Yi Kataj Ryos iꞌ yi wiꞌtz pujul xtisyaꞌ tibaj cyakil
82
1 Yi Kataj Ryos at iꞌ tcyaꞌj ẍchixoꞌl yi eꞌ pujul xtisyaꞌ, tan maꞌleꞌn cyajtzaꞌkl nin tan takꞌleꞌn chicaws.2 Eꞌuꞌ pujul xtisyaꞌ ¿tonaꞌ nin yi quil xom chiwiꞌuꞌ scyeꞌj yi eꞌ mal nak? ¿Tonaꞌ nin yi nink chixomuꞌ te yi bintzi?
3 Quil cyelsajuꞌ chikꞌej yi tal prow yi quiꞌc cyajtzaꞌkl. Quiꞌk cyelsajuꞌ chikꞌej yi tal prow meꞌbaꞌ yi quiꞌc chitaj chitxuꞌ.
4 Ma na elk chikꞌajabuꞌ scyeꞌj. Choꞌkuꞌ tan chicolcheꞌn ẍchikꞌab yi eꞌ mal nak.
5 Poro yi eꞌ cyeruꞌ yi eꞌuꞌ pujul xtisyaꞌ, qui na el chitxumuꞌ tetz yi eꞌchk xtxolbilaꞌtz. Jopij wutz cyajtzaꞌkluꞌ. Ateꞌuꞌ tul tzꞌoꞌtz wutzil. Nin tan chipajuꞌ, quiꞌt na jal baꞌn cyakꞌun cyakil wunak. Na quiꞌct caꞌwl at beneꞌn tziꞌn.
6 Je talnak Kataj Ryoseꞌj: “Eꞌuꞌ cuꞌn ryos taneꞌn, eꞌuꞌ nitxajil yi jun yi at jalen tziꞌn tcyaꞌj.
7 Poro tan paj cyajtzaꞌkluꞌ, ẍchiquimokuꞌ chi na chiban cyakil wunak. Ẍchiquimokuꞌ chi na chiban cyakil ajcaw yi ntin cawuꞌn cyaꞌn nin qui na chixom cyetz teꞌj,” stzun Kataj bantz.
8 Iluꞌ inRyosil. Sajkuꞌ tzoneꞌj wuxtxꞌotxꞌ tan pujleꞌn xtisyaꞌ.
Cawunkuꞌ, na iluꞌ ajcaw tibaj cyakil yi eꞌchk nación beneꞌn tziꞌn wi munt.