Katxoleꞌ yi banl talmaꞌ Kataj
89
1 Wajcaw, ilenin swaleꞌ tcꞌuꞌl yi imbitz yi chumbalaj nin iluꞌ.Ilenin tzimbitzij yi baꞌn kꞌukeꞌ kacꞌuꞌl teꞌjuꞌ.
2 Tzintxoleꞌ yi quinin bajsbeꞌn tetz yi banl talmaꞌuꞌ, nin yi qui na xtxꞌixpujuꞌ yi yoluꞌ, chi taneꞌn yi tcyaꞌj, yi qui na xtxꞌixpuj tib.
3 Bnixnak jun trat tanuꞌ tu Luwiy yi ẍchakumuꞌ yi jeꞌnak xtxaꞌoluꞌ.
Na je bin sukuꞌeꞌj:
4 “Ilenin swakꞌeꞌ amaꞌl scyetz yi eꞌ axonl tan chicawuneꞌn tetz axel yil cẍquim.”
5 Wajcaw, cyakil yi eꞌ yi ateꞌ tcyaꞌj na cyakꞌ chikꞌajsbil swutzuꞌ, tan yi eꞌchk milawr yi na bnix tanuꞌ, nin tan yi na el kꞌabuꞌ te yoluꞌ.
6 Iluꞌ kaRyosil, cyaꞌl nin jun yi at tcyaꞌj yi choꞌnk yi ẍchamil chi yi teruꞌ ẍchamiluꞌ.
7 Chaꞌstzun te, cyakil oꞌ na kek ẍchiꞌuꞌ.
Nin cyakil yi eꞌ yi ateꞌ xlajuꞌ na cyek ẍchiꞌuꞌ.
8 Kataj, iluꞌ kaRyosil yi cyaꞌl na xcyeꞌ quen teꞌjuꞌ.
Na cyakil yi porer tu yi bintzi, choꞌn na saj teꞌjuꞌ.
Nin cyaꞌl jun tzꞌopon tan stzꞌamleꞌn yi ẍchamiluꞌ.
9 Na na xcyeꞌuꞌ tan makleꞌn yi pakꞌbil mar.
Pe najk saj colp wiꞌ yi mar, na xcyeꞌuꞌ tan makleꞌn.
10 Ja xcyeꞌuꞌ te yi jun chin wutzileꞌn txuc yi at xe mar.
Quiꞌc muꞌẍ xac mban swutzuꞌ, na junawes mmeꞌl cuꞌn tanuꞌ swutz.
Nin tan yi ẍchamiluꞌ, ja cheꞌl cuꞌn cyakil yi contruꞌ tanuꞌ swutz.
11 Cyakil yi at tcyaꞌj, tu cyakil yi at wuxtxꞌotxꞌ, iꞌtz teruꞌ.
Na iluꞌ bnol tetz cyakil yi at beneꞌn tziꞌn.
12 Iluꞌ bnol tetz cyakil yi at jeꞌn tziꞌn tu yi at cweꞌn tziꞌn.
Nin iluꞌ bnol tetz yi wiꞌwtz Tabor tu yi wiꞌwtz Hermón yi na jal kꞌejuꞌ taꞌn.
13 Wiꞌnin ẍchamiluꞌ, nin wiꞌnin poreruꞌ, na na xcyeꞌuꞌ te cyakil eꞌchk takleꞌn.
14 Nin yi na ocuꞌ tan cawuꞌn, na xomuꞌ te yi bintzi, na na el kꞌajabuꞌ scyeꞌj yi eꞌ yi quiꞌc quil, nin na takꞌuꞌ chicaws yi eꞌ aj paj.
15 Baꞌn cyeri eꞌ yi na cyakꞌ chikꞌajsbil teruꞌ, yi eꞌ yi na chixom te yi teruꞌ tajtzaꞌkluꞌ yi chumbalaj nin.
16 Cyakil nin kꞌej na chitzatzin cyeraꞌtz tkꞌabuꞌ.
Nin na chipekꞌ te yi tajtzaꞌkluꞌ yi chin jicyuch nin teꞌj.
17 Na iluꞌ na akꞌon chiwalor tu chibalajil.
Nin tan banl talmaꞌuꞌ na takꞌwituꞌ yi chichamil.
18 Na yi iluꞌ teruꞌ Kataj, iluꞌ yi colol ketz yi oꞌ xonl Israel, iluꞌ kareyil yi wiꞌnin xanil.
19 Ja jilonuꞌ tul wutzicyꞌ taneꞌn scyetz yi eꞌ ẍchakumuꞌ yi nkꞌukeꞌ cꞌuꞌluꞌ scyeꞌj.
Nin je yoluꞌeꞌj:
“Ja jeꞌ intxaꞌol jun yaj ẍchixoꞌl yi eꞌ intanum, jun yaj yi qui na xob.
Ja wakꞌ kꞌej iꞌ. Nin ilenin nocopon tan ẍchꞌeyeꞌn.
20 Ja bin nojpon inwutz te Luwiy tetz inchakum.
Ja jeꞌ inkojol yi wetz inaceit twiꞌ tan bixbajeꞌn tetz rey.
21 Nocopon tzun tan ẍchꞌeyeꞌn iꞌ.
Swakꞌeꞌ imporer tan ẍchꞌeyeꞌn.
Nin quil wil cyen iꞌ ẍchuc.
22 Quil loꞌon iꞌ cyakꞌun yi eꞌ contr.
Nin quil chixcyeꞌ yi eꞌ mal nak teꞌj.
23 Ma na swutz cuꞌn iꞌ ẍchiloꞌonk yi eꞌ tetz contr waꞌn.
Nin cyakil yi eꞌ yi ẍchiꞌchok chicꞌuꞌl teꞌj, ẍchiquimok waꞌn.
24 Swakꞌeꞌ cyakil imbanl tetz iꞌ, bantz xomeꞌn iꞌ te yi bintzi, nin tan in sjalok mas kꞌej iꞌ tan cawuꞌn.
25 Tzꞌopon yi caꞌwl iꞌ jalen tzi mar Mediterráneo, yi at toqueꞌn tziꞌn, nin tzꞌopon jalen tzi yi tzanlaꞌ Eufrates, yi at teleꞌn tziꞌn.
26 Ilenin staleꞌ iꞌ swetz: ‘I iluꞌaꞌtz iluꞌ intaj, iluꞌ inRyosil yi colol wetz.’
27 Nin swakꞌeꞌ amaꞌl tetz iꞌ tan toqueꞌn tetz Bajx inCyꞌajol, nin tetz wiꞌtz ajcaw squibaj cyakil yi eꞌ rey beneꞌn tziꞌn wi munt.
28 Ilenin chimpekꞌok te iꞌ, nin nelpon cuꞌn te yi inyol yi ja insuk tetz.
29 Na yi eꞌ tetz xonl ẍchinajank le tetz amaꞌl.
Ẍchinajank sbneꞌ opon tunintz, jalen yil xit yi tcyaꞌj.
30 ”Poro kol chijatx len quib yi eꞌ tetz xonl te weri inchusuꞌn, nin ko quil chiban taneꞌn wetz incaꞌwl,
31 nin ko tzꞌel kꞌej incaꞌwl cyaꞌn, nin ko quil choꞌc cꞌulutxum jakꞌ incaꞌwl,
32 swakꞌeꞌ tzun chicaws, tan paj yi quil.
Nocopon tan chijicyleꞌn tan xicyꞌxab.
33 Poro quil tzincyꞌajlen yi xtxaxl walmaꞌ te Luwiy, ma na nelpon cuꞌn te yi inyol yi minsuk tetz.
34 Nelpon cuꞌn te yi trat yi mbixeꞌ kaꞌn tuchꞌ, na quiꞌt naꞌj wutz incoc tu inyol.
35 Ja wiꞌt insuk jun inyol. Nin quiꞌc laꞌjil swuchꞌ.
Chaꞌstzun te sneꞌlk cuꞌn te inyol yi ja wiꞌt insuk tetz Luwiy.
36 Na yi eꞌ tetz xonl ẍchinajank le tetz amaꞌl.
Ẍchinajank sbneꞌ opon tunintz, jalen yil xit yi kꞌej.
37 Yi jun reyaꞌtz stzꞌaꞌtok iꞌ sbneꞌ opon tunintz, chi taneꞌn yi xaw, nin jalen yil sotz yi tcyaꞌj.”
Taꞌ, yaꞌstzun yoluꞌ banak cyen.
38 Poro yi jaluꞌ Wajcaw, ja cyaj cyen tiloluꞌ, nin ja el kꞌej yi jun reyaꞌtz, yi jeꞌnak xtxaꞌoluꞌ.
39 Quinin mmeꞌl cunuꞌ te yi trat yi suknakuꞌ.
Ja el kꞌej yi ẍchakumuꞌ tanuꞌ.
40 Ja el cuꞌn yi tnumil iꞌ tanuꞌ swutz.
Na ja cuꞌ woqꞌuiluꞌ yi tapij yi at solteꞌj.
41 Tu na chicyequen cyakil wunak tcꞌuꞌl.
Nin na cyalkꞌ nin yi eꞌchk takleꞌn yi na cyaj.
Ja oc yi tnumil iꞌ tetz chitzeꞌlbeꞌtz cyakil wunak.
42 Ja takꞌuꞌ amaꞌl scyetz yi eꞌ tetz contr tan chitxꞌaconeꞌn te yi rey.
43 Na quinin ntakꞌuꞌ amaꞌl tetz tan xconeꞌn yi tetz spar tan oyintziꞌ.
Nin quinin xomuꞌ teꞌj tan ẍchꞌeyeꞌn te yi oyintziꞌaꞌtz.
44 Ja el kꞌej iꞌ tanuꞌ.
Junawes quiꞌct xac iꞌ mban, na quiꞌt na cawun.
45 Quiꞌt ntakꞌuꞌ mas ankꞌiꞌn tetz, na junawes ja el xtxꞌix iꞌ tanuꞌ.
46 Iluꞌ Wajcaw, ¿junawes peꞌ ntew tibuꞌ skawutz?
¿Junawes nin peꞌ njeꞌ lajp wiꞌuꞌ skeꞌj, chi na ben loꞌon jun kꞌakꞌ?
47 Taꞌ, ulk txꞌakx tcꞌuꞌluꞌ yi ankꞌiꞌn yi akꞌij tanuꞌ swetz.
Qui tunin kꞌusij.
Na cyakil wunak yi bnixnakeꞌ tanuꞌ quiꞌc mas chitiemp akꞌij tanuꞌ.
48 Na quiꞌc jun yi nink ben ẍkon jun cꞌoloj tiemp nin yi quiꞌk quim.
Na quiꞌc nin jun yi nink clax tkꞌab quimichil.
49 Wajcaw, ¿ja peꞌ tzaj yi banl talmaꞌuꞌ yi nẍchajuꞌ sketz le xeꞌtzbil tzaj?
¿Ja peꞌ tzaj yi banl talmaꞌuꞌ yi sukuꞌ tetz Luwiy?
50 Sak swutzuꞌ yi cyakil wunak na chitzan tan kabuchleꞌn.
Chin chꞌon nin na wil yi na choꞌc tan kajisleꞌn.
51 Iluꞌ Wajcaw, yaꞌstzun na chiban yi eꞌ contruꞌ skeꞌj.
Nin yaꞌstzun na chiban te yi ẍchakumuꞌ yi jeꞌnak xtxaꞌoluꞌ.
52 Poro yi oꞌ ketz, ilenin skakꞌeꞌ kꞌejuꞌ Kataj. ¡Amén!