Kakꞌeꞌ kakꞌajsbil tetz Ryos tan yi eꞌchk takleꞌn balaj yi na ban
111
1 Kakꞌeꞌ kakꞌajsbil tetz Kataj Ryos.Tetz cuꞌn walmaꞌ swakꞌeꞌ inkꞌajsbil tetz Kataj Ryos lakak eꞌchk chamoꞌn ib yi na bajij ẍchixoꞌl yi eꞌ balaj wunak.
Tetz cuꞌn walmaꞌ swakꞌeꞌ inkꞌajsbil tetz ẍchiwutz cyakil wunak.
2 Chumbalaj nin yi eꞌchk takleꞌn yi na bnix tan Kajcaw. Nin alchok scyetz yi na el talmaꞌ teꞌj na oc tan xtxumleꞌn.
3 Na yi eꞌchk takleꞌn yi na bnix tan Kajcaw, chumbalaj nin, nin chin elsbil almaꞌ nin. Chumbalaj nin yi caꞌwl iꞌ nin quil sotz tetz ben kꞌej ben sak.
4 Nin yi eꞌchk takleꞌnaꞌtz quiꞌc rmeril yi nink tzꞌel te kacꞌuꞌl.
Na yi Kajcaw wiꞌnin xtxaxl talmaꞌ skibaj, nin wiꞌnin na okꞌ cꞌuꞌl skeꞌj.
5 Na na cheꞌ cꞌaꞌchaj yi eꞌ yi na cyakꞌ kꞌej iꞌ. Nin quinin na el te cꞌuꞌl yi yol yi sukiꞌnt taꞌn scyetz.
6 Ja lajluchax ẍchiwutz yi eꞌ tetz tanum yi eꞌchk takleꞌn balaj yi mban. Na ja takꞌ iꞌ yi chiluwar yi eꞌ wunak yi quiꞌc na cyocsaj scyetz yi eꞌ tetz tanum.
7 Nin quiꞌc til iꞌ te yi eꞌchk takleꞌnaꞌtz yi na ban. Baꞌn kꞌukeꞌ kacꞌuꞌl te yi tetz caꞌwl.
8 Na quil txꞌixp tetz ben kꞌej ben sak. Nin chin tzꞌaknak cunin, quiꞌc muꞌẍ jetxꞌil yi eꞌchk caꞌwlaꞌtz.
9 Ja cheꞌl liwr yi eꞌ tetz tanum taꞌn, nin ja bixeꞌ yi trat iꞌ scyuchꞌ tetz ben kꞌej ben sak.
Na yi kaRyosil chin xan nin iꞌ.
Nin wiꞌnin na keꞌl yab te yi balajil iꞌ.
10 Yi ajtzaꞌkl yi mas balaj iꞌtz yil kakꞌ kꞌej Ryos. Na yi eꞌ yi na cyakꞌ kꞌej Ryos, yaꞌstzun yi eꞌ yi chin tzꞌaknak cuꞌn eꞌ tu chitxumuꞌn.
Kakꞌeꞌ bin kakꞌajsbil tetz Kataj Ryos.