Jerusalén yi tnum yi at mas kꞌej
87
1 Jerusalén, yaꞌstzun yi tnum yi mas na pekꞌ Kataj Ryos teꞌj. Choꞌn jeꞌnak bnol wiꞌak juꞌ wutz yi chin xan nin. Wiꞌnin na pekꞌ Kataj Ryos teꞌj.2 Nin mas na pekꞌ iꞌ teꞌj swutz cyakil eꞌchk mas amaꞌl cwent yi eꞌ xonl Jacow.
3 Chumbalaj nin yi jun tnumaꞌtz, na wiꞌnin eꞌchk takleꞌn balaj na aꞌlchij tetz.
4 “Chixoꞌlak yi eꞌchk tnum yil xomok chiwiꞌ sweꞌj tzantzaj, at eꞌchk tnum chi taneꞌn Egipto, Babilonia, Filistea, Tiro tu Etiopía. Ej nin scyaleꞌ: Yi tnum Jerusalén yi ateꞌn wi juꞌwutz Sión, kꞌajbil katxuꞌ taneꞌn.”
5 Poro tzꞌopon yi kꞌejlal yi sjalok mas chikꞌej yi eꞌ yi scyaleꞌ: “In mero aj Jerusalén, na choꞌn itzꞌnakin tul”. Na yaꞌstzun yi tnum yi tzꞌocopon yi Wiꞌtz Ryos tan bixbajeꞌn.
6 Nchaꞌtz yil tzꞌoc Kataj tan jeꞌseꞌn chibiꞌ yi eꞌ yi choꞌn najlcheꞌ le tnum Jerusalén, copon jun techl taꞌn xlaj chibiꞌ yi eꞌ yi choꞌn quitzꞌeꞌn le jun tnumaꞌtz.
7 Nin chocopon cyakil wunak tan bixl nin tan bitz nin scyaleꞌ tul chibitz: “Choꞌn najlchin wetz le tnum Jerusalén,” cheꞌch sbneꞌ.