Yi toponeꞌn yi reina Ester swutz yi rey
5
1 Itzun yi ticyꞌeꞌn yi ox kꞌej mucꞌleꞌn weꞌj cyakꞌun yi eꞌ judiy, nintzun ben yi reina tan yol tetz yi rey. Oc nin yi balaj beꞌchok teꞌj. Choꞌn tzun tocomponeꞌn iꞌ-tz swutz yi puertil yi cuart kale atit yi rey. 2 Yi tilol yi rey yi na xon yi reina tzicaꞌl nintzun pekꞌ nintz teꞌj, nintzun saj ẍchakol tan yi tetz xtxꞌamij yi oro cuꞌn yi cyꞌaꞌn taꞌn le kꞌab. Yi tilol Ester nintzun bentz. Yi tocomponeꞌn nintzun bentz tan macleꞌn yi wiꞌ yi xtxꞌamij yi rey. 3 Tlol tzun yi rey tetz:—Aẍ jun cꞌoloj Ester, ¿mbi na aban tzoneꞌj? ¿At peꞌ jun amantar swetz? ¿Mbi tzun na awaj? Na cyakil yi mbil tzajak swetz swakꞌeꞌ tzatz na list wutaneꞌn tan jatxleꞌn cuꞌn jalaj te yi inmeꞌbiꞌl tzawutz ko yaꞌtz na awaj, stzun iꞌ-tz.
4 —Ko yaꞌtz, stzun Ester, —yi wajbil iꞌtz yi nink cujijuꞌ yil tzꞌoponuꞌ tan waꞌaꞌn swuchꞌ, na ja bnix jun chin wutzileꞌn waꞌaꞌn swuchꞌ tan takꞌleꞌn kꞌejuꞌ. Nchaꞌtz na kloꞌ waj yil tzꞌopon Amán.
5 Cawuneꞌn nintzun yi rey tan ẍchakleꞌn Amán tan chibeneꞌn tan waꞌaꞌn tuchꞌ yi reina. Chibeneꞌn tzun yi rey tu Amán tan waꞌaꞌn tuchꞌ Ester.
6 Itzun te yi na chitzan tan waꞌaꞌn, nintzun tal yi rey tetz Ester:
—Ester, jakaj cyakil yi mbi na awaj na swakꞌeꞌ tzatz. Kol tzajak jalaj atz te yi inmeꞌbiꞌl swakꞌeꞌ tzatz, stzun yi rey bantz.
7-8 —Iluꞌ wutzileꞌn kareyil, chij Ester, —yi ko bintzinin na pekꞌuꞌ sweꞌj sbneꞌ binuꞌaꞌtz yi mbil tzinjak teruꞌ. Na kloꞌ waj yil chuꞌluꞌ junt tir tan waꞌaꞌn swuchꞌ ek, chicabiluꞌ tu Amán. Eklen tzun tzinjak yi wajbil teruꞌ, stzun yi reina bantz.
9 Wiꞌnin tzun tzatzineꞌn tetz Amán yi teleꞌn tzaj xe yi caꞌl yi reina. Poro yi tponeꞌn stziꞌ puertil yi caꞌl yi rey, nintzun tiltz yi cꞌolchij Mardoqueo. Poro siquier nink kꞌajlan tzaj Mardoqueo tetz. Wech na at kꞌej Amán taneꞌn. Chaꞌstzun te ẍchiꞌcheꞌn mas cꞌuꞌltz teꞌj. 10 Qui nin ẍchaj iꞌ te yi rataꞌtz yi na chiꞌch cꞌuꞌl, ma na jalen yi toponeꞌn xe caꞌl. Yi toponeꞌn xe caꞌl nintzun eꞌ ẍchak yi tamiw, tu Zeres yi txkel, nintzun taltz scyetz:
11 —Yi in wetz wiꞌnin inmeꞌbiꞌl. Ateꞌ wiꞌnin innitxaꞌ. Nchaꞌtz at wiꞌnin inkꞌej na in na chincawun xlaj yi rey. At mas inkꞌej ẍchiwutz yi eꞌ mas ajcaw. 12 Nchaꞌtz ja xnaꞌk tan waꞌaꞌn tu yi reina te yi jun chin wutzileꞌn kꞌej yi mbnix taꞌn tan takꞌleꞌn kꞌej yi rey. Ntin cuꞌn in nxnaꞌk. Quiꞌc jun nink nxaꞌk. Ej nin ja katxocxij junt tir tan kabeneꞌn eklen, na yi in wetz at wiꞌnin inkꞌej xlaj yi rey. 13 Poro quiꞌc na takꞌ swetz na nin na el inkꞌej tan yi jun taꞌkl judiy yi Mardoqueo biꞌ, yi cꞌolchij stzi puertil yi caꞌl yi rey, na qui na takꞌ iꞌ inkꞌej, stzun Amán bantz.
14 Itzun cyal yi txkel tu yi eꞌ tamiw tetz:
—Ma jaluꞌ taꞌ Amán, bintzi na taluꞌ, at wiꞌnin kꞌejuꞌ. Chaꞌstzun te tajweꞌn kakꞌ len kꞌejuꞌ. Ma yi jun judiyaꞌtz yi qui na takꞌ kꞌejuꞌ, cawunkuꞌ tan jeꞌn jakꞌ tzeꞌ. Cawunkuꞌ tan banleꞌn jun chin wutzileꞌn tzeꞌ tan junak cob metr wutz tkan. Baꞌn tzun jakuꞌ amaꞌl tetz yi rey tan jeꞌn chꞌimbaꞌn yi jun judiyaꞌtz eklen jalchan. Quiꞌc tzun bislejuꞌ yil chibenuꞌ tan waꞌaꞌn tuchꞌ yi reina ek, cheꞌch tzun yi eꞌ tamiw tu txkel tetz.
Baꞌn tzun ban yi jun txumuꞌnaꞌtz swutz Amán. Nintzun cawunin tan jeꞌn chitxicbal jun chin wutzileꞌn tzeꞌ tan jeꞌn chꞌimbaꞌn Mardoqueo tzakꞌ.