Ester 4

Yi bis oꞌkl yi ul ẍchiwutz yi eꞌ judiy

1 Itzun bantz yi tbital Mardoqueo cyakil yi caꞌwl yi nsken bixeꞌ, nintzun baj katzol yi beꞌch tetz tan bis nin oc beꞌchok teꞌj yi na ẍchaj yi na bisun, nin jeꞌ ẍchitol tzaꞌj twiꞌ nin eltz tbeꞌ. Wiꞌnin tzun ẍchꞌineꞌn tbeꞌ tan yi bis yi at cuꞌnt. 2 Nin opontz stziꞌ yi puert kale na cawuneꞌt yi rey, poro qui oc tul na quiꞌc cu tan toqueꞌn jun xe caꞌl yi rey tu yi jun jilwutz beꞌchokaꞌtz. 3 Nchaꞌtz ban tulak mas tnum kale ateꞌt eꞌ judiy. Yi quibital yi jun caꞌwlaꞌtz wiꞌnin bis bajij. Eꞌ oc tan mucꞌleꞌn weꞌj. Wiꞌnin cyokꞌeꞌn nin wiꞌnin bis ateꞌ cuꞌnt. Nin wiꞌnin eꞌ, eꞌ baj cuꞌ coylok tul tzaꞌj nin oc eꞌchk beꞌchok tetz bis scyeꞌj tan ẍchajleꞌn yi na sotz chicꞌuꞌl.

Yi mban Ester te yi bis oꞌkl yi ateꞌ cuꞌnt yi tanum

4 Itzun yi quibital yi eꞌ xnaꞌn tu yi eꞌ eunuco yi na chakꞌuj te yi reina nintzun cyal tetz iꞌ yi mbi cuꞌn taneꞌn Mardoqueo. Yi tbital yi reina nintzun bisun iꞌ taꞌn. Nchaꞌtz ben ẍchakol jun ẍchakum tan takꞌleꞌn balaj beꞌchok tetz Mardoqueo. Poro qui nin cujij iꞌ. 5 Yi tbital yi reina Ester yi quinin cujij Mardoqueo tan toqueꞌn balaj beꞌchok teꞌj nintzun ẍchak Hatac yi wiꞌtz cyajcawil yi qꞌuicyꞌlom xe yi caꞌl yi rey tan beneꞌn tan jakleꞌn tetz Mardoqueo yi mbi tzuntz yi at cyen yi beꞌchok tetz bis teꞌj. 6 Beneꞌn tzun yi chakumaꞌtz tan tilweꞌn Mardoqueo yi choꞌn at tcꞌaꞌybil swutz yi puertil yi caꞌl kale na cawuneꞌt yi rey. 7 Tircuꞌn tzun bajeꞌn xtxolil Mardoqueo tetz yi chakumaꞌtz yi mbi cuꞌn xtxumuꞌn Amán. Nin tal iꞌ cyakil yi sakal yi suk Amán tetz yi rey tan tkꞌol iꞌ amaꞌl tan chiquimeꞌn cyakil yi eꞌ judiy. 8 Nchaꞌtz ben tkꞌol jun uꞌj kale atiteꞌt yi caꞌwl yi el tan yi rey kale na talwit yi tajweꞌn tan chiquimeꞌn cyakil yi eꞌ judiy yi ateꞌ le tnum Susa. Ej nin nchaꞌtz tal tetz yi chakum, tan toqueꞌn Ester tan yol tetz yi rey tan jakleꞌn pawor tetz tan qui chiquimeꞌn yi eꞌ tetz tanum, yi eꞌ judiy. 9 Yi toponeꞌn Hatac, yi chakum, nintzun tal iꞌ tircuꞌn yi mbi cuꞌn tal Mardoqueo. 10 Yi tbital Ester nin ben ẍchakol junt tir yi chakumaꞌtz tan talcheꞌn tetz Mardoqueo yi xtxolbileꞌj:

11 “Taꞌ, sak swutzuꞌ, nin na quibit cyakil yi eꞌ yi na chakꞌuj tu yi rey tu cyakil wunak beneꞌn tziꞌn yi quiꞌc cuj tan tocomponeꞌn jun swutz yi rey yi ko quil chakxij taꞌn. Nin ko at jun yi tzꞌocopon yi nkꞌeꞌtz chakij na uꞌlij, tajweꞌn tan quimeꞌn. Yaꞌstzun yi ley yi bixbaꞌnt. Ntin cuꞌn kol ẍchaj nin yi rey yi xtxꞌamij yi oro cuꞌn tetz, qui tzun quimtz. Chaꞌstzun te yi in wetz, ja el junaklajix kꞌej yi qui na nocpon swutz yi rey, na qui na chin chakxij taꞌn,” stzun yi reina banintz.

12 Yi tbital Mardoqueo yi yol yi reina Ester nintzun saj tloltz: 13 “Quil tzatxum yi nink cẍclax atz tan tuꞌ yi najlquiẍ le palacio, na aẍ jun judiy. 14 Poro kol tzajop cuꞌn yi atziꞌ nin ko quil cẍjilon tetz yi rey, qui cunin batz quil chiquim yi eꞌ katanum, poro apart junt yi tzꞌocopon tan chicolcheꞌn. Poro yi aẍatz tu cyakil yi eꞌ axonl skaquimok len tan apaj. Poro chinch wetz yaꞌstzun axac yi nẍoꞌc tetz yi txkel yi rey tan qui kaquimeꞌn. Na ja loꞌ cẍoꞌc tetz reina ntin tan kacolpeꞌn tkꞌab yi jun chin il yi at skawutz,” stzun Mardoqueo banintz.

15 Itzun saj tlol Ester junt tir te yi chakum: “Cun al yi yoleꞌj tetz taꞌ Mardoqueo: 16 ‘Quil bisunuꞌ taꞌ, benkuꞌ kale ateꞌt yi mas katanum. Chimoleꞌ quibuꞌ cyakil yi eꞌuꞌ yi ateꞌuꞌ Susa. Chimoleꞌ quibuꞌ tan mucꞌleꞌn weꞌj tetz ox kꞌej. Quil baj jun piẍ waj cyanuꞌ, nin quil baj muꞌẍ aꞌ cyanuꞌ tetz ox kꞌejaꞌtz tu ox akꞌbalaꞌtz. Nchaꞌtz oꞌ ketz scyuchꞌ yi eꞌ xnaꞌn yi na chakꞌuj swuchꞌ, quil kawan nin quil kucꞌaꞌ tetz ox kꞌej. Ma yil jepon yi ox kꞌejaꞌtz tzimpileꞌ. Nchimben swutz yi rey. Nchimben tan yol tetz, petzunk tzimpaj yi caꞌwl iꞌ tan yi xtxolbilaꞌtz. Ej nin ko choꞌn chinquimtz, ja binaꞌtz,’ ” stzun Ester banintz.

17 Yi tbital Mardoqueo, nintzun ban iꞌ cyakil yi mbi tal yi reina.