9
1 Itzun le oxlaj tajlal yi xaw Adar yi coblajiꞌn xaw tetz yi yob, yaꞌstzun yi bixeweꞌn tan yi rey tan chiclaxeꞌn yi eꞌ judiy, na yaꞌstzun yi kꞌej yi eꞌ oc kloꞌ yi eꞌ contr scyeꞌj yi eꞌ judiy tan chibiyleꞌn. Poro apart ban teraꞌtz, na i yi eꞌ judiy eꞌ xcyeꞌ tan chibiyleꞌn yi eꞌ contr. 2 Na tircuꞌn chimolol quib yi eꞌ judiy yi ateꞌ lakak tnum yi at jakꞌ caꞌwl yi rey Asuero tan oyintziꞌ scyeꞌj chicontr. Poro yi eꞌ chicontr qui nin eꞌ nimsaj quib tan oyintziꞌ scyeꞌj, na nin saj jun chin xoꞌw scyeꞌj. 3 Nchaꞌtz eꞌ ban cyakil yi eꞌ ajcaw le eꞌchk tnum tu yi eꞌ mas ajcaw yi na chicawun xlaj yi rey, nin xom chiwiꞌ scyeꞌj eꞌ judiy na nin eꞌ xob tetz Mardoqueo. 4 Na yi Mardoqueo sken jal wiꞌnin kꞌej xlaj yi rey, na nin quibit cyakil yi eꞌ wunak beneꞌn tziꞌn yi nsken jal wiꞌnin kꞌej iꞌ, na cyakil nin kꞌej tzan jaleꞌn mas tetz kꞌej. 5 Tircuꞌn chiquimeꞌn yi chicontr yi eꞌ judiy cyaꞌn. Wiꞌnin eꞌ, eꞌ quim tan spar, na baj cunin quicyꞌsal chicꞌuꞌl yi eꞌ judiy scyeꞌj chicontraꞌtz. 6 Oꞌ cient yaj eꞌ quim cyakꞌun le tnum Susa.7 Nchaꞌtz eꞌ quim yi lajuj cyꞌajl Amán yi jun yi chiꞌch cꞌuꞌl scyeꞌj yi eꞌ judiy. 8 Yi chibiꞌ yi lajuj cyꞌajlaꞌtz iꞌtz: Parsandata, Dalfón, Aspata, 9 Porata, Adalía, Aridata, 10 Parmasta, Arisai, Aridai tu Vaizata. Tircuꞌn chiquimeꞌn. Ma yi chimeꞌbiꞌl quiꞌc oc cyajal teꞌj.
11 Itzun yi tbital yi rey yi sken chiquim jun cꞌoloj wunak te yi jun kꞌejaꞌtz le tnum Susa, nintzun taltz tetz Ester yi reina:
12 —Aẍ jun cꞌoloj reina ja kubit yi ja chiquim oꞌ cient wunak tzoneꞌj Susa scyuchꞌ yi lajuj nitxajil Amán. Apart yi eꞌ yi nchiquim le mas amaꞌl beneꞌn tziꞌn. ¿Ma jaluꞌ at peꞌ mas na awaj yil wakꞌ tzatz? stzun yi rey tetz Ester.
13 —Iluꞌ kareyil, ntyoẍ tuꞌ, ntinaꞌtz na waj yil takꞌuꞌ amaꞌl sketz yi oꞌ judiy tan chijeꞌn kachꞌimbal yi lajuj cyꞌajl Amán jakꞌ tzeꞌ eklen, chi yi caꞌwl yi bnixnak cyen tan Amán tetz taꞌ Mardoqueo, stzun Ester tetz yi rey.
14 Nintzun cujij yi rey. Cawuneꞌn nintzun iꞌ-tz teꞌj. Nintzun el stziblal ẍchiwiꞌ cyakil yi eꞌ judiy yi ateꞌ le tnum Susa tan jeꞌn chꞌimbaꞌn chiwankil yi lajuj almaꞌaꞌtz jakꞌ tzeꞌ. 15 Ej nin le junt eklok, te yi cyajlaj tajlal yi xaw Adar jeꞌ chimololt quib cyakil yi eꞌ judiy yi najlcheꞌ le tnum Susa, nin eꞌ octz tan chibiyleꞌn oxt cient chicontr. Ma yi chimeꞌbiꞌl, quiꞌc oc cyajal teꞌj. 16 Ma le oxlaj tajlal yi xawaꞌtz, choꞌn eꞌ quimeꞌn oxcꞌal tu oꞌlaj mil wunak beneꞌn tziꞌn, na tircuꞌn chimolol quib yi eꞌ judiy tan oyintziꞌ scyeꞌj.
17 Ma le junt eklok, yi cyajlaj tajlal yi xawaꞌtz, tircuꞌn yi eꞌ judiy eꞌ mol quib tan jun chin balaj waꞌaꞌn tan yi tzatziꞌn yi ateꞌ cuꞌnt. 18 Poro yi eꞌ judiy yi ateꞌ Susa cob cuꞌn kꞌej eꞌ ban tan oyintziꞌ. Chaꞌstzun te jalen le oꞌlaj tajlal yi xaw eꞌ ban cyetz jun chin balaj waꞌaꞌn tan yi tzatziꞌn yi ateꞌ cuꞌnt.
19 Ma yi eꞌ yi ateꞌ lakak mas tnum, yi quiꞌc tapij solteꞌj, eꞌ ban jun chum balaj waꞌaꞌn le cyajlaj tajlal yi xaw Adar. Ej nin tan yi tzatziꞌn yi ateꞌ cuꞌnt, baj cyoyil eꞌchk balaj oy squibil quib.
Yi bixeweꞌn yi jun chin nimaj kꞌej yi na biꞌaj Purim
20 Itzun bantz nintzun oc Mardoqueo tan stzꞌibeꞌn yi xtxolbileꞌj scyetz cyakil yi eꞌ judiy yi ateꞌ nakaꞌj scyuchꞌ yi eꞌ yi ateꞌ beneꞌn tziꞌn lakak eꞌchk tnum yi at cwent yi rey Asuero. 21 Yi xtxolbil yi ben stzꞌibal iꞌtz, yi tajweꞌn tan chibnol taneꞌn cyakil yi eꞌ judiy jun balaj kꞌej lakak cyajlaj tu oꞌlaj tajlal yi xaw Adar tetz cyakil yob. 22 Yi xac yi jun kꞌejaꞌtz iꞌtz tan naꞌwseꞌn yi ẍeꞌn cunin chiclaxeꞌn ẍchikꞌab chicontr. Nchaꞌtz tan naꞌwseꞌn yi ẍeꞌn cunin ban yi jeꞌn txꞌixp yi xtxolbil, na yaꞌtz kloꞌ chiquimeꞌn. Poro i chint chicontr eꞌ quim. Nin te yi cob kꞌejaꞌtz tajweꞌn tan chibnol taneꞌn tan jun balaj waꞌaꞌn tu eꞌchk oy yi tajweꞌn tan cyoyil squibil quib nin tajweꞌn tan chichꞌeyaneꞌn scyeꞌj yi eꞌ tal prow yi at tajweꞌn scyetz. 23 Ej nin nchaꞌtz jaluꞌ, cyakil yi eꞌ judiy na chiban taneꞌn yi jun kꞌejaꞌtz, chi cawbeꞌn cyetz tan Mardoqueo. 24 Na yaꞌstzun kloꞌ eꞌ quimeꞌn cyakil yi eꞌ judiy tan Amán yi cyꞌajl Hamedata, yi agagueo, na wiꞌnin na chiꞌch cꞌuꞌl scyeꞌj. Na yi tajbil iꞌ, iꞌtz tan chisotzajeꞌn kloꞌ tircuꞌn. Nin oc suertiꞌna taꞌn tan tilol yi mbi kꞌejil yi baꞌn tan chisotzajeꞌn cuꞌn. 25 Poro apart ban yi xtxolbil, na yi tbital Ester yi xtxumuꞌn Amán yi at tocbil iꞌ tan chibiyleꞌn kloꞌ cyakil yi eꞌ judiy nintzun bentz tan yol tetz yi rey. Nin cyakil yi caꞌwl yi sken bixeꞌ tan Amán choꞌn bajij teꞌj iꞌ tetz, scyuchꞌ yi eꞌ tetz nitxajil, na eꞌ teꞌn cyetz, eꞌ jeꞌ chꞌimbaꞌn jakꞌ tzeꞌ. 26 Chaꞌstzun te bixeweꞌn yi jun balaj kꞌejaꞌtz. Nin oc yi biꞌ-tz tetz Purimb yi na elepont swert nka txꞌiluꞌn. Ej nin tan yi xtxolbil yi bixeꞌ tan Mardoqueo, nin tan cyakil yi eꞌchk takleꞌn yi quil yi eꞌ judiy na chiban taneꞌn yi jun chin wutzileꞌn kꞌejaꞌtz jaluꞌ. 27 Na ja bixeꞌ yi jun chin wutzileꞌn kꞌejaꞌtz chi jun cstumbr cyakꞌun yi eꞌ judiy. Nin tajweꞌn tan chibnol taneꞌn cyakil yi eꞌ judiy scyuchꞌ yi eꞌ chixonl. Nin tajweꞌn tan chibnol taneꞌn yi eꞌ yi na choꞌc cyajlal yi eꞌ judiy. Tajweꞌn tan chibnol taneꞌn yi jun chin wutzileꞌn kꞌejaꞌtz cyakil yob. Nin yi jun chin wutzileꞌn kꞌejaꞌtz cob kꞌej na ban na yaꞌstzun cawbeꞌn cyetz. 28 Yi xac yi jun chin wutzileꞌn kꞌejaꞌtz iꞌtz tan tuleꞌn txꞌakx chicꞌuꞌl yi ẍeꞌn cunin ban yi chiclaxeꞌn. Tajweꞌn tan banleꞌn taneꞌn ẍchixoꞌl cyakil judiy yi ateꞌ beneꞌn tziꞌn tan qui teleꞌn te chicꞌuꞌl nin tan qui teleꞌn te chicꞌuꞌl yi eꞌ chixonl sbneꞌ opon tunintz. Tajweꞌn tan banleꞌn taneꞌn lakak nación tuml eꞌchk tnum, nin le eꞌchk aldey. 29 Nchaꞌtz bnix junt caꞌwl tan yi reina Ester yi meꞌl Abihail tu Mardoqueo, yi judiy, tan talcheꞌn yi mbi tajweꞌn tan chibnol te yi jun chin wutzileꞌn kꞌejaꞌtz yi na biꞌaj Purim. Na at chikꞌej tan banleꞌn jun caꞌwl. 30 Yi bnixeꞌn yi caꞌp caꞌwlaꞌtz cyaꞌn nintzun bentz cyaꞌn ẍchikꞌab cyakil yi eꞌ judiy yi ateꞌ beneꞌn tziꞌn tulak yi jun cient tu junak juk tnum yi at cwent yi rey Asuero. 31 At chumbalaj yol yi na takꞌ tzatzin paz scyetz yi eꞌ judiy tu chixonl. Na tul yi eꞌchk cartaꞌtz na tal yi mbiꞌtz tajweꞌn tan chibnol taneꞌn te yi jun kꞌejaꞌtz. Nin nchaꞌtz na tal yi nkꞌeꞌtz tajweꞌn tan chimucꞌult weꞌj, nka tan chibisuneꞌnt. 32 Yi jun caꞌwlaꞌtz yi el tan Ester ẍchiwiꞌ cyakil yi eꞌ judiy yaꞌstzun xcon tan bixeweꞌn yi jun chin wutzileꞌn kꞌejaꞌtz yi na biꞌaj Purim. Ej nin cyakil eꞌchk caꞌwlaꞌtz, cyaj cyen tzꞌibaꞌn tul jun liwr.