Ester 7

Yi junt balaj waꞌaꞌn yi txumxij tan Ester nin yi jeꞌn Amán jakꞌ tzeꞌ

1 Itzun bantz nintzun ben yi rey tu Amán tan waꞌaꞌn tuchꞌ yi reina te yi junt balaj waꞌaꞌn yi txumijt taꞌn. 2 Te yi na chiwan nin jakt yi rey yi mbi tajbil iꞌ. Je yol iꞌeꞌj:

—Aẍ jun cꞌoloj Ester, jakaj cyakil yi mbi na awaj, na list wutaneꞌn tan takꞌleꞌn tzatz. Nin baꞌn wakꞌ jalaj te yi inmeꞌbiꞌl kol tzajak swetz.

3 —Yi ko bintzinin na pekꞌuꞌ sweꞌj, nin ko baꞌn in swutzuꞌ, qui na waj jun cꞌoloj takleꞌn taꞌ. Ntinaꞌtz na waj tzinjak teruꞌ, iꞌtz tan qui inquimeꞌn nin tan qui chiquimeꞌn yi eꞌ intanum. 4 Na bixbaꞌnt tan kaquimeꞌn kacyakil cuꞌn. Bixbaꞌnt tan kasotzeꞌn. Nink nkaben cꞌayiꞌn chi jun esclaw tuꞌ, qui kloꞌ nnoꞌc tan xuxeꞌnuꞌ, poro tan paj yi tzꞌakꞌonk mal teruꞌ, chaꞌstzun te na cuꞌ inwutz teruꞌ tan qui kaquimeꞌn, tu intanum, stzun Ester tetz yi rey.

5 —¿Naꞌ tzun scyetz iꞌ yi junaꞌtz, yi na tzan tan xtxumleꞌn tan ibiyleꞌn cuꞌn wok? stzun yi rey tetz Ester.

6 —Yi jun kacontraꞌtz yi na chiꞌch cꞌuꞌl skeꞌj, iꞌtz taꞌk yab Amáneꞌj, stzun Ester bantz.

Yi tbital Amán yi xtxolbilaꞌtz, chin sak nin ban tan xoꞌw, nin quiꞌt aꞌw yol taꞌn. 7 Nin yi tbital yi rey, nintzun saj jun chin chiꞌch cꞌuꞌlal tetz, nin eltzaj ojk xe caꞌl kale na chiwaneꞌt. Choꞌn tzun beneꞌntz wutzkꞌanil yi caꞌl kale na cawuneꞌt iꞌ. Ma tetz Amán, nintzun oc cyentz tan cuꞌswutzil tetz yi reina tan cuyul iꞌ paj, na sken nachon Amán yi squimok iꞌ tan yi rey. 8 I cunin tzun at Amán tan cuꞌswutzil tetz yi reina yi tocomponeꞌnt yi rey. Yi beneꞌn tilol yi rey yi choꞌn jokl cyen Amán tibaj yi kejbil kale kejleꞌt Ester, nintzun ẍchꞌin nintz, itzun taltz:

—¡Amán! ¿nxac na cẍtzan tan telseꞌn kꞌej yi reina? Na yi awajbil iꞌtz yi tzaban puers tan iwitbel itib tuchꞌ. Wech na choꞌn atixwok xe incaꞌl, stzun yi rey bantz.

Yi ẍchꞌineꞌn yi rey, nintzun eꞌ saj cobox wart tan stzꞌamleꞌn Amán nin cuꞌ chijopol wutz. 9 At tzun jun scyeri eꞌ wartaꞌtz yi na biꞌaj Harbona, nin saj tloltz tetz yi rey:

—Iluꞌ kareyil, at jun chin wutzileꞌn tzeꞌ tan junak cob metr wutz tkan yi at swutz caꞌl Amán. Iꞌ bnol tetz tan jeꞌn kloꞌ chꞌimbaꞌn Mardoqueo tzakꞌ, yi jun yi ncolonuꞌ tan qui quimeꞌnuꞌ, stzun Harbona bantz.

10 —Ko yaꞌtz or jeꞌn cꞌalij Amán tzakꞌ tan teleꞌn cuꞌn swutz, stzun yi rey bantz.

Choꞌn tzun jeꞌn cꞌalij Amán jakꞌ yi jun tzeꞌaꞌtz yi iꞌ teꞌn iꞌ bnon tetz. Bnix yi jun tzeꞌaꞌtz taꞌn tan jeꞌn kloꞌ cꞌalij Mardoqueo tzakꞌ. Poro apart mban, na iꞌ teꞌn nquim tzakꞌ yi jun tzeꞌaꞌtz. Tan yi xtxolbilaꞌseꞌj ja tzun tzatzin junt tir yi rey.