List wutaneꞌn tan takꞌleꞌn inkꞌajsbil tetz Wajcaw
(Sal 57:7-11; 60:5-12)
108
1 Wajcaw, iluꞌ inRyosil.List wutaneꞌn tan takꞌleꞌn inkꞌajsbil teruꞌ.
List taneꞌn walmaꞌ tan takꞌleꞌn kꞌejuꞌ.
Swakꞌeꞌ inkꞌajsbil teruꞌ.
2 Tetz cuꞌn walmaꞌ swakꞌeꞌ inkꞌajsbil teruꞌ cyakil jalchan. Xconk eꞌchk kbetz tan takꞌleꞌn kꞌejuꞌ chi taneꞌn arpa tu salterio.
3 Tzimbitzij eꞌchk bitz swutzuꞌ tan takꞌleꞌn kꞌejuꞌ Wajcaw ẍchiwutz cuꞌn cyakil wunak. Quiꞌc na ban alchok jilwutz wunakil.
4 Na yi iluꞌ teruꞌ Wajcaw wiꞌnin xtxaxl talmaꞌuꞌ skibaj, na icyꞌnak cuꞌn swutz yi tcyaꞌj. Baꞌn kꞌukeꞌ kacꞌuꞌl teꞌjuꞌ na na el kꞌabuꞌ te yoluꞌ.a
5 Ma jaluꞌ iluꞌ inRyosil yi iluꞌ teruꞌ wiꞌnin poreruꞌ. Na iluꞌ na cawunuꞌ tibaj cyakil eꞌchk takleꞌn yi at beneꞌn tziꞌn tcyaꞌj. Nin yi banluꞌ at beneꞌn tziꞌn wi munt.
6 Ma jaluꞌ bin tbiteꞌuꞌ yi na cuꞌ kawutz teruꞌ.
Sajkuꞌ tan kuchꞌeyeꞌn tan yi teruꞌ poreruꞌ.
Cheꞌ coleꞌuꞌ yi eꞌ yi na pekꞌuꞌ scyeꞌj.
7 Na je bin yoluꞌeꞌj Wajcaw, yi talnakuꞌ:
“Tetz cuꞌn walmaꞌ yil noꞌc tan jatxleꞌn cuꞌn yi amaꞌl Siquem scyetz yi eꞌ intanum.
Nchaꞌtz lwulej yi ẍkꞌajlaj Sucot.
8 Nchaꞌtz cyakil yi amaꞌl cwent Galaad tu Manasés, na wetz cuꞌn tircuꞌn.
Ma yi amaꞌl tetz Efraín, niꞌcuꞌn taneꞌn teꞌtz chi taneꞌn jun casco te inwiꞌ.
Ma yi chiꞌamaꞌl yi eꞌ aj Judá, choꞌn taneꞌn teꞌtz chi taneꞌn jun txꞌamij yi tzꞌamij waꞌn.
9 Ma chiꞌamaꞌl yi aj Moab, yaꞌstzun yi amaꞌl kale na chintxꞌajoneꞌt, kale na intxꞌaj wit inkꞌab.
Ma yi chiꞌamaꞌl yi eꞌ aj Edom, colbil tuꞌ inxajab teraꞌtz.
Ma yi eꞌ filistey, chinẍchꞌink yil chinxcyeꞌ scyeꞌj.”
10 Ma jaluꞌ Wajcaw, ¿naꞌ scyetz jun yi sbajxok skawutz tan kaxcyeweꞌn scyeꞌj yi eꞌ kacontr yi ateꞌ tul jun tnum yi at chin tapij solteꞌj?
¿Naꞌ scyetz jun yi sbajxok skawutz tan koponeꞌn tan oyintziꞌ scyeꞌj eꞌ aj Edom?
11 Cyaꞌl binaꞌtz, na ja koꞌ cyaj cyen tiloluꞌ.
Quiꞌt na xomuꞌ skeꞌj yi na keꞌl tan oyintziꞌ.
12 Poro Taꞌ, ¿qui peꞌ tzꞌel kꞌajabuꞌ skeꞌj?
Koꞌ ẍchꞌeyajuꞌ ẍchikꞌab yi eꞌ kacontr.
Na yi oꞌ ketz quiꞌc nin ketz kaxac.
13 Poro yi nink xomuꞌ skeꞌj, jun cuꞌn skaxcyek scyeꞌj yi eꞌ kacontr, na iluꞌ tzꞌocoponuꞌ tan chixiteꞌn cuꞌn chicyakil cuꞌn.