Yi ketz kaRyosil ntin cuꞌn iꞌ yi Ryos
86
1 Wajcaw, elk kꞌajabuꞌ sweꞌj. Tbiteꞌuꞌ intziꞌ inkul, na wiꞌnin na chimbisun na in jun tal prow meꞌbaꞌ.2 Chin coleꞌuꞌ na bintzinin kꞌuklij incꞌuꞌl teꞌjuꞌ na iluꞌ inRyosil. Chin coleꞌuꞌ bin na ntin teꞌjuꞌ kꞌukleꞌt incꞌuꞌl.
3 Wajcaw, elk kꞌajabuꞌ sweꞌj, na cyakil kꞌej choꞌn na cuꞌ inwutz teruꞌ.
4 Chin ẍchꞌeyajuꞌ bantz intzatzineꞌn, na in ẍchakumuꞌ, na ntin cuꞌn swutzuꞌ na cweꞌt inwutz.
5 Na yi iluꞌ teruꞌ wiꞌnin banl talmaꞌuꞌ tan cuyleꞌn kapaj nin wiꞌnin na el kꞌajabuꞌ scyeꞌj yi eꞌ yi na cuꞌ chiwutz teruꞌ.
6 Wajcaw, tbiteꞌuꞌ yi inoración.
Stzaꞌwejuꞌ yi mbi na chintzan tan jakleꞌn teruꞌ.
7 Na te yi na sotz incꞌuꞌl, choꞌn na injak ẍchꞌeybil wetz teruꞌ. Na ntin iluꞌ na ocuꞌ tan wuchꞌeyeꞌn.
8 Quiꞌc nin junt Ryos yi niꞌcuꞌnk chi iluꞌ teruꞌ, na quiꞌc nin jun yi nak xcyeꞌ tan banleꞌn yi eꞌchk takleꞌn yi na bnix tanuꞌ.
9 Iluꞌ Wajcaw, iluꞌ bnol tetz cyakil yi eꞌchk nación. Nin chuꞌl tan takꞌleꞌn kꞌejuꞌ nin tan cꞌuꞌlajeꞌnuꞌ.
10 Na ntin cuꞌn iluꞌ, iluꞌ Ryos. At wiꞌnin ẍchamiluꞌ, na na xcyeꞌuꞌ tan banleꞌn eꞌchk milawr.
11 Siwl Taꞌ, ẍchajeꞌuꞌ yi tajbiluꞌ swetz bantz inxomeꞌn teꞌj quib yi na tal. Chin ẍchꞌeyajuꞌ tan woqueꞌn tan takꞌleꞌn kꞌejuꞌ.
12 Iluꞌ Wajcaw yi inRyosil, swakꞌeꞌ inkꞌajsbil teruꞌ tetz cuꞌn walmaꞌ, nin sbneꞌ opon tunintz nocopon tan cꞌuꞌlajeꞌnuꞌ.
13 Wiꞌnin banl talmaꞌuꞌ swibaj, na ja chinclax tanuꞌ tkꞌab quimichil.
14 Iluꞌ inRyosil, sak swutzuꞌ yi ja jeꞌ chimolol quib jun cꞌoloj incontr yi na cyaj choꞌc tan imbiyleꞌn. Yi eꞌaꞌtz iꞌtz yi eꞌ yi qui na cyek ẍchiꞌuꞌ.
15 Poro yi iluꞌ teruꞌ Wajcaw, wiꞌnin na el kꞌajabuꞌ sweꞌj. Na at pasensuꞌ, nin wiꞌnin lokꞌ ib tuchꞌuꞌ, nin yi iluꞌ teruꞌ iluꞌ yi mero bintzi.
16 Elk bin kꞌajabuꞌ sweꞌj. Chin ẍchꞌeyajuꞌ na in ẍchakumuꞌ. Takꞌ tzajuꞌ junt tir inwalor.
17 Nin ẍchajeꞌuꞌ jun techl swetz yi at banl talmaꞌuꞌ swibaj, bantz teleꞌn chitxꞌix yi eꞌ yi na chiꞌch chicꞌuꞌl sweꞌj. Na yi iluꞌ teruꞌ Wajcaw, na chin ẍchꞌeyajuꞌ, nin na el kꞌajabuꞌ sweꞌj.