ESTER
Yi bnixeꞌn jun chin wutzileꞌn kꞌej tan yi rey Asuero
1
1 Itzun bantz yi na cawun tzaj yi rey Asueroa tibaj cyakil yi amaꞌl yi na xeꞌt tzaj cwent India jalen le amaꞌl cwent Etiopía. At tzaj jun cient tu junak juk provinciab nka nación yi ateꞌ jak tetz caꞌwl. 2 Yi amaꞌl kale najleꞌt iꞌ tan cawuꞌn iꞌtz yi tnum Susa yi at tapij solteꞌj tan chimakleꞌn yi eꞌ contr.
3-4 Itzun yi teleꞌn ox yob tan Asuero tan cawuꞌn, nintzun ban iꞌ jun chin wutzileꞌn kꞌej tan takꞌleꞌn chikꞌej yi eꞌ mas ajcaw yi ateꞌ jakꞌ caꞌwl iꞌ, nin tan ẍchajleꞌn cyakil yi tetz meꞌbiꞌl tu cyakil yi eꞌchk takleꞌn balaj yi chin yubeꞌn nin yi at tuchꞌ. Kak tzun xaw ban yi jun chin wutzileꞌn kꞌejaꞌtz. Tircuꞌn eꞌ baj opon yi eꞌ ajcawaꞌtz, scyuchꞌ yi eꞌ wiꞌtz akꞌol tajtzaꞌkl yi rey, scyuchꞌ cyakil yi eꞌ cyajcawil yi eꞌ sanlar, yi eꞌ cuꞌn aj Persia tu aj Media, scyuchꞌ cyakil yi eꞌ bajxom tetz eꞌchk provincia yi at jakꞌ caꞌwl iꞌ. Tircuꞌn eꞌ baj opon len.
Yi bnixeꞌn jun chin waꞌaꞌn tan yi rey Asuero
5 Itzun yi stzajeꞌn wiꞌ yi jun chin wutzileꞌn kꞌejaꞌtz, nintzun xtxum yi rey junt chin waꞌaꞌn tan stzajseꞌn wiꞌ cyakil. Juk tzun kꞌej ban yi jun chin waꞌaꞌnaꞌtz. Ej nin tircuꞌn eꞌ baj xtxocol yi eꞌ nim juy yi ateꞌ le tnum Susa.
Choꞌn tzun bnixeꞌn yi jun waꞌaꞌnaꞌtz wutzkꞌanil yi caꞌl kale na cawuneꞌt iꞌ. 6 Tircuꞌn bajeꞌn wekol yi wutzkꞌanilaꞌtz, tan eꞌchk xbuꞌk yi chin yubeꞌn nin yi sak, tu txaꞌx yubil. Ma yi tzꞌamol tetz yi eꞌchk xbuꞌkaꞌtz iꞌtz lino cuꞌn yi txib yubil. Ma yi tzꞌamol tetz yi cꞌalbil, iꞌtz eꞌchk argoy yi sakal cuꞌn. Ma eꞌchk tkan yi eꞌchk xbuꞌkaꞌtz iꞌtz mármol. Ma yi wuxtxꞌotxꞌ banij tan balaj cꞌub yi na biꞌaj nácar tu mármol yi sak tu kꞌek yubil. Ma yi eꞌchk kejbil iꞌtz oro tu sakal cuꞌn.
7 Ej nin cyakil yi eꞌchk lak yi xcon cyaꞌn iꞌtz oro cuꞌn. Ej nin apartchk len yubil yi jujun lakaꞌtz. Nchaꞌtz wiꞌnin win baj jatxol yi rey scyetz yi eꞌ xtxocum. Yi win yi baj jatxol iꞌ, nim jamel. Ej nin ntin jun rey na xcyeꞌ tan lokꞌcheꞌn. 8 Poro nsken tal yi rey scyetz yi eꞌ ajcaw yi na chitzan tan jatxleꞌn scyetz wunak yi quil chiban puers scyetz yi eꞌ txocum yi ko qui na cyaj baj win cyaꞌn.
9 Nchaꞌtz ban Vasti, yi reina. Xtxum iꞌ jun chin wutzileꞌn waꞌaꞌn scyetz quixkel yi eꞌ ajcaw yi eꞌ baj opontz. Choꞌn bnixeꞌn le caꞌl rey.
10 Itzun te yi jukiꞌn kꞌej te yi jun chin waꞌaꞌnaꞌtz nsken oc aꞌ twiꞌ yi rey. Nin tan yi tzatziꞌn yi at cuꞌnt nintzun cawunin scyetz juk eunuco tan ticyꞌleꞌn tzaj yi reina yi ateꞌn yi coron twiꞌ tan tuleꞌn swutz iꞌ. Na yi tajbil iꞌ, iꞌtz tan quilol yi mas ajcaw yi chin yubeꞌn nin yi reina.
11 Chibeneꞌn tzun juk eunucaꞌtz tan ticyꞌleꞌn tzaj kloꞌ. Yi juk yajaꞌtz iꞌtz Mehumán tu Bizta, Harbona tu Bigta, Abagta tu Zetar nin Carcas. 12 Poro yi cyoponeꞌn yi eꞌ aj mantarinl, qui nin cujij yi reina tan sajeꞌn. Tan yi jun ajtzaꞌklaꞌtz ja tzun paj iꞌ yi caꞌwl yi rey.
Wiꞌnin tzun ẍchiꞌcheꞌn cꞌuꞌl yi rey teꞌj. 13 Nin ben jakol scyetz yi eꞌ akꞌol tajtzaꞌkl yi chusijcheꞌ te yi ley yi mbi sbneꞌ iꞌ te yi reina yi qui nin moꞌc jakꞌ caꞌwl iꞌ. Yaꞌstzun ban iꞌ-tz na ilenin ja jak yi tetz tajtzaꞌkl scyetz yi eꞌ akꞌol tajtzaꞌkl. 14 Choꞌn tzun jakol yi rey yi tajtzaꞌkl scyetz Carsena, Setar, Admata, Tarsis, Meres, Marsena tu Memucán. Na at len cuꞌn chikꞌej tan yi rey tan chicawuneꞌn squibaj cyakil yi eꞌ aj Persia tu eꞌ aj Media tu alchok jilwutz ley. 15 Beneꞌn tzun jakol yi rey scyetz:
—¿Mbi na tal yi ley? ¿Mbil tzimban te yi reina yi qui nin ntocsaj inyol yi mben walol scyetz inchakum? stzun yi rey scyetz.
16 Ẍchiwutz cunin tzun cyakil yi eꞌ mas akꞌol tajtzaꞌkl yi rey yi beneꞌn tlol Memucán:
—Taꞌ, yi naꞌ reina, nkꞌeꞌtz ntin ja paj yi caꞌwluꞌ, ma na nchaꞌtz ja paj iꞌ yi ketz kacaꞌwl yi oꞌ ajcaw yi atoꞌ jakꞌ caꞌwluꞌ. Nin nchaꞌtz ja el chikꞌej cyakil yi eꞌ wunak yi ateꞌ beneꞌn tziꞌn jakꞌ caꞌwluꞌ. 17 Na yil quibit yi mas xnaꞌn yi mbi ban yi reina, nchaꞌtz cyetz chipajeꞌ caꞌwl quichmil, nin nchaꞌtz scyaleꞌ: “Qui nin peꞌ na oc yi reina jakꞌ caꞌwl yi rey, na yi beneꞌn chakol tetz tan yi rey, qui nin opon iꞌ,” cheꞌch sbneꞌ.
18 ”Nchaꞌtz yi quixkel yi eꞌ ajcaw tetz Persia tu Media yil quibit yi mbi cuꞌn mban yi reina, quil cyakꞌ kꞌej yi quichmil nin chocopon tan oyintziꞌ scyeꞌj. 19 Chaꞌstzun te Taꞌ, baꞌn yi nink cujijuꞌ tan bixeweꞌn jun caꞌwleꞌj tetz ketz yi oꞌ aj Persia tu aj Media yi quiꞌc cuj tan xtxꞌixpeꞌn sbneꞌ opon tunintz.c Yi jun caꞌwlaꞌtz iꞌtz yi quiꞌc rmeril tan tuleꞌn junt tir yi reina swutzuꞌ. Nin tajweꞌn tzꞌel tetz reina, nin tajweꞌn joylij xel yi baꞌn kꞌukeꞌ kacꞌuꞌl teꞌj.
20 ”Ej nin tzinwutz wetz tajweꞌn tan teleꞌn yi jun caꞌwlaꞌtz ẍchiwiꞌ cyakil wunak beneꞌn tziꞌn yi ateꞌ jakꞌ caꞌwluꞌ. Tan yi xtxolbilaꞌtz squibiteꞌ yi eꞌ mas xnaꞌn, ej nin chocopon tzuntz jakꞌ caꞌwl quichmil. Quiꞌc na ban yi ko at kꞌej yi quichmil nka quiꞌ, stzun Memucán tetz yi rey Asuero.
21 Yi tbital yi rey Asuero yi yol Memucán, nintzun tzatzin iꞌ teꞌj. Nchaꞌtz eꞌ ban yi eꞌ mas ajcaw, eꞌ tzatzin te yi tajtzaꞌkl Memucán. Ej nintzun bixeꞌ yi jun caꞌwlaꞌtz tan yi rey Asuero yi tajweꞌn choꞌc yi eꞌ xnaꞌn jakꞌ caꞌwl quichmil. 22 Nin yi jun caꞌwlaꞌtz ben stzꞌibal tan toponeꞌn lakak tnum beneꞌn tziꞌn. Yi jun caꞌwlaꞌtz bnix lakak jilwutz chiyol yi eꞌ wunak yi ateꞌ beneꞌn tziꞌn. Nin ja xcon len chiꞌalfabeto tan teleꞌn chitxum cyakil wunak tetz. Nin yi jun caꞌwlaꞌtz, iꞌtz yi tajweꞌn tan cyoqueꞌn cyakil yi eꞌ yaj tetz ajcaw scyeꞌj chinajal.