Oración tetz jun yi ja oc wutz peꞌm
88
1 Wajcaw, iluꞌ inRyosil, iluꞌ colol wetz. Skꞌejl nin lakꞌbal na injak ẍchꞌeybil wetz teruꞌ.2 Elk kꞌajabuꞌ sweꞌj. Tbiteꞌuꞌ intziꞌ inkul.
3 Na wiꞌnin eꞌchk bis oꞌkl ja ul tzinwutz. Nin txant tan inquimeꞌn tan paj.
4 At na bant cuꞌn na intxum yi ja wiꞌt chinquim, na quiꞌct inwalor at.
5 Ja wiꞌt noꞌc cyajlal yi eꞌ almaꞌ. Niꞌcuꞌn wutaneꞌn chi na loꞌon jun sanlar tul oyintziꞌ. Niꞌcuꞌn wutaneꞌn chi jun yi quiꞌt xomijuꞌ tan qꞌuicyꞌleꞌn.
6 Wajcaw, ja wiꞌt chinloꞌon.
Ja wiꞌt chincuꞌ tul jun chin wutzileꞌn jul taneꞌn, jun jul yi chin xeꞌ nin, nin yi chin tzꞌoꞌtz nin tul.
7 Ja saj colp wiꞌuꞌ sweꞌj.
Na ja takꞌuꞌ jun incaws yi chin xoꞌwbil nin.
8 Nchaꞌtz cyakil yi eꞌ wamiw, ja chin cyaj cyen quilol, na quiꞌt na chitxꞌaj yi atin ẍchixoꞌl.
Niꞌcuꞌn wutaneꞌn chi taneꞌn jun pres yi quiꞌc rmeril tan teleꞌn liwr.
9 Nin tan paj yi oꞌkl yi na imban, or noꞌc cyen moyiꞌẍ.
Wajcaw, cyakil kꞌej na injak ẍchꞌeybil wetz teruꞌ, nin na jeꞌ inkꞌab swutzuꞌ tan jakleꞌn ẍchꞌeybil wetz.
10 ¿Mbiꞌtz tajbiluꞌ sweꞌj Taꞌ?
¿Jalen peꞌ lchinquim, kalenaꞌtz tzun tzꞌocuꞌ tan wuchꞌeyeꞌn?
¿Tyoẍink ptzun jun almaꞌ teruꞌ?
11 ¿Tzꞌocopon ptzun jun almaꞌ tan talcheꞌn:
“Chumbalaj nin Kataj Ryos, chin aj bintzi nin iꞌ?”
¿Sjilonk ptzun jun almaꞌ yi mukxnak jakꞌ txꞌotxꞌ?
Quiꞌ, Taꞌ.
12 Na yi na quim jun, quiꞌct xac. Junawes na tzaj.
Quiꞌc rmeril tan tuleꞌnuꞌ txꞌakx tcꞌuꞌl jun almaꞌ.
13 Poro yi in wetz, choꞌn na cuꞌ inwutz teruꞌ.
Cyakil jalchan na noꞌc tan jakleꞌn ẍchꞌeybil wetz teruꞌ.
14 ¿Mbi tzuntz yi quiꞌt na pekꞌuꞌ sweꞌj?
¿Mbi xac na tew tibuꞌ tzinwutz?
15 Na juyil cunin in, yi woqueꞌn swutz yi qꞌuixcꞌujeꞌj yi atin tkꞌab jaluꞌ.
Nin or nin chinquim taꞌn.
Nimix cunin eꞌchk takleꞌn yi ntakꞌuꞌ amaꞌl tan tuleꞌn tzinwutz.
Poro quiꞌt tzintxꞌaj mas.
16 Ja saj colp wiꞌuꞌ sweꞌj.
Nin ja icyꞌpon yi ẍchiꞌchbeꞌn cꞌuꞌluꞌ waꞌn.
Nin ja neꞌl cuꞌn swutz.
17 Cyakil nin tkuj na tzanuꞌ tan inxuxeꞌn.
Choꞌn cunin na banuꞌ chi na ban yi na juchun jun chin wutzileꞌn tzanlaꞌ yi na eluꞌl.
18 Na ja chin cyaj cyen quilol yi eꞌ wamiw scyuchꞌ eꞌ mas wuchꞌ.
Inchuc atin tul jun chin tzꞌoꞌtz Taꞌ.