Yi talol yi rey yi mbi i il tzꞌocopon iꞌ tan banleꞌn
101
1 Na chimpekꞌ te yi lokꞌ ib tu yi ajtzaꞌkl yi jicyuch teꞌj.Nin tan yi xtxolbileꞌj swakꞌeꞌ inkꞌajsbil teruꞌ Wajcaw.
2 Na na waj chinxom te yi ajtzaꞌkl yi jicyuch teꞌj.
Taꞌ, sajk binuꞌ tan wuchꞌeyeꞌn.
Tzinqꞌuicyꞌlej wib tan woqueꞌn tetz tzꞌaknak cuꞌn.
Mpe ik xe wetz incaꞌl kale na chincawuneꞌt, tzinqꞌuicyꞌlej wib.
3 Quil xom inwiꞌ te eꞌchk ajtzaꞌkl cachiꞌ.
Qui na chimpekꞌ scyeꞌj yi eꞌ yi qui na chixom te tajbiluꞌ.
Nin quil wakꞌ amaꞌl scyetz tan cyaꞌteꞌn tzinxlaj.
4 Swileꞌ cyen cyakil yi eꞌchk yab ajtzaꞌkl, na qui na waj tzimban eꞌchk takleꞌn cachiꞌ.
5 Tzinmakeꞌ chiwutz yi eꞌ yi ewun cuntuꞌ na choꞌc tan yolcheꞌn chiwisin.
Nin quiꞌt na waj yi cyajtzaꞌkl yi eꞌ yi na cyocsaj quib nim, yi eꞌ yi na cyaj yi cuk quenin kawutz scyetz.
6 Poro ẍchimpekꞌok scyeꞌj yi eꞌ yi jicyuch te cyajtzaꞌkl.
Swakꞌeꞌ amaꞌl scyetz tan cyaꞌteꞌn tzinxlaj.
Nin swakꞌeꞌ amaꞌl scyetz tan chixconeꞌn swetz.
7 Quil wakꞌ amaꞌl tetz jun subul nak nka jun laꞌj tan cawuneꞌn tzinxlaj.
8 Chebeleꞌn cuntuꞌ nocopon tan makleꞌn chiwutz cyakil yi eꞌ mal nak yi ateꞌ skaxoꞌl.
Nin chelepon inlajul cyakil yi eꞌ yi na chitzan tan juchleꞌn quil yi ateꞌ skaxoꞌl yi oꞌ tanum Ryos.