Baꞌn cyeri yi eꞌ yi jicyuch teꞌj cyajtzaꞌkl
112
1 Kakꞌeꞌ kakꞌajsbil tetz Kajcaw yi kaRyosil.Baꞌn cyeri eꞌ yi na cyakꞌ kꞌej Kajcaw, yi eꞌ yi na chixom te yi tetz caꞌwl.
2 Na yi chixonl yi eꞌ yi jicyuch te cyajtzaꞌkl, sjalok cyetz chibanl swutz Ryos, nin tzꞌakꞌlok chikꞌej tzoneꞌj wuxtxꞌotxꞌ.
3 Nin yi eꞌaꞌtz yi jicyuch te cyajtzaꞌkl, sjalok wiꞌnin chimeꞌbiꞌl, nin ilenin chocopon tan quichꞌeyeꞌn yi eꞌ yi at tajweꞌn scyetz.
4 Nin te yi eꞌchk tiemp yi at tzꞌoꞌtz wutzil wi munt sjalok jun cyetz chitxekbil.
Yi eꞌ cyetz na el chikꞌajab scyeꞌj yi eꞌ yi at tajweꞌn scyetz.
Nin wiꞌnin xtxaxl cyalmaꞌ.
5 Na yi eꞌ balaj, tetz cuꞌn cyalmaꞌ na cyakꞌ cꞌmoꞌn. Nin chin jicyuch nin cyajtzaꞌkl te eꞌchk negos yi na chiban.
6 Chaꞌstzun te cyaꞌl cunin na chicweꞌt tul il, nin ilenin snaꞌwsok cyetz chibiꞌaꞌtz.
7 Ej nin qui na chixob cyeraꞌtz te eꞌchk takleꞌn yi sbajok ek caꞌp na yi cyetz chitxumuꞌn choꞌn ajlij te Kajcaw.
8 Chin quiw nin quitaneꞌn, qui na chixob tetz jun, nin tzeꞌeꞌn tuꞌ na chiban scyeꞌj eꞌ chicontr.
9 Nin yi eꞌ yi jicyuch te cyajtzaꞌklaꞌtz, ilenin na cyakꞌ ẍchꞌeybil cyetz yi eꞌ tal aj rmosuminl. Nin quiꞌc nin muꞌẍ tal xtxꞌixwilil chiwutz cyeraꞌtz.
10 Poro yi eꞌ mal nakaꞌtz, wiꞌnin na chiꞌch nin chicꞌuꞌl yi na quil nin chiwutz yi eꞌ balajaꞌtz. Nin tan paj yi quiꞌc rmeril tan chixcyeweꞌn scyeꞌj, na saj jun chin chiꞌch cꞌuꞌlal tetz cyetz, na quil chicambaj yi cyajbil tan chipoꞌtzeꞌn yi eꞌ balaj.