Yi jaleꞌn kꞌej Mardoqueo swutz yi rey
6
1 Itzun te yi akꞌbalaꞌtz quinin oc watl yi rey, nintzun cawun nintz tan ticyꞌleꞌn tzaj yi liwr kale tzꞌibaneꞌt cyakil yi eꞌchk xtxolbil yi mbi cuꞌn mbajij le yi eꞌchk amaꞌl yi at jakꞌ caꞌwl iꞌ. Nin cawun iꞌ-tz tan jeꞌn siꞌleꞌn swutz. 2 Nin te yi na chitzan tan siꞌleꞌn, nin eꞌ nojpontz te jun xtxolbil kale na talwit yi mbi cuꞌn ban Mardoqueo tan colcheꞌn yi rey yi toqueꞌn chitxumuꞌn Bigtán tu Teres, tan biyleꞌn kloꞌ yi rey.a Yi cob yajaꞌtz eꞌ chibajxom yi eꞌ sanlar yi eꞌ qꞌuicyꞌlom rey. 3 Yi tbital yi rey, nintzun taltz:—¿Mbi tzun akꞌlij tetz Mardoqueo tan yi pawor yi ban iꞌ sweꞌj? Na ja chin clax taꞌn.
—Quiꞌc akꞌlij tetz. Quiꞌc, cheꞌch yi eꞌ ajcaw yi ateꞌ tan qꞌuicyꞌleꞌn yi rey.
4 Icunin na chijilon yi rey scyuchꞌ yi eꞌ ajcaw yi ateꞌ-tz yi tocomponeꞌn Amán stziꞌ caꞌl. Choꞌn tocomponeꞌn tan jakleꞌn permis tetz yi rey tan jeꞌn chꞌimbaꞌn Mardoqueo jakꞌ tzeꞌ yi sken bnix taꞌn. Beneꞌn tzun jakol yi rey scyetz yi eꞌ yi ateꞌ-tz teꞌj:
—¿Naꞌ scyetz iꞌ yi jun yi na xon tziꞌn? stzun iꞌ-tz.
5 —Iꞌtz Amán, cheꞌch yi eꞌ mas ajcaw bantz.
—Baꞌn tzꞌoc tzaj, stzun yi rey.
6 Yi tocomponeꞌn Amán nintzun ben jakol yi rey tetz:
—Amán, ¿mbil tzimban tan takꞌleꞌn kꞌej jun yaj yi na chimpekꞌ teꞌj?
“¿Naꞌ scyetz junt yi na pekꞌ yi rey teꞌj? Cyaꞌl, ntin cuꞌn in,” stzun Amán tcꞌuꞌl cuntuꞌ.
7 Beneꞌn tzun tlol tetz yi rey:
—Iluꞌ kareyil, chinch wetz yi tajweꞌn tan bnoluꞌ te yi junaꞌtz yi na pekꞌuꞌ teꞌj iꞌtz: 8 Tajweꞌn tan wekxeꞌn tan jun beꞌch teruꞌ. Ej nin nchaꞌtz tajweꞌn ljeꞌ tibaj jun ẍchejuꞌ nin jeken jun coron twiꞌ yi jun chejaꞌtz tan ẍchajleꞌn yi at kꞌej yi jun yajaꞌtz. 9 Ej nin yi eꞌchk beꞌchokaꞌtz tajweꞌn yi tzꞌakꞌlij tetz jun wiꞌtz ajcaw yi at jakꞌ caꞌwluꞌ tan toqueꞌn iꞌ tan wekleꞌn yi junaꞌtz yi na pekꞌuꞌ teꞌj. Yi wiꞌt wekxij baꞌn ljeꞌ tibaj yi ẍchejuꞌ tan yi junaꞌtz. Nin bajx cuꞌn swutz tan talcheꞌn yi yoleꞌj ẍchiwutz cyakil wunak yi ateꞌ tbeꞌ: “Jeꞌj, yaꞌstzun na bajij te jun yi na akꞌlij kꞌej tan yi rey,” stzun Amán bantz tetz yi rey Asuero.
10 —Bintzi yaj, chum balaj nin yi atxumuꞌn, stzun yi rey tetz Amán.
—Or, lajkeꞌl yaj, aẍ bin yi wiꞌtz ajcaw yi baꞌn cẍoꞌc tan wekleꞌn yi junaꞌtz. Cun cyꞌaj jun beꞌch wetz, tu jun balaj inchej. Nin wekxoken yi jun judiy yi na biꞌaj Mardoqueo, iꞌtz yi jun yi cꞌolch cun tunintz stzi puertil yi caꞌl kale na chincawuneꞌt. Banaj cyakil chi yi mawal swetz, stzun yi rey bantz tetz Amán.
11 Toqueꞌn tzun Amán tan wekleꞌn Mardoqueo. Oc yi balaj beꞌchok teꞌj. Kalenaꞌs tzun jeꞌn nintz tibaj chej taꞌn. Nintzun bajx cuꞌn swutz, nin chin tjaꞌj nin bantz tan talcheꞌn yi yoleꞌj: “Jeꞌj, yaꞌstzun na bajij te jun yaj yi na akꞌlij kꞌej tan yi rey,” stzun Amán bantz scyetz wunak yi ateꞌ lak beꞌ tnum.
12 Yi wiꞌt ẍchajxeꞌn Mardoqueo ẍchiwutz cyakil wunak yi ateꞌ tbeꞌ, nintzun ul junt tir stzi puertil yi caꞌl yi rey. Ma tetz Amán nintzun jeꞌ jun xbuꞌk twiꞌ tan tewal wutz tan yi txꞌixweꞌn yi at cuꞌnt nin ajtz lajkeꞌl xe caꞌl. 13 Yi toponeꞌn xe caꞌl nintzun taltz scyetz yi eꞌ tamiw tu yi txkel yi mbi cuꞌn bajij. Yi quibital nintzun cyaltz:
—Yi ko yaꞌtz mbajij, jun cuꞌn yol, quil xcyeꞌ tan biyleꞌn Mardoqueo, na iꞌ jun judiy, nin jun cuꞌn xcyek iꞌ tan apoꞌtzeꞌn na ja wiꞌt el chan atxꞌix taꞌn, cheꞌch.
14 I cunin na chijilontz yi cyoponeꞌn cobox ẍchakum yi rey tan ticyꞌleꞌn Amán tan chibeneꞌn tu yi rey tan waꞌaꞌn tuchꞌ yi reina.