Kakꞌeꞌ kakꞌajsbil tetz Kataj
103
1 Kakꞌeꞌ kakꞌajsbil tetz Kataj tetz cuꞌn kalmaꞌ.Kakꞌeꞌ kakꞌajsbil tetz yi biꞌ iꞌ tetz cuꞌn kajtzaꞌkl, na wiꞌnin xanil yi tetz biꞌ.
2 Kakꞌeꞌ kakꞌajsbil tetz Kataj tetz cuꞌn kalmaꞌ.
Quil tzꞌel te kacꞌuꞌl yi eꞌchk takleꞌn balaj yi bnixnak taꞌn.
3 Na iꞌ na cuyun cyakil yi kapaj, nin iꞌ na tzꞌacꞌan cyakil eꞌchk jilwutz yaꞌbil yi na oc lacꞌp skeꞌj.
4 Qui na takꞌ iꞌ amaꞌl tan kaquimeꞌn chan, na na pekꞌ iꞌ skeꞌj, nin na takꞌ iꞌ yi banl talmaꞌ squibaj.
5 Nin ja takꞌ iꞌ cyakil eꞌchk takleꞌn balaj sketz.
Nin na takꞌ iꞌ junt tir kawalor, chi na ban jun qꞌuilqꞌuitx yi na jal acꞌaj xiꞌil.
6 Yi Kataj chin tzꞌaknak cuꞌn iꞌ yi na cawun tan chicolcheꞌn yi eꞌ yi na chitij qꞌuixcꞌuj.
7 Talnak iꞌ yi tetz tajbil tetz Moisés.
Nin ẍchajnak iꞌ eꞌchk milawr scyetz eꞌ kamam kateꞌ.
8 Yi Kataj, chumbalaj nin iꞌ, na na el kꞌajab skeꞌj.
At pasens iꞌ, na wiꞌnin na pekꞌ skeꞌj.
9 Nkꞌeꞌtz chaꞌtz cyen tunin iꞌ tan makleꞌn kawutz.
Nin qui na tawnaj cuꞌn iꞌ yi ẍchiꞌchbeꞌn cꞌuꞌl skeꞌj.
10 Nin qui na takꞌ iꞌ yi kacaws yi at kloꞌ akꞌbil tetz tan kapaj tu katxꞌokꞌbeꞌn yi kajuchnak swutz iꞌ.
11 Wiꞌnin banl talmaꞌ iꞌ scyeꞌj yi eꞌ yi na cyakꞌ kꞌej iꞌ.
Icyꞌnak cuꞌn swutz yi tcyaꞌj.
12 Ma yi kil, kajpeꞌn nin mponeꞌt taꞌn.
Choꞌn mban kaxoꞌl tu yi kil chi taneꞌn yi xoꞌl yi teleꞌn tziꞌn tu yi toqueꞌn tziꞌn.
13 Xomij Kataj skeꞌj yi oꞌ yi na kakꞌ kꞌej iꞌ, nin wiꞌnin na pekꞌ iꞌ skeꞌj chi na pekꞌ jun yaj scyeꞌj yi eꞌ tal nitxajil.
14 Na na el xtxum iꞌ sketz yi ẍeꞌn kutaneꞌn.
Na el xtxum tetz yi oꞌ tu xkꞌol.
15 Ej nin yi ankꞌiꞌn yi akꞌij sketz niꞌcuꞌn tu jun buch yi at xoꞌl xtzeꞌ yi jalcuꞌn na loꞌon tan kꞌej.
16 Jalcuꞌn na loꞌon tan cyekꞌekꞌ.
Nin na el cuꞌn swutz nin quiꞌt quil wutz junt tir.
17 Poro yi banl talmaꞌ Kataj quinin bajsbeꞌn tetz scyeꞌj yi eꞌ yi na cyakꞌ kꞌej iꞌ.
Na yi balajil iꞌ quil sotz sbneꞌ opon tunintz.
18 Stzꞌaꞌtok yi banl talmaꞌ iꞌ scyeꞌj yi eꞌ yi na chiban taneꞌn yi trat yi bnixnak taꞌn, yi eꞌ yi na choꞌc cꞌulutxum jakꞌ caꞌwl iꞌ.
19 Yi Kataj choꞌn cꞌolchij jalen tcyaꞌj tan cawuꞌn.
Nin iꞌ na cawun tibaj cyakil yi at beneꞌn tziꞌn.
20 Kakꞌeꞌ bin kakꞌajsbil tetz.
Nin axwok ángel yi akꞌij ikꞌej, akꞌwok kꞌej iꞌ.
Yi axwok itetz yi na xconwok tetz ẍchakum iꞌ, yi axwok itetz yi list atixeꞌtwok tan tbiteꞌn yi tetz caꞌwl, akꞌwok kꞌej iꞌ.
21 Nchaꞌtz cyakil yi eꞌuꞌ ángel yi eꞌuꞌ sanlar tetz Ryos, cyakꞌeꞌuꞌ chikꞌajsbiluꞌ tetz.
Chibneꞌuꞌ taneꞌn yi chimunluꞌ yi ateꞌuꞌ sjuꞌ.
Chixomokuꞌ te yi tetz tajbil.
22 Nchaꞌtz cyakil yi eꞌchk takleꞌn yi bnixnak tan Ryos yi at beneꞌn tziꞌn, tcyaꞌj tu wuxtxꞌotxꞌ, cyakil yi eꞌchk takleꞌn yi at jakꞌ caꞌwl iꞌ, tajweꞌn tan cyakꞌol chikꞌajsbil tetz.
Kakꞌeꞌ bin kakꞌajsbil tetz Kataj tetz cuꞌn kalmaꞌ.