Kataj cheꞌ cawseꞌuꞌ yi eꞌ contruꞌ
83
1 Iluꞌ kaRyosil, cawunkuꞌ. Quil tzꞌocuꞌ tetz mem. Sajkuꞌ. Cheꞌ cawseꞌuꞌ yi eꞌ contruꞌ.2 Tileꞌuꞌ yi eꞌ contruꞌ, yi eꞌ yi na chiꞌch chicꞌuꞌl teꞌjuꞌ, na chitzan tan xiteꞌnuꞌ nin na chitzan tan pajleꞌn caꞌwluꞌ.
3 Ja oc chitxumuꞌn tan xtxumleꞌn yi ẍeꞌnk tan kaloꞌoneꞌn yi oꞌ tanumuꞌ, yi oꞌ yi atoꞌ tcwentuꞌ.
4 Ja chitxum tan cyuleꞌn tan kaxiteꞌn, bantz teleꞌn cuꞌn yi kanación swutz, bantz katzajeꞌn junawes yi oꞌ xonl Israel.
5 Ja bixeꞌ jun chitrat squibil quib tan cyoqueꞌn tan oyintziꞌ teꞌjuꞌ. Junit mban chitxumuꞌn chicyakil cuꞌn.
6 Cyakil yi eꞌaꞌtz iꞌtz yi eꞌ aj Edom scyuchꞌ yi eꞌ aj Ismael, nchaꞌtz yi eꞌ xonl Hagar tu yi eꞌ aj Moab,
7 scyuchꞌ yi eꞌ aj Gebal, yi eꞌ aj Amón scyuchꞌ yi eꞌ xonl Amalec, nin yi eꞌ filistey scyuchꞌ yi eꞌ aj Tiro.
8 Nchaꞌtz eꞌ aj Siria ja choꞌc tan quichꞌeyeꞌn yi eꞌ xonl kꞌajtzun Lot.
9 Ma jaluꞌ Taꞌ cheꞌ biycunuꞌ, chi eꞌ tulejnakuꞌ yi eꞌ aj Madián, nin chi tulejnakuꞌ Sísara tu Jabín tuml chisanlar, yi tircuꞌn chiquimeꞌn tzi aꞌ Cisón.
10 Na yi eꞌaꞌtz ja chiquim le amaꞌl Endor, nin ja choꞌc tetz awonil txꞌotxꞌ.
11 Yaꞌtzk tulejuꞌ yi chibajxom yi eꞌ kacontr. Choꞌn cunink cheꞌ tulejuꞌ chi tulejuꞌ Oreb tu Zeeb. Nin choꞌnk chuꞌlij yi cyajcawil eꞌ kacontr chi nchiban yi eꞌ Zeba tu Zalmuna.
12 Na yi eꞌaꞌtz eꞌ oc kloꞌ tan majleꞌn yi eꞌchk amaꞌl yi tetz Ryos, poro ja chiquim.
13 Iluꞌ inRyosil, cheꞌlk cuꞌn tanuꞌ swutz. Choꞌken tetz tzꞌis. Nin choꞌnk chiban chi na ban xak xtzeꞌ yi na ben tan cyekꞌekꞌ.
14 Ej nin choꞌnk chiban chi na ben loꞌon juꞌ kꞌakꞌ yi na oc kꞌaꞌkl jun juꞌwtz nka chi na tzꞌeꞌ jun cꞌoloj xtzeꞌ.
15 Choꞌnk sban tan chitzꞌeꞌseꞌn yi eꞌ kacontr. Okuꞌ tan chixoꞌwseꞌn.
16 Elk chikꞌej tanuꞌ, bantz tuleꞌnuꞌ txꞌakx ẍchicꞌuꞌl.
17 Junawes elk chikꞌej tanuꞌ. Ej nin choꞌnk chiquim tkꞌab chitxꞌix.
18 Bantz teleꞌn chitxum tetz yi ntin iluꞌ Kataj nin cyaꞌl jun na xcyeꞌ quen teꞌjuꞌ, na iluꞌ yi wiꞌtz Ajcaw tibaj cyakil yi at beneꞌn tziꞌn.