CYAJIꞌN WEKL TE EꞌCHK SALMO
90:1—106:48
Iẍnin at Kataj Ryos
90
1 Kataj, sajleꞌnix tunintz choꞌn na kacol kib teꞌjuꞌ.Nin iteꞌn nin skabneꞌaꞌs sbneꞌ opon tunintz.
2 Na te yi ntaxk tzaj jal eꞌchk juꞌwtz, nin yi ntaxk cuꞌ yi wuxtxꞌotxꞌ, nin yi ntaxk bnix yi bajx wunak, iluꞌ nin Ryos.
Na tul yi tiemp yi icyꞌnak cyen, nin tul yi tiemp yi xomtzaj, iluꞌ nin Ryos.
3 Ja bnix yi bajx wunak tanuꞌ tan xkꞌol tuꞌ.
Chaꞌstzun te tloluꞌ: “Txꞌotxꞌ tuꞌ cxtzaj pontwok.”
4 Na swutz teruꞌ, niꞌcuꞌn jun mil yob, tu yi jun kꞌej ewt yi ja wiꞌt icyꞌ.
Nin niꞌcuꞌn jun mil yob swutzuꞌ chi na icyꞌ cobox ntziꞌ or lakꞌbal.
5 Nchaꞌtz baꞌn cheꞌl cuꞌn cyakil wunak tanuꞌ swutz, chi na el cyakil eꞌchk takleꞌn tan jun tzanlaꞌ yi na eluꞌl.
Na yi ankꞌiꞌn yi akꞌij sketz, jalcunin na icyꞌ, chi na el jun wutzicyꞌ te kacꞌuꞌl.
6 Na niꞌcuꞌn kutaneꞌn swutzuꞌ chi taneꞌn jun wiꞌ buch, yi na jeꞌ chitpuj yi buchil jalchan, poro yi na cuꞌ kꞌej, na saj lokp nin na skej.
7 Chaꞌstzun te Taꞌ, yil saj colp wiꞌuꞌ skeꞌj, baꞌn keꞌl cuꞌn tanuꞌ swutz.
8 Na yi ketz kil tu yi kajtzaꞌkl cachiꞌ, sak cuꞌn swutzuꞌ.
9 Yi ketz kaꞌankꞌiꞌn baꞌn tzꞌel cuꞌn tanuꞌ swutz yil saj ẍchiꞌchbeꞌn cꞌuꞌluꞌ skeꞌj.
Na yi ketz katiemp, na icyꞌ teꞌtz, tul jun ntziꞌ tkuj.
10 Na oxcꞌal tu lajuj ntziꞌ yob na kaꞌtij ketz tzoneꞌj wuxtxꞌotxꞌ.
Ntin yi eꞌ mas quiw na chijepon te jun mutxꞌ yob.
Poro quiꞌc ltakꞌ sketz kol tzꞌel kalmaꞌ tan kaꞌteꞌn jun cꞌoloj tiemp tzoneꞌj, na ntin na katxꞌayneꞌ tan paj yi qꞌuixcꞌuj yi atoꞌ cuꞌnt.
Yi jujun yob jalcunin na icyꞌ.
Chaꞌtz cunin tzun kutaneꞌn ketz.
11 Poro cyaꞌl jun jajk tij cyakil yi walor yi ẍchiꞌcheꞌn cꞌuꞌluꞌ.
Nin cyaꞌl jun yi jajk pujx taꞌn yi xoꞌwbililuꞌ.
12 Ẍchajeꞌuꞌ sketz yi jun ntziꞌ tkuj atoꞌ wi cojbiluꞌ.
Sjalok tzun kajtzaꞌkl.
13 Wajcaw, sajkuꞌ skaxoꞌl.
Elk kꞌajabuꞌ skeꞌj na oꞌ ẍchakumuꞌ.
14 Cyakil tir yi na ul skil, takꞌuꞌ tzatzin sketz, bantz kakꞌol kakꞌajsbil teruꞌ te cyakil tiemp yi akꞌij sketz tzoneꞌj wuxtxꞌotxꞌ.
15 Takꞌ tzajuꞌ coboxt yob tzatzin sketz tetz xel eꞌchk yob yi ja katij yi sotzaj cꞌuꞌlal.
16 Takꞌ tzajuꞌ amaꞌl sketz, nin scyetz eꞌ kanitxaꞌ tan kilol eꞌchk milawr yi na ẍchaj yi at kꞌejuꞌ, na oꞌ len ẍchakumuꞌ.
17 Takꞌ tzajuꞌ yi banluꞌ skibaj.
Nin koꞌ quiwsajuꞌ sjuꞌ yi kakꞌun, na iluꞌ kaRyosil.