Yi cweꞌn chiwutz yi xonl Israel tan tkꞌolt Ryos yi banl tibaj yi chinación
85
1 Wajcaw, chumbalaj nin iluꞌ te yi teruꞌ tanumuꞌ. Na ja takꞌuꞌ junt tir tzatzin paz sketz yi oꞌ yi oꞌ xonl Jacow.2 Ja cuyuꞌ kapaj yi oꞌ tanumuꞌ. Ja cuyuꞌ kapaj katxꞌokꞌbeꞌn.
3 Nin quiꞌt na chiꞌch cꞌuꞌluꞌ skeꞌj. Nin quiꞌt na saj colp wiꞌuꞌ skeꞌj.
4 Iluꞌ Kataj, yi colol ketz, koꞌ coleꞌuꞌ jaluꞌ. Quiꞌt saj colp wiꞌuꞌ skeꞌj.
5 ¿Tunin peꞌ lchiꞌch cuꞌn cꞌuꞌluꞌ skeꞌj sbneꞌ opon tunintz?
6 ¿Quiꞌt peꞌ ltakꞌuꞌ amaꞌl sketz tan katzatzineꞌn yi oꞌ yi oꞌ tanumuꞌ?
7 Wajcaw, ẍchajeꞌuꞌ yi xtxaxl talmaꞌuꞌ sketz nin koꞌ coleꞌuꞌ.
8 Tzimbiteꞌ yol Kataj yi mbi staleꞌ. Na staleꞌ iꞌ yi sjalok tzatzin paz ẍchixoꞌl yi eꞌ tanum iꞌ, yi eꞌ yi choꞌn kꞌuklij chicꞌuꞌl teꞌj. Poro yi ko quil chiban junt tir yi eꞌchk takleꞌn cachiꞌ.
9 Na jun cuꞌn yol txant tan tuleꞌn Kataj tan chicolpeꞌn yi eꞌ yi na chitzan tan cꞌuꞌlajeꞌn iꞌ. Nin tzꞌakꞌlok kꞌej iꞌ beneꞌn tziꞌn wi munt.
10 Stkꞌeꞌ Ryos yi xtxaxl talmaꞌ scyetz yi eꞌ yi na chixom te yi bintzi. Nchaꞌtz sjalok yi tzatzin yi na takꞌ Ryos scyetz yi eꞌ yi jicyuch teꞌj cyajtzaꞌkl.
11 Na kol chijal eꞌ beneꞌn tziꞌn wi munt yil chixom te yi bintzi, stkꞌeꞌ tzun Ryos balaj caꞌwl beneꞌn tziꞌn.
12 Na iteꞌn nin Kataj tzꞌakꞌon tzaj yi aꞌbal tibaj yi katxꞌotxꞌ, bantz tkꞌol balaj ujul.
13 Na sbajxok yi balajil iꞌ swutz tan nucꞌleꞌn yi tetz beꞌ skaxoꞌl.