Yi chiꞌch cꞌuꞌlal yi jal teꞌj Mardoqueo
3
1 Itzun bantz yi ticyꞌeꞌn cobox tiemp, nintzun oc Amán tan Asuero tetz wiꞌtz ajcaw xlaj iꞌ. Yi Amánaꞌtz iꞌ cyꞌajl Hamedata yi xonl Agag. 2 Yi bixeweꞌn Amán, nintzun el jun caꞌwl tan yi rey yi tajweꞌn tan chicweꞌn mejlok cyakil wunak swutz Amán yil tzꞌicyꞌ cuꞌn iꞌ ẍchiwutz nka yil chocopon swutz iꞌ. Poro yi Mardoqueo quinin ban taneꞌn yi jun caꞌwlaꞌtz, na qui nin mejeꞌ swutz Amán tan takꞌleꞌn kꞌej. 3 Yi quilol yi eꞌ ẍchakum yi rey yi qui na takꞌ Mardoqueo kꞌej Amán, nintzun eꞌ jaktz tetz yi mbi tzuntz yi qui na ban iꞌ taneꞌn yi caꞌwl yi sken el tan yi rey. 4 Cyakil nintzun kꞌej jaklij tetz Mardoqueo yi mbi tzuntz quinin mejeꞌ swutz Amán. Poro yi tetz, quinin ban iꞌ taneꞌn. Yi quilol yi eꞌ ẍchakum reyaꞌtz yi qui na chocpon te Mardoqueo, nintzun eꞌ ben tan talcheꞌn tetz Amán, tan quilol yi ko bintzinin quil xtxꞌixpuj yi tajtzaꞌkl. Yaꞌstzun eꞌ bantz tan paj yi Mardoqueo iꞌ jun judiy, na sken tal scyetz, yi iꞌ jun judiy. 5 Ej nin yi tilol Amán yi bintzinin yi qui na mejeꞌ cuꞌn Mardoqueo swutz iꞌ tan takꞌleꞌn kꞌej, siquierk tan kꞌajlaꞌn tetz, nintzun chiꞌch cꞌuꞌl iꞌ teꞌj. 6 Poro quinin ncuꞌ swutz yi ntink iꞌ Mardoqueo mmakꞌlij caws ma na oc iꞌ tan xtxumleꞌn yi ẍeꞌn sban tan chisotzajeꞌn chicyakil yi eꞌ judiy yi ateꞌ jakꞌ caꞌwl Asuero. Na nsken aꞌlchij tetz yi Mardoqueo iꞌ jun judiy.7 Itzun bantz le xaw Nisán,a yi bajx xaw tetz yi yob, nin yi teleꞌn coblajix yob tan yi rey tan cawuꞌn, nintzun oc txꞌiluꞌnb teꞌj, yi mbi kꞌejil nin mbi xawil yil sban taneꞌn Amán yi xtxumuꞌn yi sken bixeꞌ taꞌn. Choꞌn tzun nojeꞌn cyen te yi oxlaj tajlal yi xaw Adar yi coblajiꞌn xaw tetz yi yob.
8 Tlol tzun Amán tetz yi rey Asuero:
—Iluꞌ jun cꞌoloj kareyil, na waj wal jun xtxolbil teruꞌ, nin yi xtxolbil iꞌtz: Yi ẍchixoꞌl cyakil yi eꞌchk nación yi at jakꞌ caꞌwluꞌ, at jun nación yi apart ẍchiwutz cyakil. Nin yi jun naciónaꞌtz na taj yil scaw tib ẍchuc, na at cyetz chiley chichuc cuntuꞌ. Nin qui na chitzan tan banleꞌn taneꞌn yi caꞌwluꞌ iluꞌ jun cꞌoloj kareyil. Chinch wetz yi jun jilwutz wunakaꞌtz quiꞌc na takꞌ yi ateꞌ. Mas balaj yi nink chisotz chicyakil cuꞌn. 9 Nink cujijuꞌ yil bixeꞌ jun caꞌwl tan chisotzajeꞌn cyakil yi jun jilwutz wunakaꞌtz. Yi kol cujijuꞌ, list atineꞌt tan wukꞌol kak cient tu oxcꞌal mil liwr sakal teruꞌ. Nin swakꞌeꞌ scyetz yi eꞌ ajcaw yi qꞌuicyꞌlom yi meꞌbiꞌluꞌ tan toqueꞌn cyaꞌn kale colijeꞌt yi meꞌbiꞌluꞌ, stzun Amán tetz yi rey Asuero.
10 Yi tbital yi rey Asuero yi xtxumuꞌn Amán, nintzun tzatzintz teꞌj, nin el tzaj tcyꞌal yi xmalkꞌab nin ben tkꞌoltz tetz Amán, yi chicontr yi eꞌ judiy. 11 Nchaꞌtz taltz tetz:
—Ma jaluꞌ Amán, quil cẍbisun. Banaj awajbil scyeꞌj yi eꞌ judiy. Baꞌn chisotz awaꞌn. Ma yi sakal yi masuk swetz, baꞌn tzawetzaj. Quil cẍbisun taꞌn, stzun yi rey Asuero bantz tetz Amán.
12 Itzun ban le oxlaj tajlal te yi iteꞌn nin xawaꞌtz, nin eꞌ chakxij cyakil yi eꞌ ajtzꞌib yi ateꞌ jakꞌ caꞌwl yi rey. Yi chimolxeꞌn nintzun eꞌ oc tan stzꞌibeꞌn yi caꞌwl yi sken bixeꞌ tan Amán. Ja bnix le cyetz chiyol nin le cyetz chiꞌalfabeto cyakil yi eꞌchk tnum yi ateꞌ jakꞌ caꞌwl yi rey Asuero bantz teleꞌn chitxum te yi jun caꞌwlaꞌtz. Yi bnixeꞌn nintzun cuꞌ yi biꞌ yi rey teꞌj tu yi sey yi at te yi xmalkꞌab iꞌ. 13 Kalenaꞌs tzun beneꞌn cyakꞌun yi eꞌ aj chejinl tan toponeꞌn ẍchikꞌab yi eꞌ ajcaw lakak tnum. Nin tul yi jun caꞌwlaꞌtz na tal yi tajweꞌn tan chiquimeꞌn cyakil yi eꞌ judiy tul jun ntziꞌ kꞌej. Tajweꞌn tan chiquimeꞌn tircuꞌn, quiꞌc na ban ko eꞌ xicyeꞌt nka tijl cꞌuꞌlal. Quiꞌc na ban yi ko eꞌ xnaꞌn, tajweꞌn tan chiquimeꞌn. Ma yi chimeꞌbiꞌl, baꞌn cyetzaj yi eꞌ yi chocopon tan chibiyleꞌn. Yi jun kꞌejaꞌtz yi bixeꞌ tan chiquimeꞌn yi eꞌ judiy iꞌtz le oxlaj tajlal yi coblajiꞌn xaw tetz yi yob. Yi iꞌtz yi xaw Adar. 14 Yi jun caꞌwlaꞌtz yi bixeꞌ opon ẍchikꞌab cyakil ajcaw tan chibnol taneꞌn nin tan chibnol list quib te yi jun kꞌej yi nsken bixeꞌ tan Amán. 15 Lajkeꞌl nintzun chibeneꞌn yi eꞌ aj chejinlaꞌtz tan jatxleꞌn yi jun caꞌwlaꞌtz. Nchaꞌtz el yi jun caꞌwlaꞌtz ẍchiwiꞌ cyakil wunak yi ateꞌ le tnum Susa.
Yi wiꞌt bixeweꞌn tircuꞌn, nintzun eꞌ oc Asuero tu Amán tan xcꞌalaꞌiꞌn. Poro te yi na chitzatzin cyetz tan xcꞌalaꞌiꞌn, wiꞌnin bis nin wiꞌnin oꞌkl ateꞌ cuꞌnt cyakil yi eꞌ aj Susa tan paj yi quinin pujx cyaꞌn yi mbi sbajok.