj ajbitzaꞌtz. Nchaꞌtz oꞌ ban ketz scyuchꞌ yi cobox ajcaw tetz tnum yi xomcheꞌ sweꞌj.
41 Yi eꞌ paleꞌ yi eꞌ oc tan tocseꞌn eꞌchk chun iꞌtz: Eliacim, Maaseías, Miniamín, Micaías, Elioenai, Zacarías, Hananías. 42 Maasías, Semaías, Eleazar, Uzi, Johanán, Malquías, Elam tu Ezer.
Ma yi eꞌ ajbitz nintzun eꞌ octz tan bitz. Nin yi chibajxom iꞌtz Izrahías. 43 Ej, nin te yi jun kꞌejaꞌtz koy eꞌch katxꞌixwatz tetz Kataj. Wiꞌnin tzun katzatzineꞌn te yi jun kꞌejaꞌtz, na nin takꞌ Ryos tzatzin sketz. Cyakil yi eꞌ xnaꞌn tu eꞌ nitxaꞌ ja chitzatzin. Nin yi jun chin tzatzinaꞌtz yi bajij, ja quibit yi eꞌ wunak yi ateꞌ joylaj len yi tnum.
Yi eꞌchk oy yi baj opon scyetz yi eꞌ paleꞌ scyuchꞌ eꞌ xonl Leví
44 Ej, nin iteꞌn nin kꞌejaꞌtz eꞌ bixeꞌ cobox yaj tan stzꞌamleꞌn eꞌchk oy, chi taneꞌn pwok tu eꞌchk ofrent, tu eꞌchk bajx wutz ujul, nin tan stzꞌamleꞌn eꞌchk diesum, nin tan colcheꞌn cyakil eꞌchk bajx wutz yi eꞌchk ujul yi na opon cyakꞌun yi eꞌ mas xonl Israel yi ateꞌ tulak mas tnum. Yi eꞌchk oyaꞌtz iꞌtz tetz chibambil yi eꞌ paleꞌ, scyuchꞌ yi eꞌ xonl Leví, na cyakil yi eꞌ xonl Israel, eꞌ tzatzin scyeꞌj yi eꞌ paleꞌ, scyuchꞌ yi eꞌ xonl Leví, 45 scyuchꞌ yi eꞌ ajbitz, nin yi eꞌ qꞌuicyꞌlom sawan. Na yi eꞌaꞌtz yaꞌstzun eꞌ na chixcon tan banleꞌn chimunl swutz Kataj, nin tetz cuꞌn cyalmaꞌ cyoqueꞌn tan banleꞌn chimunlaꞌtz, nin tan xanseꞌn yi eꞌchk takleꞌn, chi yi bixbaꞌnt cyen tan kꞌajtzun Luwiy tu Salomón yi tetz cyꞌajl. 46 Na tenẍchan cyen te yi tiemp tetz Luwiy tu yi tiemp tetz Asaf, ateꞌ chibajxom yi eꞌ ajbitz. Nin ja chixcon yi eꞌ ajbitzaꞌtz yi na oc eꞌchk cultiꞌn tan takꞌleꞌn chikꞌajsbil nin tan tyoẍiꞌn tetz Kataj.
47 Chaꞌstzun te, te yi tiemp tetz Nehemías tu Zorobabel, cyakil yi eꞌ xonl Israel ja cyakꞌ yi eꞌchk wutz yi ujul tetz chiwaꞌ yi eꞌ ajbitz scyuchꞌ yi eꞌ qꞌuicyꞌlom tetz sawan. Nin ja cyakꞌ yi eꞌchk takleꞌn yi tajweꞌn scyetz yi eꞌ xonl Leví. Nchaꞌtz eꞌ ban scyeꞌj yi eꞌ paleꞌ, yi eꞌ xonl Aarón.