Chumbalaj nin takꞌleꞌn kakꞌajsbil le caꞌl Ryos
84
1 Kataj yi wiꞌnin ẍchamiluꞌ, chumbalaj nin yi najbiluꞌ.2 Nternin na el walmaꞌ tan waꞌteꞌn xe yi caꞌluꞌ. Nternin na el walmaꞌ tan wakꞌol inkꞌajsbil teruꞌ yi iluꞌ yi akꞌol kutzꞌajbil.
3 Nicyꞌ nin eꞌ chꞌuꞌl na bnix chisoc le caꞌluꞌ. Nin choꞌn na chinajeꞌ yi eꞌ cꞌuchul aꞌbal tul. Nin choꞌn na chꞌuy yi cyal nakaꞌjil yi patbil katxꞌixwatz. Chumbalaj nin iluꞌ Kataj yi wiꞌnin ẍchamiluꞌ na iluꞌ kaReyil nin iluꞌ kaRyosil.
4 Baꞌn cyeri eꞌ yi choꞌn ateꞌ xe yi caꞌluꞌ, yi eꞌ yi cyakil nin kꞌej na chitzan tan takꞌleꞌn chikꞌajsbil teruꞌ.
5 Baꞌn cyeri eꞌ yi choꞌn na jal ẍchꞌeybil cyetz tuchꞌuꞌ. Baꞌn cyeri eꞌ yi na chibuch quib tan cyoponeꞌn jalen te yi caꞌluꞌ.
6 Yi na ul bis oꞌkl ẍchiwutz qui na chibisun taꞌn.
Yi na saj aꞌbal squibaj, mast cunin na chitzatzin yi na chacꞌ taꞌn.
7 Sjalokt junt tir chiwalor, na squileꞌ wutz Kataj wiꞌwtz Sión, yi Kataj yi wiꞌtz Ryos.
8 Wajcaw, iluꞌ kaRyosil yi wiꞌnin ẍchamiluꞌ, nin iluꞌ Ryosil kꞌajtzun kamam Jacow. Tbiteꞌuꞌ yi intziꞌ inkul.
9 Iluꞌ kaRyosil elk kꞌajabuꞌ te yi rey yi jeꞌnak xtxaꞌoluꞌ, na iluꞌ colol ketz.
10 Na mas balaj yil naꞌtij jun ntziꞌ kꞌej xe caꞌluꞌ, swutz jun mil kꞌej tul junt luwar.
Mas balaj yil chinxcon tetz qꞌuicyꞌlom stzi puertil caꞌluꞌ, swutz yi choꞌnk naꞌtij ẍchixoꞌl yi eꞌ juchul il.
11 Na yi iluꞌ teruꞌ, iluꞌ kaRyosil, iluꞌ txekbil ketz, nin iluꞌ colol ketz. Nin na takꞌuꞌ chikꞌej yi eꞌ yi qui na chijuch quil. Na takꞌuꞌ cyakil yi eꞌchk takleꞌn yi na chijak teruꞌ.
12 Iluꞌ Kataj at wiꞌnin ẍchamiluꞌ. Cyaꞌl jun na xcyeꞌ quen teꞌjuꞌ. Baꞌn cyeri yi eꞌ yi choꞌn kꞌuklij chicꞌuꞌl teꞌjuꞌ.