Yi wiꞌtz Ajcaw yi bixbaꞌnt tan Ryos
2
1 ¿Mbi xac na chinil quib wunak tan xtxumleꞌn oyintziꞌ?a¿Mbi tzuntz na chitzan yi eꞌchk tnum tan xtxumleꞌn yi eꞌchk ajtzaꞌkl yi quil chixcyeꞌ teꞌj?
2 Na ja je chimolol quib cyakil yi eꞌ ajcaw yi ateꞌ beneꞌn tziꞌn wi munt.
Cyakil yi eꞌ bajxomaꞌtz, junit taneꞌn chitxumuꞌn tan contriꞌn teꞌj Kajcaw yi bixbaꞌnt tan Ryos tetz cyajcawil cyakil wunak.
Nin je chiyol yi eꞌ contreꞌj:
3 “Kapakꞌleꞌ cuꞌn yi eꞌchk caren yi at tan katzꞌamleꞌn.
Kacꞌapleꞌ cuꞌn yi eꞌchk cꞌalbil ketz.”
4 Ma yi Jun yi choꞌn najlij tcyaꞌj, tzeꞌeꞌn tuꞌ na ban iꞌ scyeꞌj.
Xbajtziꞌeꞌn tuꞌ na ban yi Kataj aꞌtz scyeꞌj.
5 Chaꞌstzun te ja jeꞌ lajp wiꞌ iꞌ scyeꞌj.
Nin ja saj colp wiꞌ iꞌ tan chiyajleꞌn.
Nin je yol iꞌeꞌj:
6 “In wetz, nchimbixban yi ajcaw yil cawun.
Choꞌn bixeweꞌn waꞌn tan cawuneꞌn wi Sión,b yi amaꞌl yi wiꞌnin xanil,” stzun Kataj Ryos bantz.
7 Ma jaluꞌ swaleꞌ yi xtxolbil yi ja bixeꞌ tan Kataj sweꞌj:
“Aẍ jun cꞌoloj incyꞌajl.c Jaluꞌ nnoꞌc tetz ataj,” stzun iꞌ swetz.
8 Nchaꞌtz tal:
“Jakaj cyakil yi eꞌchk tnum tetz aherens, nin swakꞌeꞌ tzatz.
Nchaꞌtz swakꞌeꞌ cyakil yi eꞌchk amaꞌl tzatz yi at beneꞌn tziꞌn wi munt.
9 Cheꞌlk cuꞌn cyakil yi ajcawaꞌtz awaꞌn swutz.
Xitweꞌ cuꞌn, chi na cuꞌ pokꞌloꞌn jun ẍwokꞌ tan jun txꞌamij yi chꞌichꞌ cuꞌn,” stzun Wajcaw bantz swetz.
10 Chaꞌstzun te, eꞌuꞌ ajcaw, yi eꞌuꞌ wiꞌtz pujul chixoꞌl wunak beneꞌn tziꞌn wi munt, quibit tzajuꞌ inyol.
Lok tzꞌel chitxumuꞌ te yi xtxolbilaꞌseꞌj.
Lok cyocsajuꞌ yi makbil chiwutzuꞌ.
11 Lok choꞌcuꞌ jakꞌ caꞌwl yi Kataj.
Lok cyekuꞌ ẍchiꞌ iꞌ.
Lok chixobuꞌ tetz.
Na kol chibanuꞌ yi xtxolbilaꞌtz, chitzatzink tzunuꞌ-tz.
12 Cyakꞌeꞌuꞌ bin kꞌej yi Cyꞌajol, tan qui cyakꞌoluꞌ chꞌon tetz, nin tan qui chiquimeꞌnuꞌ taꞌn.
Na yil jeꞌ lajp wiꞌ iꞌ, cyaꞌl jun yi nink clax tkꞌab.
Baꞌn cyeri eꞌ yi choꞌn kꞌuklij chicꞌuꞌl teꞌj iꞌ.