Oración tetz jun yi na sotz cꞌuꞌl
102
1 Wajcaw, tbiteꞌuꞌ yi intziꞌ inkul na na chinẍchꞌin swutzuꞌ.2 Quil tewuꞌ yi wutzuꞌ tzinwutz.
Nin yil tzꞌul eꞌchk sotzaj cꞌuꞌlal tzinwutz, nink tbituꞌ yil cuꞌ inwutz teruꞌ.
3 Na or neꞌl cuꞌn swutz.
Choꞌn wutaneꞌn chi na ban sib yi jalcuꞌn na xit cuꞌn tib, ma yi imbakil nternin na chitxukneꞌ, na tzan chiloꞌoneꞌn.
4 Quiꞌct walor yi walmaꞌ.
Choꞌn cunin taneꞌn chi na skej jun wiꞌ xtzeꞌ.
Nin quiꞌt na chinwan tan paj.
5 Nin tan paj bis oꞌkl yi atin cuꞌnt jalt nin imbakil ekaꞌncheꞌ waꞌn.
6 Inchuc atin. Choꞌn cuꞌn wutaneꞌn chi taneꞌn jun tucruj yi ẍchuc at le eꞌchk amaꞌl tzꞌinunin tuꞌ, nin yi choꞌn at yi soc tulak eꞌchk amaꞌl kale quiꞌcleꞌt jun tuchꞌ.
7 Quiꞌt na oc inwatl.
Nin choꞌn wutaneꞌn chi taneꞌn jun chꞌuꞌl yi ẍchuc at wi ẍchejbil caꞌl.
8 Cyakil nin kꞌej na chitzan yi eꞌ incontr tan imbuchleꞌn.
Nin na xcon imbiꞌ cyaꞌn tan takꞌleꞌn caws jun.
9 Quiꞌt na chinwan tan paj bis.
Nin tan paj oꞌkl, at na bant cuꞌn na ben taꞌal inwutz le wucꞌaꞌ.
10 Wajcaw, cyakil yi eꞌchk takleꞌnaꞌtz yi ja ul tzinwutz, iꞌtz tan paj yi nsaj colp wiꞌuꞌ sweꞌj.
Ntin ntakꞌuꞌ inkꞌej, nin iluꞌ teꞌn mmaꞌjt tan telseꞌn junt tir.
11 Yi ankꞌiꞌn yi akꞌij tanuꞌ swetz tzoneꞌj wuxtxꞌotxꞌ jalcuꞌn na icyꞌ chi na ban mujil sbakꞌ.
Nin chinquimok chan chi na ban jun xtzeꞌ yi jalcuꞌn na skej.
12 Poro yi teruꞌ Wajcaw, ilenin atuꞌ sbneꞌ opon tunintz.
Nin ilenin snaꞌwsok yi biꞌuꞌ.
13 Wajcaw, xcyekeꞌnuꞌ. Elk kꞌajabuꞌ te yi tnumiluꞌ yi at wiꞌwtz Sión.
Na ja jepon yi tiemp tan teleꞌn kꞌajabuꞌ teꞌj, nin tan cuyuluꞌ paj.
14 Na cyakil yi eꞌ ẍchakumuꞌ yi najlcheꞌ le yi jun tnumaꞌtz na chipekꞌ teꞌj.
Poro na chibisun, na cuꞌnak xit.
15 Poro cyakil yi eꞌchk nación scyuchꞌ chireyil, chocopon tan takꞌleꞌn kꞌejuꞌ iluꞌ Wajcaw,
16 yil tzꞌul tzajuꞌ tan banleꞌn baꞌn tetz yi jun tnumaꞌtz yi at wiꞌwtz Sión nin yil lajluchax yi kꞌejuꞌ.
17 Chocopon tan takꞌleꞌn kꞌejuꞌ yil quil nin yi na tbituꞌ chiꞌoración, nin yi quiꞌt slamuꞌ yi ẍchinuꞌ tan tbiteꞌn yi cyajbil yi eꞌ yi cyaꞌl jun na pekꞌ tan quichꞌeyeꞌn.
18 Lok cyaj tzꞌibaꞌn yi xtxolbileꞌj tan quibital yi eꞌ yi xomcheꞌ tzaj, yi eꞌ yi txeꞌn chitzꞌij, bantz cyoqueꞌn tan takꞌleꞌn chikꞌajsbil teruꞌ.
19 Yi Kataj ja xmayin tzaj iꞌ jalen tziꞌn tcyaꞌj le yi tetz amaꞌl yi chin xan nin.
20 Na ja tbit iꞌ chitziꞌ chikul yi eꞌ yi ateꞌ pres bantz cyeleꞌn liwr yi eꞌ yi ja wiꞌt akꞌlij chicaws tan chiquimeꞌn.
21 Yaꞌstzun tulej iꞌ bantz cyoqueꞌn cyakil wunak beneꞌn tziꞌn wi munt tan takꞌleꞌn chikꞌajsbil tetz iꞌ le amaꞌl Sión, yi iꞌtz Jerusalén.
22 Na, chuꞌl cyakil yi eꞌ wunak lakak nación tan cꞌuꞌlajeꞌn Kataj.
23 Ma yi in wetz, ja wiꞌt el inwalor taꞌn.
Wech na anaꞌ na chinnicyꞌan tu yi ankꞌiꞌn yi akꞌij taꞌn swetz.
24 Poro nin waltz tetz:
“Iluꞌ inRyosil. Quil chin tcyꞌaj nin chanuꞌ.
Na anaꞌ na chinnicyꞌan tu yi ankꞌiꞌn yi akꞌij tanuꞌ swetz.”
Yi iluꞌ teruꞌ quiꞌc quimbiluꞌ sbneꞌ opon tunintz.
25 Iluꞌ cuꞌsan yi wuxtxꞌotxꞌ tentz, nin iluꞌ bnol tetz yi tcyaꞌj.
26 Yi eꞌchk takleꞌnaꞌtzeꞌj, sotzok teraꞌtz.
Poro yi iluꞌ teruꞌ, quil sotzuꞌ.
Tzꞌaꞌtokuꞌ tetz ben kꞌej ben sak.
Sbuꞌyink yi wuxtxꞌotxꞌ tu yi tcyaꞌj chi na buꞌyin jun beꞌch ketz.
27 Na yi wuxtxꞌotxꞌ tu yi tcyaꞌj niꞌcuꞌn tu jun beꞌchok yi na el te peꞌm.
Chelepon cyeꞌtz te peꞌm, nin sbnixok acꞌaj tcyaꞌj tu acꞌaj wuxtxꞌotxꞌ.
Poro yi iluꞌ teruꞌ, iẍnin atuꞌ-tz.
Quiꞌc quimbiluꞌ tetz ben kꞌej ben sak.a
28 Tzꞌocoponuꞌ tan chiqꞌuicyꞌleꞌn yi chixonl yi eꞌ ẍchakumuꞌ tan qui chixobeꞌn tetz jun, na yi iluꞌ teruꞌ tzꞌocoponuꞌ tan chiquiwseꞌn.