Yi banl Kataj Ryos squibaj yi eꞌ xonl Israel
(1Cr 16:7-22)
105
1 Katyoẍink tetz Kataj. Katxoleꞌ yi tetz biꞌ.Katxoleꞌ scyetz cyakil wunak yi eꞌchk takleꞌn balaj yi na ban.
2 Kabitzink tan takꞌleꞌn kꞌej iꞌ.
Katxoleꞌ yi eꞌchk milawr yi bnix taꞌn.
3 Baꞌn kocsaj kib nim tan tuꞌ yi atoꞌ tcwent iꞌ.
Katzatzink bin yi oꞌ yi kꞌuklij kacꞌuꞌl teꞌj.
4 Kajakeꞌ ẍchꞌeybil ketz tetz na at tetz porer.
Kajakeꞌ ẍchꞌeybil ketz tetz cyakil nin tiemp.
5 Ulk txꞌakx tkacꞌuꞌl, yi eꞌchk milawr yi bnixnak taꞌn, tu cyakil yi eꞌchk caꞌwl yi talnak iꞌ.
6 Ulk txꞌakx tkacꞌuꞌl teꞌj, yi oꞌ, yi oꞌ xonl kꞌajtzun Abraham, yi ẍchakum Ryos, yi oꞌ xonl Jacow, yi jun yi jeꞌnak xtxaꞌol iꞌ.
7 Na iꞌ yi Kataj, iꞌ kaRyosil, nin na cawun beneꞌn tziꞌn wi munt.
8 Poro yi iꞌ tetz, quil tzꞌel yi yol iꞌ te cꞌuꞌl yi suknak tetz Abraham.
Mpe nink chicyꞌ jun mil wekl wunak, ilenin tzꞌelepon kꞌab iꞌ te yi jun yolaꞌtz.
9 Iẍnin nachij yi yolaꞌtz taꞌn yi suknak tetz Abraham,a na iteꞌn nin yolaꞌtz talnak tetz Isaac.
10 Nchaꞌtz iteꞌn nin yolaꞌtz talnak tetz Jacow, tan chixomeꞌn yi eꞌ xonl Israel teꞌj.
Na ja bixeꞌ yi jun trataꞌtz taꞌn tetz ben kꞌej ben sak.
11 Na je yol iꞌeꞌj:
“Swakꞌeꞌ yi eꞌchk amaꞌl cwent Canaán tzitetz.
Yaꞌstzun yi herens swakꞌeꞌ tzitetz,” stzun Ryos bantz.
12 Te yi tiempaꞌtz, quiꞌc mas chixoneꞌn yi eꞌ kamam kateꞌ, nin eꞌ cuꞌn awer nak ban.
13 Na ja chaꞌtij coboxintziꞌ kꞌej tulak eꞌchk amaꞌl nin tulak eꞌchk nación.
14 Poro quinin takꞌ Ryos amaꞌl scyetz chicontr tan cyoqueꞌn tan chibuchleꞌn, ma na nin oc iꞌ tan makleꞌn chiwutz yi eꞌ rey yi taw yi eꞌchk amaꞌlaꞌtz.
15 Na je yol iꞌeꞌj:
“Quiꞌc tzitaj quen scyetz yi eꞌ wetz intanum yi txaꞌij cheꞌt waꞌn. Nin quiꞌc tzitaj quen tan chibuchleꞌn yi eꞌ wetz elsanl intziꞌ,” stzun Ryos bantz.
16 Cuꞌ jun chin weꞌj le cyetz chiꞌamaꞌlaꞌtz tan Kataj. Quiꞌt ntakꞌ iꞌ chiwaꞌ.
17 Poro te yi ntaxk ul yi weꞌjaꞌtz ẍchiwutz yi eꞌ kamam kateꞌ, nsken bajx pon Ẍep taꞌn jalen Egipto.
Na choꞌn beneꞌn cꞌayiꞌn Ẍep scyetz aj Egipto, tetz jun esclaw.
18 Loꞌon yi tkan iꞌ tan cꞌalbeꞌn tetz tan caren, nin oc jopij iꞌ xetzeꞌ.
19 Nin oc Kataj tan pileꞌn jalen cuꞌn yi teleꞌn cuꞌn te yi yol yi sken tal Ẍep scyetz yi eꞌ taj xtxuꞌ, scyuchꞌ yi eꞌ stzicy.
20 Poro yi rey yi na cawun te yi tiempaꞌtz le amaꞌl Egipto nin takꞌ amaꞌl tetz Ẍep tan teleꞌn liwr.
21 Nin oc iꞌ-tz tetz jun martomaꞌ tan qꞌuicyꞌleꞌn cyakil yi at tu yi rey.
22 Nin oc iꞌ tan takꞌleꞌn cyajtzaꞌkl yi eꞌ mas ajcaw nin tijlcꞌuꞌlal yi ateꞌ tan cawuꞌn jakꞌ caꞌwl yi rey.
23 Cyoponeꞌn tzun kamam Israel, yi na aꞌlchij Jacow tetz, le amaꞌl Egipto.
Choꞌn tzun chinajeweꞌntz chi awer nak le jun amaꞌlaꞌtz, yi nchaꞌtz na biꞌaj Cam.
24 Poro ja jeꞌ pucꞌsal Ryos chiwutz. Nin mast cunin chichamil bantz ẍchiwutz yi eꞌ aj Egiptojaꞌtz.
25 Nintzun takꞌ Ryos amaꞌl scyetz yi eꞌ aj Egiptojaꞌtz tan contriꞌn scyeꞌj.
Nin eꞌ octz tan chisubleꞌn kloꞌ yi eꞌ ẍchakum Ryos.
26 Chaꞌstzun te jeꞌn xtxaꞌol Ryos Moisés tu Aarón tetz ẍchakum iꞌ tan chibeneꞌn tan cyelseꞌn tzaj yi eꞌ tetz tanum le amaꞌl Egipto.
27 Bnix wiꞌnin eꞌchk milawr tetz Ryos cyaꞌn le amaꞌlaꞌtz yi na biꞌaj Cam, nin nchaꞌtz le amaꞌl tzꞌinunin tuꞌ.
28 Na, oc tzꞌoꞌtz tan Ryos swutz kꞌej.
Nin tzꞌoꞌtz nin tunin bantz beneꞌn tziꞌn.
Poro yi eꞌ aj Egipto quinin nquibit yi yol Ryos.
29 Nin oc cyakil aꞌ taꞌn tetz chichꞌ, nin cyakil yi cay yi ateꞌ, eꞌ baj quim.
30 Ej nin jeꞌ pucꞌsal chiwutz yi eꞌ woꞌ tul cyakil amaꞌl.
Nchaꞌtz eꞌ baj ocpon xe caꞌl yi rey.
31 Jiloneꞌn tzun Ryos junt tir, nintzun eꞌ saj jun cꞌoloj usil wacẍ scyuchꞌ eꞌ neꞌẍ us taꞌn.
Nin eꞌ ben loꞌon beneꞌn tziꞌn Egipto.
32 Nin tetz xel aꞌbal, ja saj jun chin wutzileꞌn cꞌub aꞌbal taꞌn, yi cyꞌaꞌn kꞌakꞌ taꞌn, beneꞌn tziꞌn Egipto.
33 Nin tircuꞌn loꞌoneꞌn eꞌchk wiꞌ uva tu wiꞌ ibẍ yi awij cyaꞌn, tu cyakil eꞌchk tzeꞌ yi at Egipto.
34 Jiloneꞌn tzun Ryos junt tir, nin eꞌ saj jun cꞌoloj sacꞌ tan bajseꞌn yi cyujul.
Quinin ajlbeꞌn tetz yi jun cꞌoloj sacꞌaꞌtz.
35 Tircuꞌn bajeꞌn yi eꞌchk ujul cyaꞌn yi at wiꞌak cojbil nin quiꞌc nin jun xtzeꞌ ban cyentz cyaꞌn.
36 Nchaꞌtz tircuꞌn chiquimeꞌn yi eꞌ bajx chicyꞌajl yi eꞌ aj Egipto taꞌn.
37 Cyeleꞌn tzaj tzuntz tan Ryos le jun amaꞌlaꞌtz.
Cyꞌaꞌn jun cꞌoloj oro tu sakal cyakꞌun.
Nin quiꞌc nin jun yabiꞌẍ ẍchixoꞌl.
38 Wiꞌnin chitzatzineꞌn yi eꞌ aj Egipto yi cyeleꞌn tzaj, na wiꞌnin chixobeꞌn scyetz.
39 Ja takꞌ Ryos jun bocꞌoj sbakꞌ tan bajxeꞌn cuꞌn ẍchiwutz, nin jun bocꞌoj kꞌakꞌ tan chitxekeꞌn lakꞌbal.
40 Ja chijak chiwaꞌ tetz, nin ja takꞌ iꞌ tzꞌichin scyetz.
Ja noj chicꞌuꞌl tan yi waj yi choꞌn sajeꞌn tcyaꞌj.
41 Ja pax yi wutz cꞌub taꞌn, nin ja el tzaj aꞌ.
Nin ja xon yi aꞌaꞌtz le amaꞌl tzꞌinunin tuꞌ, chi jun wutzileꞌn tzanlaꞌ.
42 Na, nin ul txꞌakx tcꞌuꞌl yi yol iꞌ yi suknak tetz Abraham yi ẍchakum, jun yol yi chin xan nin, yi quiꞌc rmeril tan qui teleꞌn cuꞌn teꞌj.
43 Yaꞌstzun tulej Ryos yi teleꞌn tzaj tcyꞌal yi eꞌ tetz tanum yi txaꞌij cheꞌ taꞌn.
Nternin na chiẍchꞌin tan yi tzatzin yi ateꞌ cuꞌnt yi cyeleꞌn tzaj.
44 Nin ja takꞌ iꞌ chiꞌamaꞌl yi eꞌ mas wunak scyetz, tuml cyakil yi chimeꞌbiꞌl yi at scyuchꞌ.
45 Yaꞌstzun banak iꞌ, bantz chixomeꞌn te yi tetz caꞌwl tu yi tetz tajbil.
Kakꞌeꞌ bin kakꞌajsbil tetz Kataj Ryos. ¡Aleluya!