Stkꞌeꞌ Ryos kꞌej yi kareyil
110
1 Yi wutzileꞌn Kataj Ryos, ja tal iꞌ tetz Wajcaw: “Cꞌolchen cuꞌn tzinxlaj, jalen cuꞌn yil choꞌc yi eꞌ acontr waꞌn jakꞌ awukan.”a 2 Choꞌn tzꞌakꞌlok yi kꞌejuꞌ tan cawuꞌn le tnum Sión, nin mben loꞌon yi caꞌwluꞌ jalen yil choꞌc cyakil yi eꞌ contruꞌ jakꞌ tkanuꞌ.
3 Nin yil xcyeꞌuꞌ te cyakil yi eꞌ contruꞌaꞌtz, ẍchijatxeꞌ quib yi eꞌ tanumuꞌ jakꞌ caꞌwluꞌ. Na chuꞌl nil cyakil yi eꞌ xicy tan ẍchꞌeyeꞌnuꞌ te yi oyintziꞌ. Nin yil chuꞌl, jopxok cyakil yi eꞌchk juꞌwtz yi at Sión cyakꞌun chi na ban yi kꞌab cheꞌw yi na ul skil.
4 Ej nin nchaꞌtz at jun yol yi sukiꞌnt tan Kajcaw kaRyosil yi quiꞌc rmeril yi quiꞌk tzꞌel cuꞌn iꞌ teꞌj, iꞌtz:
“Yi aẍ awetz aẍ paleꞌ tetz ben kꞌej ben sak, na niꞌcuꞌn amunl chi yi munl Melquisedec.”b
5 Ma yi Kajcaw yi kaRyosil xomok tzaweꞌj tul oyintziꞌ. Nin yil saj colp wiꞌ iꞌ scyeꞌj yi eꞌ rey ẍcheꞌlk cuꞌn taꞌn swutz.
6 Stkꞌeꞌ iꞌ chicaws yi eꞌchk nación, nin chin tenajiꞌn nin ẍchibneꞌ almaꞌ taꞌn. Nin ẍcheꞌ cambajeꞌ iꞌ cyakil yi rey yi ateꞌ beneꞌn tziꞌn wi munt.
7 Ej nin te yi na xon Kajcaw tul oyintziꞌaꞌtz, sbajk yi tal aꞌ taꞌn yi na xon lakak eꞌchk siwun. Nin tan yi tal aꞌaꞌtz sjalokt walor iꞌ tan chibiyleꞌn cuꞌn mas yi eꞌ contraꞌtz.