Salmos 1

SALMOS

BAJX WEKL TE EꞌCHK SALMO

1:1—41:13

Yi eꞌ yi at banl Kataj squibaj

1 Baꞌn cyeri eꞌ yi qui na chixom te cyajtzaꞌkl yi eꞌ mal nak,

yi qui na chixcyeꞌ cuꞌn tan xtxumleꞌn cyajtzaꞌkl yi eꞌ juchul il,

yi qui na chicꞌoleꞌ ẍchixoꞌl yi eꞌ yi na el kꞌej Ryos cyaꞌn.

2 Ma na choꞌn ajlij chicꞌuꞌl te yi caꞌwl Kataj yi kaRyosil.

Nin skꞌejl tu lakꞌbal na chitzan cyeraꞌtz tan xtxumleꞌn yi eꞌchk caꞌwlaꞌtz.

3 Yi eꞌaꞌtz, niꞌcuꞌn tzun quitaneꞌn chi jun wiꞌ tzeꞌ yi awij stziꞌ aꞌ.

Yi jun tzeꞌaꞌtz na takꞌ wutz yi na opon tiempil.

Nin quiꞌc jun kꞌej najk num yi xak.

Niꞌcuꞌn tzun quitaneꞌn cyakil yi eꞌ balaj wunakaꞌtz, na na wutzin cyakil yi na chiban.

4 Ma yi eꞌ wunak yi cachiꞌ cyajtzaꞌkl, choꞌn quitaneꞌn cyetz chi taneꞌn xak xtzeꞌ, yi na ben tan cyekꞌekꞌ.

5 Chaꞌstzun te yil tzꞌoc Ryos tan maꞌleꞌn cyajtzaꞌkl yi eꞌaꞌs, quil chinimsaj chicꞌuꞌl tan chicolol quib, na quibeꞌ tajlal yi eꞌ balaj.

6 Yi eꞌ balaj nak, qꞌuicyꞌleꞌn cheꞌ tan Ryos.

Ma yi eꞌ mal nak, ẍchisotzok cyeraꞌtz.