Yi toqueꞌn Ester tetz reina
2
1 Itzun bantz yi teleꞌn tiemp, nin yi nsken icyꞌ yi ẍchiꞌch cꞌuꞌlal te yi rey Asuero, tuleꞌn tzun txꞌakx tcꞌuꞌl yi mbi cuꞌn banak yi reina Vasti, tu yi caws yi akꞌlij tetz. 2 Chaꞌstzun te cyalol yi eꞌ ajcaw yi na chicawun xlaj iꞌ yi xtxolbileꞌj tetz:—I bin jaluꞌ Taꞌ, skawutz ketz, tajweꞌn yil chijoylij cobox xun yi txeꞌn cunin quil wutz jun yaj, nin yi chin chiyubeꞌn nin, tan jeꞌn xtxaꞌoluꞌ yi txkeluꞌ ẍchixoꞌl. 3 Chaꞌstzun te iluꞌ kareyil baꞌn cawunuꞌ tan chibeneꞌn cobox chakum tan chijoyleꞌn yi eꞌ balaj xun yi ateꞌ beneꞌn tziꞌn tan cyuleꞌn tzoneꞌj Susa, le amaꞌl kale ateꞌt yi eꞌ mas xnaꞌn yi eꞌ xconsbeꞌtzuꞌ. Yil chuꞌl tzoneꞌj, baꞌn choꞌc tetz qꞌuicyꞌbeꞌtz yi eunuco Hegai, yi qꞌuicyꞌlom cyetz yi eꞌ mas xnaꞌnaꞌtz, yi ateꞌ tcwentuꞌ. Na iꞌ jun yaj yi kꞌuklij cꞌuꞌluꞌ teꞌj. Baꞌn tzun choꞌc yi eꞌ ẍchakum iꞌ, tan banleꞌn baꞌn scyetz yi eꞌ xunaꞌtz tan chiyubeꞌn cunin. 4 Ej nin yil chiwekxij, baꞌn tzun chuꞌl swutzuꞌ. Nin yi xun yil pekꞌuꞌ mas teꞌj, yaꞌstzun yi txkeluꞌ sbneꞌ tetz xel yi reina Vasti, cheꞌch yi eꞌ mas ajcaw bantz tetz yi rey.
Wiꞌnin tzatzineꞌn yi rey te yi jun xtxolbilaꞌtz yi cyal yi eꞌ mas ajcaw yi na chicawun xlaj iꞌ. Ej nin yaꞌstzun bantz.
5 Itzun bantz, at jun yaj yi najlij le tnum Susa yi na biꞌaj Mardoqueo. Iꞌ jun judiy. Cyꞌajl Jair iꞌ. Ma yi Jair iꞌ xonl Simei. Yi Simei iꞌ xonl Cis. Eꞌ cuꞌn xonl Benjamín. 6 Ej nin yi Mardoqueojaꞌtz iꞌ jun scyeri eꞌ aj Judá yi eꞌ ben ticyꞌleꞌn tuml yi chireyil yi na biꞌaj Jeconías.a Eꞌ ben pres tan Nabucodonosor, rey tetz Babilonia. 7 At tzun jun meꞌl yi stzicy Mardoqueo yi chin yubeꞌn nin iꞌ yi na biꞌaj Hadasa nka Ester. Choꞌn cyajeꞌn cyen iꞌ te Mardoqueo yi chiquimeꞌn yi taj xtxuꞌ.
8 Ma yi teleꞌn yi jun caꞌwlaꞌtz tan yi rey tan chimolcheꞌn yi eꞌ balaj xunaꞌtz le tnum Susa, nin yi cyoqueꞌn tetz qꞌuicyꞌbeꞌtz Hegai yi qꞌuicyꞌlom cyetz yi eꞌ xnaꞌn yi eꞌ xconsbeꞌtz yi rey, xomij tzun Ester ẍchixoꞌl. Choꞌn cyoponeꞌn le palacio, yi caꞌl yi rey. 9 Yi toponeꞌn Ester xe caꞌl yi rey nin jal balajil iꞌ swutz Hegai. Chaꞌstzun te toqueꞌn il Hegai tan wekleꞌn tan yubeꞌn mas. Nchaꞌtz takꞌ balaj cumir tetz, tan bajeꞌn taꞌn. Ej nin eꞌ akꞌlij juk balaj xun tetz mos iꞌ. Ej nin akꞌlij jun balaj amaꞌl tetz tan taꞌteꞌn iꞌ txeꞌ. Yi jun amaꞌlaꞌtz choꞌn at le palacio yi xcon cyaꞌn xun.
10 Yi toponeꞌn, qui nin tal Ester yi ko judiy iꞌ, nin qui nin tal yi naꞌ scyetz eꞌ xonl, na yaꞌstzun cawbeꞌn tetz tan Mardoqueo.
11 Ma tetz Mardoqueo cyakil nin kꞌej na xaꞌk iꞌ tan xoꞌn stziꞌ yi caꞌl kale ateꞌt yi eꞌ xunaꞌtz, tan tilweꞌn yi ko baꞌn atiteꞌt Ester.
12 Jun tzun yob eꞌ oc yi eꞌ xunaꞌtz cwent Hegai tan toqueꞌn banleꞌn baꞌn scyetz. Na yaꞌstzun cyetz chicstumbr. Ej nin te yi jun yobaꞌtz, kak xaw ja oc balaj aceit scyeꞌj, yi na bnix te mirra, yi wiꞌnin cꞌoꞌcal. Ma yi kakt xaw oc balaj perfum scyeꞌj tu eꞌchk crema yi na xcon cyakꞌun xnaꞌn. Yi wiꞌt chibnixeꞌn nintzun eꞌ ben ticyꞌleꞌn chijunalen tan chajoꞌn ib swutz yi rey Asuero. 13 Nin te yi na chiben tan chajoꞌn ib swutz yi rey at cuj tan chiwekxeꞌn tan alchok eꞌchk takleꞌn balaj yi at le cyetz chiꞌamaꞌl. 14 Lakꞌbal na chiben kale atit yi rey. Ma le junt eklok choꞌn na chiben ticyꞌleꞌn kale najlcheꞌt yi eꞌ mas xnaꞌn, yi eꞌ caꞌp txkel yi rey taneꞌn, yi at Saasgaz tan chiqꞌuicyꞌleꞌn. Na yaꞌstzun yi jun yaj yi kꞌuklij cꞌuꞌl yi rey teꞌj tan chiqꞌuicyꞌleꞌn yi xnaꞌnaꞌtz. Choꞌn tzun na chaꞌtij yi eꞌ xunaꞌtz jalen yi na chichakxij junt tir tan yi rey nka quiꞌ.
15 Itzun yi beneꞌn ticyꞌleꞌn Ester yi meꞌl kꞌajtzun Abihail, yi stzicy Mardoqueo, swutz yi rey, ntin ben tcyꞌal quib yi tal Hegai tetz, yi yaj yi kꞌuklij cꞌuꞌl yi rey teꞌj. Na nsken jal balajil Ester swutz Hegai nin ẍchiwutz cyakil yi eꞌ yi ben quilol wutz.
16 Yi beneꞌn ticyꞌleꞌn Ester swutz yi rey, iꞌtz yi xaw Tebet, yi lajujiꞌn xaw tetz yi yob, nin iꞌtz yi jukiꞌn yob tan yi rey tan cawuꞌn.
17 Yi toponeꞌn Ester swutz yi rey Asuero nintzun pekꞌ mas iꞌ teꞌj ẍchiwutz yi eꞌ mas xun. Na qui nin jal junt xun taꞌn yi mas balaj, chi taneꞌn Ester. Chaꞌstzun te jaleꞌn mas kꞌej ẍchiwutz yi eꞌ mas nin oc iꞌ-tz tetz reina tetz xel Vasti. Nin je akꞌij jun coron twiꞌ tan ẍchajleꞌn yi at mas kꞌej iꞌ.
18 Yi bixeweꞌn Ester tetz reina nintzun xtxum yi rey jun chin wutzileꞌn kꞌej. Nin baj xtxocol iꞌ yi mas ajcaw yi ateꞌ cwent iꞌ. Nin baj toyil eꞌchk balaj oy scyetz, yi nim jamel, yi ntin na xcyeꞌ jun rey tan lokꞌcheꞌn. Nchaꞌtz tan yi tzatziꞌn yi at cuꞌnt, cuꞌ tzaj yi alcawal taꞌn.
19 Itzun te yi cobox kꞌejaꞌtz yi na tzan chichajleꞌn yi eꞌ xun tetz yi rey nin te yi chibeneꞌn ticyꞌleꞌn tul junt caꞌl tan chinajeweꞌn txeꞌ, at tunin tzun tetz Mardoqueo stzi puertil yi palacio tetz rey.
20 Ma tetz Ester quiꞌc nin jun yol tal iꞌ yi naꞌ scyetz iꞌ nka naꞌ scyetz eꞌ yi xonl nka mbi tnumil iꞌ. Qui nin tal iꞌ yi ko iꞌ jun judiy. Yaꞌstzun ban iꞌ na yaꞌstzun cawbeꞌn tetz tan Mardoqueo, yi ntaxk ben ticyꞌleꞌn iꞌ.
Yi claxeꞌn yi rey tkꞌab quimichil tan Mardoqueo
21 Te yi at tetz Mardoqueo stzi puert, nintzun tbit iꞌ yi na chiꞌch chicꞌuꞌl cob wart teꞌj yi rey Asuero nin na chitzan tan xtxumleꞌn tan biyleꞌn cuꞌn. Yi cob wartaꞌtz iꞌtz eꞌ Bigtán tu Teres. Nin choꞌn ateꞌ tan qꞌuicyꞌlomiꞌn tzi puertil yi palacio. 22 Yi tbital Mardoqueo nintzun bentz tan talcheꞌn tetz Ester yi reina. Nin yi Ester nin tal tetz yi rey yi mbi tal Mardoqueo.
23 Toqueꞌn tzun yi rey tan jakleꞌn tkanil yi ko bintzi yi xtxolbilaꞌtz. Nin yi lajluchaxeꞌn yi iꞌtz bintzi, nintzun eꞌ txꞌamxij yi cob wartaꞌtz, nin eꞌ jeꞌ chꞌimbaꞌn cyeꞌtz jakꞌ tzeꞌ. Choꞌn eꞌ quimeꞌntz. Cyakil yi xtxolbilaꞌtz yi mbajij, tzꞌibxij tul uꞌj swutz yi rey, nin choꞌn cyajeꞌn cyen kale colijeꞌt cyakil yi eꞌchk xtxolbil yi na bajij beneꞌn tziꞌn le jun naciónaꞌtz.