Kakꞌeꞌ kakꞌajsbil tetz yi bnol tetz cyakil eꞌchk takleꞌn yi at
104
1 Kakꞌeꞌ kakꞌajsbil tetz Kataj tetz cuꞌn kalmaꞌ.Iluꞌ Kataj, iluꞌ kaRyosil chin wutzileꞌn nin yi kꞌejuꞌ.
Wekoꞌn tibuꞌ tu yi kꞌejuꞌ tu jun chin pakꞌpuchal.
2 Txowiꞌn jun xbuꞌk tanuꞌ yi wiꞌnin na txekun.
Ja el litꞌuluꞌ yi tcyaꞌj chi ik jun chin mantial.
3 Ja jeꞌ xtxicbaluꞌ yi caꞌluꞌ wi aꞌ.
Ja cuꞌ yi tkan caꞌluꞌ xeꞌ yi aꞌ yi at jalen tziꞌn tcyaꞌj.
Na xcon eꞌchk sbakꞌ tetz xombiluꞌ, nin na xonuꞌ tul cyekꞌekꞌ.
4 Yi cyekꞌekꞌaꞌtz, yaꞌstzun ẍchakumuꞌ.
Nin yi kꞌakꞌ yaꞌstzun xconsbeꞌtzuꞌ.a
5 Ja bixeꞌ yi wuxtxꞌotxꞌ tanuꞌ tibaj yi tetz cꞌolchbil.
Nin quiꞌc rmeril yi nink txꞌixpij yi tetz luwar.
6 Piꞌlij yi aꞌ tibaj tanuꞌ, chi ik jun chin xbuꞌk.
Jeꞌnak pon yi aꞌ tanuꞌ tan jopleꞌn yi wiꞌwtz.
7 Poro yi cawuneꞌnuꞌ teꞌj, lajkeꞌl nin maꞌj tancꞌul tib.
8 Ja xon wiꞌak wutz. Ja xon tulak jocoꞌj.
Nin ja opon le amaꞌl yi bixbaꞌnt tanuꞌ.
9 Ja bixeꞌ cyen eꞌchk mojomil tanuꞌ, bantz qui sajeꞌn kojxuj junt tir tan jopleꞌn yi cojbil.
10 Iluꞌ nucꞌul cyen tetz yi eꞌchk neꞌẍ aꞌ yi na xon lakak siwun.
Nin iluꞌ nucꞌul cyen tetz yi eꞌchk tzanlaꞌ yi na xon xoꞌlak wutz,
11 yi na xcon tetz quicꞌaꞌ yi eꞌ smaron txuc.
Nin yaꞌstzun na icyꞌsan yi saktziꞌ scyeꞌj yi eꞌ smaron chej.
12 Nin stziꞌak yi eꞌchk tzanlaꞌaꞌtz yaꞌstzun na chꞌuyeꞌt yi eꞌchk lmak tzeꞌ tanuꞌ.
Nin yaꞌstzun na jaleꞌt cyal yi eꞌ chꞌuꞌl.
Nin yaꞌstzun na cyakꞌwit chikꞌajsbil teruꞌ.
13 Nchaꞌtz iluꞌ na kꞌaꞌjan eꞌchk juꞌ wutz tan yi aꞌbal yi na saj tanuꞌ jalen tcyaꞌj kale najleꞌtuꞌ.
Nin tan yi aꞌbalaꞌtz na txaꞌxax cyakil wuxtxꞌotxꞌ.
14 Iluꞌ na chꞌuysan eꞌchk chꞌim tetz chiwaꞌ yi eꞌ txuc.
Nin iluꞌ na chꞌuysan cyakil jilwutz cyujul wunak yi na xcon tetz chiwaꞌ,
15 yi ixiꞌn, yi na akꞌon chiwalor, nin yi taꞌal uva yi na akꞌon tzatzin scyetz, nin yi na xcyeꞌ tan litzꞌuneꞌn mas chiwutz swutz yi aceitil oliw.
16 Tan yi aꞌbal yi na takꞌ tzajuꞌ, na kꞌaꞌxij eꞌchk tzeꞌ, yi eꞌchk cedro yi na chꞌuy Líbano, yi iluꞌ nin awal tetz.
17 Ej nin te yi eꞌchk tzeꞌaꞌtz, yaꞌstzun na bnixeꞌt chisoc yi eꞌ neꞌẍ chꞌuꞌl.
Nin xoꞌlak kꞌab eꞌchk lmak tzaj, yaꞌstzun na bnixeꞌt chisoc yi eꞌ cigueña.b
18 Ej nin wiꞌak eꞌchk juꞌ wutz, yaꞌstzun chinajbil eꞌ smaron chiw.
Ej nin wutzak eꞌchk txakxlaꞌ, yaꞌstzun kale na cyewit quib yi eꞌ tal yac.
19 Iluꞌ bnol tetz yi xaw tan tajleꞌn tajlal xaw tul jun yob.
Nin iluꞌ bnol tetz yi kꞌej, yi na el xtxum tetz yi mbi oril tan jeꞌmuleꞌn nin tan cweꞌn.
20 Iluꞌ txumul tetz yi lakꞌbal.
Nin iluꞌ txumul tetz yi tzꞌoꞌtz, yi na cheꞌlsan tzaj yi eꞌ smaron txuc tan joyleꞌn chiwaꞌ.
21 Yi eꞌ balum, na chiẍchꞌin te yi na chijoy chiwaꞌ.
Na chiẍchꞌin tan cꞌucheꞌn chiwaꞌ teruꞌ.
22 Ma yi na jeꞌul kꞌej na chipakxij junt tir lakak chisoc tan watl.
23 Ma yi eꞌ wunak, yaꞌstzun na cheꞌl tzaj cyetz tan akꞌun wi cojbil.
Na chakꞌuj jalen yi na cuꞌ kꞌej.
24 Wiꞌnin eꞌchk takleꞌn yi ja bnix tanuꞌ Taꞌ.
Chin tzꞌaknak cuꞌn ntulejuꞌ tircuꞌn.
Nojnak yi wuxtxꞌotxꞌ tan eꞌchk takleꞌn balaj yi ja bnix tanuꞌ.
25 Nchaꞌtz iluꞌ bnol tetz yi mar yi chin xeꞌ nin.
Yaꞌstzun najlcheꞌt jun cꞌoloj jilwutz txuc.
At lmak, nin at coꞌchok xeꞌ yi maraꞌtz.
26 Choꞌn na chixon eꞌchk lmak barc tibaj.
Nin choꞌn najlij yi jun chin wutzileꞌn txuc tul yi na biꞌaj Leviatán, yi saꞌchbil tuꞌwuꞌ taneꞌn.
27 Iluꞌ akꞌol chiwaꞌ cyakil yi eꞌ txucaꞌtz.
Chꞌiwaꞌn tuꞌ na chiban cyeꞌtz.
28 Na yi na takꞌuꞌ, ntin bajseꞌn na chiban cyetz.
Nin na noj cuꞌn chicꞌuꞌl.
29 Ma kol quil tzꞌocuꞌ il scyeꞌj, na oc xyaꞌyil chiwiꞌ.
Nin ko quil takꞌuꞌ chixew,
ẍchiquimok, nin chocopon junt tir tetz xkꞌol.
30 Poro iluꞌ akꞌol tetz chixew, na iluꞌ bnol cyetz.
Chaꞌstzun te na pucꞌun chiwutz.
Nin na yub junt tir yi cojbiluꞌ.
31 Yi teruꞌ kꞌejuꞌ quil sotz teraꞌtz.
Nin na tzatzinuꞌ te cyakil yi bnixnak tanuꞌ.
32 Yi na xmay tzajuꞌ, quenin na yucan yi wuxtxꞌotxꞌ.
Yi na mac quenuꞌ yi eꞌchk wutz, na jeꞌ pokꞌ sib scyeꞌj.
33 Jalen peꞌk yi itzꞌineꞌt, swakꞌeꞌ inkꞌajsbil tetz Wajcaw yi inRyosil.
34 Na kloꞌ waj yil tzatzin iꞌ te intxumuꞌn.
Na ntin cuꞌn te iꞌ na jaleꞌt tzatzin waꞌn.
35 Lok chisotz yi eꞌ juchul il yi ateꞌ wi munt.
Cheꞌlk cuꞌn yi eꞌ mal nakaꞌtz swutz.
Kakꞌeꞌ bin kakꞌajsbil tetz Kataj tetz cuꞌn kalmaꞌ.
Kakꞌeꞌ bin kakꞌajsbil tetz. ¡Aleluya!c