Yi teleꞌn jun caꞌwl tan chicolol quib ye eꞌ judiy ẍchikꞌab yi eꞌ contr
8
1 Itzun te yi kꞌejaꞌtz takꞌ yi rey Asuero yi caꞌl tu cyakil yi meꞌbiꞌl Amán yi chicontr yi eꞌ judiy tetz Ester. Nchaꞌtz nin opon Mardoqueo swutz yi rey na sken tal Ester yi junit eꞌ tu Mardoqueo, na quitzꞌun quitzicy quib yi chitaj. 2 Tkꞌol tzun yi rey yi xmalkꞌab tetz Mardoqueo yi el cyen tcyꞌal tetz Amán. Ma tetz Ester nin oc cyen Mardoqueo taꞌn tetz martomaꞌ tibaj cyakil yi meꞌbiꞌl Amán yi nsken oc tcwent iꞌ.3 Ej nin nchaꞌtz xtxum yi reina tan beneꞌn junt tir swutz yi rey tan yol tetz, tan cuꞌswutzil tan qui chiquimeꞌn yi eꞌ tanum. Nin yi tocomponeꞌn swutz yi rey, nintzun cuꞌ mejlok tan oꞌkl, itzun taltz tetz:
—Taꞌ, iluꞌ kareyil na cuꞌ inwutz teruꞌ tan cawuneꞌnuꞌ tan stzajseꞌn yi jun caꞌwl yi el tan Amán, kale na talwit yi tajweꞌn tan kaquimeꞌn kacyakil yi oꞌ yi oꞌ judiy.
4 Yi tbital yi rey yi yol Ester nintzun ben ẍchajol yi xtxꞌamij yi oro cuꞌn tetz. Jeꞌn tzun txiclok Ester nin taltz:
5 —Iluꞌ wutzileꞌn kareyil yi ko baꞌn swutzuꞌ nink tbituꞌ yi xtxolbileꞌj yi tzinjakeꞌ teruꞌ. Nchaꞌtz ko bintzinin na pekꞌuꞌ sweꞌj na kloꞌ waj yil sbanuꞌ jun baꞌn swetz. Je yi wajbileꞌj: Na kloꞌ waj yi nink cawunuꞌ tan stzajseꞌn yi jun caꞌwl yi el tan Amán yi cyꞌajl Hamedata yi agagueo. Na yi jun caꞌwlaꞌtz na tal yi tajweꞌn tan kaquimeꞌn cyakil yi oꞌ yi oꞌ judiy. Quiꞌc na ban alchok atoꞌt, tajweꞌn tan kaquimeꞌn. 6 Poro ¿ẍeꞌn tzintxꞌaj kol chiquim cyakil eꞌ inxonl scyuchꞌ cyakil yi eꞌ intanum? stzun Ester bantz tetz yi rey.
7 Yi tbital yi rey, nintzun ben tlol scyetz Mardoqueo tu Ester:
—Quil cxbisun wok na ja wakꞌ cyakil yi meꞌbiꞌl Amán tetz Ester. Nin nchaꞌtz ja jeꞌ chꞌimbaꞌn Amán jakꞌ tzeꞌ. Na ja oc iꞌ tan contriꞌn tziteꞌj yi axwok judiy. 8 Ma jaluꞌ swakꞌeꞌ amaꞌl tzitetz tan beneꞌn itzꞌibal alchok caꞌwl tan chiclaxeꞌn yi itanum. Yil bnix itaꞌn baꞌn cuꞌ nin imbiꞌ teꞌj, nin nchaꞌtz baꞌn cuꞌ nin yi insey teꞌj, stzun yi rey bantz. (Te yi tiemp sajleꞌn yi na cuꞌ nin wikꞌab yi rey tu yi sey iꞌ te jun cart tajweꞌn cuꞌn tan banleꞌn taneꞌn nin quiꞌc rmeril tan stzajseꞌn.)
9 Lajkeꞌl nintzun beneꞌn mantar tan chichakleꞌn cyakil yi eꞌ ajtzꞌib yi na chakꞌuj jakꞌ wiꞌ yi rey. Yi chimolol quib nintzun eꞌ oc tan stzꞌibeꞌn cyakil yi xtxolbil yi tal Mardoqueo scyetz nin bnix wiꞌnin cart tan beneꞌn ẍchikꞌab yi eꞌ ajcaw yi ateꞌ le jujun tnum tu cyakil eꞌ mas ajcaw yi na chicawun tibaj yi jun cient tu junak juk nación yi at jakꞌ caꞌwl yi rey. Yi eꞌchk amaꞌlaꞌtz choꞌn nxeꞌt tzaj te yi mojom tetz India nin na opon jalen te mojom tetz Etiopía. Cyakil yi eꞌchk cart yi bnix, bnix le cyakil jilwutz chiyol nin cyakil jilwutz chiꞌalfabeto yi nxcon cyakꞌun wunak beneꞌn tziꞌn. Nchaꞌtz bnix le chiyol tu chiꞌalfabeto yi eꞌ judiy. Ja bnix yi xtxolbileꞌj le junak ox tajlal yi xaw Siván yi toxiꞌn xaw te yi cyetz chiyob. 10 Yi bnixeꞌn cyakil yi eꞌchk cartaꞌtz nintzun cuꞌ yi biꞌ yi rey teꞌj. Nchaꞌtz cuꞌ yi sey iꞌ teꞌj. Kalenaꞌs tzun chibeneꞌn yi eꞌ ẍchakum yi rey yi yaꞌtz nin chixac, tan jatxleꞌn eꞌchk cart. Lajkeꞌl nin eꞌ beneꞌntz te eꞌ ẍchej yi rey, yi wiꞌnin choꞌjkel tan jatxleꞌn yi eꞌchk cartaꞌtz. 11 Tul yi eꞌchk cartaꞌtz na tal yi baꞌn chimoleꞌn quib yi eꞌ judiy alchok amaꞌlil ateꞌt, tan chicolol quib ẍchikꞌab yi chicontr. Alchok wunakil yil choꞌc tan contriꞌn scyeꞌj, baꞌn chiquim tircuꞌn, tuml yi chinitxajil tu quixkel. Ej nin yi chicaꞌl tu chimeꞌbiꞌl baꞌn cyetzaj yi eꞌ judiy. 12 Poro yi xtxolbilaꞌtz tajweꞌn tan chibnol taneꞌn tul jun ntziꞌ kꞌej. Nin bixeꞌ yi tajweꞌn tan chibnol taneꞌn le oxlaj tajlal yi coblajiꞌn xaw tetz yi yob yi iꞌtz Adar. 13 Nchaꞌtz bixeꞌ tan teleꞌn yi jun caꞌwlaꞌtz ẍchiwiꞌ cyakil wunak lakak eꞌchk tnum beneꞌn tziꞌn, bantz chibnol list quib yi eꞌ judiy tan quicyꞌsal chicꞌuꞌl scyeꞌj chicontr. Quiꞌc na ban alchok ateꞌt yi eꞌ judiy. 14 Nintzun cawunin yi rey scyetz yi eꞌ aj chejinl tan chibeneꞌn lajkeꞌl tan jatxleꞌn yi eꞌchk cartaꞌtz. Nchaꞌtz siꞌlij yi jun caꞌwlaꞌtz ẍchiwutz cyakil wunak le tnum Susa.
15 Itzun yi teleꞌn tzaj tetz Mardoqueo xe caꞌl kale na cawuneꞌt yi rey, wekoꞌn tib iꞌ chi jun rey, na txib tu sak yubil yi beꞌch tetz. Nchaꞌtz, ateꞌn jun chin coron twiꞌ yi oro cuꞌn. Nin cyꞌaꞌn jun xbuꞌk taꞌn yi lino cuꞌn, nin yi xkꞌaykꞌuj yubil. Wiꞌnin tzun chiẍchꞌineꞌn yi eꞌ wunak tan yi tzatziꞌn yi quilol yi teleꞌn tzaj Mardoqueo xe caꞌl yi rey. 16 Nchaꞌtz eꞌ ban yi eꞌ judiy wiꞌnin chitzatzineꞌn, na iꞌtz jun chin claxeꞌn tetz cyetz. Quiꞌt nchibisun, na ja chitxꞌacon, nin ja jalt junt tir chikꞌej. 17 Ej nin chaꞌtz eꞌ ban cyakil yi eꞌ mas judiy yi ateꞌ lakak mas tnum kale oponeꞌt yi caꞌwl tan qui chiquimeꞌn. Wiꞌnin chitzatzineꞌn. At wiꞌnin eꞌ bnix balaj waꞌaꞌn cyaꞌn. Nin bnix balaj kꞌej cyaꞌn. Ej nin at wiꞌnin wunak yi nkꞌeꞌtz eꞌ judiy, eꞌ oc tetz judiy na tircuꞌn yi eꞌ mas wunak ja cyek ẍchiꞌ yi eꞌ judiy.