Yi jakol Luwiy chicaws yi eꞌ contr iꞌ swutz yi wiꞌtz pujul xtisyaꞌ
109
1 Iluꞌ inRyosil, tbiteꞌuꞌ yi intziꞌ inkul, quiꞌk tew tibuꞌ tzinwutz.2 Na yi eꞌ laꞌj scyuchꞌ yi eꞌ mal nak na chitzan tan inyolcheꞌn. Nin laꞌjil cuꞌn na chitzan tan xtxumleꞌn cuꞌn sweꞌj.
3 Ja wiꞌt chimbaj chisutil, nin na chitzan tan injisleꞌn.
Quiꞌc wetz wil, poro na cyaj choꞌc tan imbiyleꞌn.
4 Yi na inchaj yi lokꞌ ib scyetz, oyintziꞌ chint na chiban sweꞌj.
Poro yi in wetz, jalt nin cꞌucheꞌn ẍchꞌeybil wetz na imban teruꞌ.
5 Ej nin yi na imban jun baꞌn scyetz, contr chint na chiban sweꞌj. Nin yi na inchaj yi lokꞌ ib scyetz, chiꞌcheꞌn chint na ban chicꞌuꞌl sweꞌj.
6 Chaꞌstzun te lok choꞌc swutz jun pujul xtisyaꞌ yi chin mal nin iꞌ. Lok tal yi cyetz chiyolol tan takꞌleꞌn mas quil.
7 Lok tal yi jun pujul xtisyaꞌaꞌtz yi eꞌ aj paj. Lok xcon iteꞌn nin chiyol tan lajluchaxeꞌn yi eꞌ aj paj.
8 Lok chiquim chan, nin apartk cambij te yi chimeꞌbiꞌl.
9 Nink chicyaj chinitxaꞌ tetz meꞌbaꞌ. Nink chicyaj quixkel tetz xmaꞌlcaꞌnil.
10 Nink cheꞌl yab yi chinitxaꞌ tan rmosumiꞌn. Nink cheꞌl lajuꞌn xe tal chipach yi pentlen tuꞌ at.
11 Nink cambaj yi akꞌol cꞌmoꞌn cyakil chimeꞌbiꞌl.
Lok chicyꞌaj nin yi eꞌ awer nak cyakil eꞌchk takleꞌn yi at scyuchꞌ.
12 Nin cyaꞌl nin junk tzꞌel kꞌajab scyeꞌj, nka scyeꞌj chinitxaꞌ yil chicyaj meꞌbaꞌ.
13 Nink chisotz cyakil yi chixonl. Nink cheꞌl cuꞌn swutz chicyakil cuꞌn.
14 Taꞌ, lok tzꞌul txꞌakx tcꞌuꞌluꞌ yi quil yi chitaj chitxuꞌ. Quil stzajscunuꞌ yi quil yi chitxuꞌ.
15 Nink tzꞌaꞌtij yi quil swutzuꞌ, nin quiꞌtk naꞌwsij chibiꞌ sbneꞌ opon tunintz.
16 Yi eꞌaꞌtz quiꞌc jun tir yi jak el chikꞌajab scyeꞌj yi eꞌ tal prow yi buchijcheꞌ. Ma na ja choꞌc tan chibuchleꞌn mas nin tan chibiyleꞌn cuꞌn.
17 Yi cyetz cyajbil Taꞌ, iꞌtz tan chipoꞌtzeꞌn yi eꞌ balaj. Cheꞌ poꞌtzaj binuꞌ yi eꞌ cyetz. Quinin eꞌ jak banl jun. Qui tzunk ltakꞌuꞌ yi cyetz chibanl.
18 Nink cheꞌ jop cuꞌnuꞌ tul yi ilcꞌol chi na jopx kawankil tan yi beꞌch ketz. Nink tzꞌoc yi ẍchꞌonal yi eꞌchk ilcꞌolaꞌtz le chiwankil nin le chibakil chi na oc lajp aꞌ tuꞌ aceit te buꞌy.
19 Nink chijopx tan yi ilcꞌol chi na jopx chiwankil tan yi beꞌch cyetz. Nin nink tzꞌoc tan chipachꞌeꞌn cuꞌn chi na ban jun sinch.
20 Yaꞌstzun tulej Wajcaw yi eꞌ incontraꞌtz yi na chitzan tan inyolcheꞌn.
21 Ma yi iluꞌ teruꞌ Wajcaw chin qꞌuicyꞌlej binuꞌ, bantz jaleꞌn yi teruꞌ kꞌejuꞌ. Chin coleꞌuꞌ tan yi banl talmaꞌuꞌ.
22 Na quiꞌct muꞌẍ inxac nin chin buchijchin nin. Nin chin chꞌon nin yi walmaꞌ.
23 Tzan weleꞌn cuꞌn swutz chi na xit tib jun muj.
Tzan imbeneꞌn tan cyekꞌekꞌ chi na bajij te jun tal prow sacꞌ yi na ben tan cyekꞌekꞌ.
24 Ej nin na num wukan tan paj yi quiꞌt na chinwan. Quiꞌct incꞌatzaj tan paj yi quiꞌct inwaꞌ.
25 In tlentunin chitzeꞌlbeꞌtz wunak jaluꞌ. Na yi na quil inwutz tzeꞌeꞌn tuꞌ na chiban sweꞌj.
26 Chin ẍchꞌeyaj binuꞌ Wajcaw. Na iluꞌ inRyosil.
Chin colpeꞌuꞌ tan banl talmaꞌuꞌ.
27 Nink tzꞌel chitxum yi eꞌ incontraꞌtz yi iꞌtz iluꞌ yi nchincolon tan yi teruꞌ ẍchamiluꞌ.
28 Mpe nink choꞌc tan incunseꞌn, quiꞌc na ban ko atuꞌ tan wuchꞌeyeꞌn.
Nink tzꞌel chitxꞌix yil jal tzatzin tetz wetz.
29 Lok jal jun chin txꞌixweꞌn scyetz yi eꞌ incontraꞌtz.
Nink pujx cyaꞌn yi chin txꞌixwil nin chiwutz.
30 Ma jaluꞌ swakꞌeꞌ inkꞌajsbil tetz Wajcaw tetz ben kꞌej ben sak.
Swakꞌeꞌ inkꞌajsbil tetz, ẍchiwutz cuꞌn jun cꞌoloj wunak.
31 Na iꞌ chiyolol yi eꞌ tal prow yi buchij cheꞌ.
Nin na cheꞌ colpuj ẍchikꞌab yi eꞌ yi na cyaj choꞌc tan chibiyleꞌn.