Nachleꞌn Kataj tan jakleꞌn ẍchꞌeybil ketz
3
1 ¡Ay Taꞌ!Quin tech nin incontr yi na chiꞌch chicꞌuꞌl sweꞌj.
Quin tech nin eꞌ yi ja jeꞌ chimolol quib tan contriꞌn sweꞌj.
2 Quin tech nin eꞌ na cyal squibil quib: “Quiꞌt tzꞌoc Ryos tan ẍchꞌeyeꞌn.”
3 Ma iluꞌ Taꞌ, iluꞌ colol wetz.
At ninuꞌ-tz tan incolcheꞌn, na iluꞌ akꞌol inkꞌej, nin iluꞌ quiwsanl wetz.
4 Sajleꞌn tunintz, ja el intziꞌ tetz Wajcaw, nin ilenin ja stzaꞌwej iꞌ yi intziꞌ inkul.
Nin ilenin choꞌn na saj ẍchꞌeybil wetz wi Sión, kale najleꞌt iꞌ, yi amaꞌl yi wiꞌnin xanil.
5 Yi na chincoyeꞌ cuꞌn, jalcuꞌn na saj inwatl.
Yi na ul skil, baꞌn cuntuꞌ na chincꞌas, na at Wajcaw tan inqꞌuicyꞌleꞌn.
6 Qui na chinxob scyetz yi jun cꞌoloj incontr, yi ja wiꞌt baj chisutal yi amaꞌl kale atineꞌt.
Na yi cyajbil iꞌtz tan imbiyleꞌn, poro qui na chinxob scyetz.
7 Taꞌ, chin ẍchꞌeyajuꞌ, chin coleꞌuꞌ.
Na ntin iluꞌ mmoꞌc kꞌabuꞌ tan stzekꞌleꞌn xak chitziꞌ yi eꞌ mal nakaꞌtz.
Chin kꞌuchiꞌn cunin na saj yi cyeꞌ tanuꞌ Taꞌ.
8 Na ntin iluꞌ Taꞌ na xcyeꞌuꞌ tan kacolcheꞌn.
Takꞌtzajuꞌ yi banluꞌ skibaj, yi oꞌ tanumuꞌ.